Dohthlennak tuah le Raldoh ah abiapi bik mi cu Phaisa asi.

Kokek Serchuak Mi Hriamnam In Ralhrang Rallokap Adoh Khawh Cang Mi Mino Hna

CDM in kan thawk I, dai tein duhnak langhter buin sandah kan piah ko nain, Kut lawng tein asi ko mi Mino le Mipi cu: Rallokap nih Meithal bak in, an kah caah, Mipi khumzual awk le humhim awk ah: Ralhrang thlukin cihmih awk ah Hriamnam kan I tlaih hi asi. Thimh awk lam dang kan ngeih tilo caah hriamnam kan tlaih nak asi.

Ralhrang MAH nih uknak a laa ri in Mipi 2000 leng an kan thah cang. Ramdang bawmhnak kan hmuh men lai ti le NUG nih Meithal le hriamnam hman cawk lo an kan pek lai ti mi kha rak I ruahchan cio asi. Dr. Sa Sa bia kha naal tuk kaw, Chiti tello adang Naal bak asi ko caah, kan rak zumh tuk hrinhran. Sihmanhsehlaw, cu vialte ruahchan nak cu Pakpalawng an si dih, bia cu thli lak ah a tlau timi tu a tlinnak an si ai. Cucaah MINO hna nih mah tein hriamnam phuntling cu serchuak an I zuam I, hlawhtlin ngai ah a cang.

Dohthlennak tuah le Raldoh ah abiapi bik mi cu Phaisa asi. Phaisa loin Dohthlennak tuah khawh asi lo I, Raldoh khawh asi hrim lo. Kum khat leng Dohthlennak kan kal pi chung ah Phaisa hlawhtlin ni a um ballo. A bau mi lawng te an si. Phaisa tlamtlin lai caan kha kan rak hngak hmasat nain, a si khawh ti lo.

Hmailei zong asi khawh lai ti cu a lam a tlawm ngai. Zeitintiah Dohthlennak hi aman an rak tamtuk hrinhran. Kan rak tuak ning nakin a let tam tuk in a herh mi phaisa le thilri ngeih awk hi an rak I thlau tuk hrinhran. Cucaah Phaisa um lo buin le hmangrual thilri umlo te bakin Mino hna nih Hriamnam le bomb serchuak hram cu an thawk colh. Kaabai, G3, Drone le vawlei phum mi Bomb cu an ser hmasa. Tidan zong phukhat le khat anmah tein, man lo tein a lak tein an rak I pek cio. Bomb le Drone cu an hman tir bak in Rallokap tampi an thah colh hna. Bo Nagar zong Vawleipi ah amin a thang colh ve. Bochuk Aung San a hrin cang kan ti dih ko khah.

Ralhrang thluk awk ah aherh bik mi cu: Meithal an si ti ci kan hngalh ko nain, Machine Gun le Autogun tbk tampi a cawk khawh ding kan si lo. Cucaah lam dang in Autogun le hriamnam ngeih khawh ding kha fakpi in an I zuam ṭhan. LDF PDF cu Raldoh tu, Hriamnam serchuak tu le Hriamnam zalh tu tbk rian an I phawt hna. Bianabia ah: KGZ-A Kareni Generation Z Army cu Kum 15-30 mino vialte nih 2021 May ah an rak dirh. Meithal le hriamnam serchuak awk ah a herh mi thilri vialte le Fimnak kha biatak tein an kawl I, an I hmaithlak colh. Kum khat a liam hnu ah, KGZ-A cu M4, M16, AK22 Kaabai tbk tampi an ngeih manh. Tambik cu Thai in an cawk hna.

Ralhrang Rallokap nih Ngakchia, Bawhte, tarnu tarpa, fapawi mi tbk hrial loin, a tlaih hna an thah hna caah sualnak ngeih lo mipi 2000 leng kan thih cang. Cucu mino kip nih an lung fak tuk caah Online in bomb serchuak nak cu an cawn cio hna. Hmakhat te ah bomb an serchuak khawh colh. Rallokap tampi an thah manh ve hna. Sualnak ngeih lo mipi nan hrem man an ti hna.

Mino tam dueh cu Ramri tiang an kal I, EAO sin ah Raldohnak Tindan an kai. Meithal an pek bang ko hna nain, an I za hrim lo. Tlawmte cio lawng kha an pek khawh hna. PDF LDF meithal aa Tlaihmi hi 10-30% hi si dawh an si. Tam deuh hi cu Meithal loin kut lawng in an to, kut lawng in Raldoh asi rih ko. Meithal a bau ee Hriamnam kan pek uh law cu tiah an hram tawn kha.

Meithal le Bomb an hung ser khawh ri in Rallokap hi an tlawm thluahmah cang. Athi na, a zam na, CDM tuah na, PDF LDF he aa fonh na, ti an si cio hna. Aruang bik cu Mino hna nih kokek hriamnam, bomb le Drone kha an serchuak khawh ruang ah asi. Raldohnak kip ah Drone in bomb puak le Bomb thlak in an hmang hna. Drone an hman hmasat tir, Northeast Raldohnak ah Voi khat Drone an hmang bak ah Rallokap 8 an thah colh hna. Tutan Falam Le Hakha karlak kahdohnak ah Rallokap 40-70 an thah nak ah an hmang bik mi cu an kut chuak bomb le Drone an si. Drone hman cu a hlat nai nih Lai a rel caah Raldohnak kip ah aa hmang khawh ve lo.

Nai te ah khan TI Bomb an ser. Irrawaddy tiva in a rak kai mi Rallokap le an Tilawng cu an puak hna. Rallokap Uirual Tampi an thi. Tilawng an rawk dih. Hi bomb pakhat man hi atam lo. USD 50-man te lawng asi ko nain a rian ṭuan nak cu million in asi. Rallokap CDMer hna nih 60MM an ser khawh cang. An ser lio le an hniksak lio ah cheukhat an thi. Serchuak nak caah aherh mi thilri har tuk hlah sehlaw, tampi an sersiam khawh cang.

Rallokap hi minung le hriamnam in a ṭhawn deuh ko nain Mino hna nih cawlh loin antuah hna I ral an doh khawh zungzal hna. GZ mino hna nih Kokek Meithal, Bomb, Meithal hme mi le meithal nganpi tiang in an ser khawh cang. Bawmhnak phaisa in hriamnam an serchuak chinchin lai tiah an ti cang. Hriamnam le kuan man a kai tuk caah mah tein serchuak an timh cang.Crd-Zingtincuai Cinzah

Be the first to comment

Leave a Reply

Your email address will not be published.


*