Dear Thantlang Peng Ralzamnak kumkhat kan tling

Thantlang peng mipi vialte, nan dam hna maw? Nan khuasak tintuknak a har tuk ko lai dah! Zingnu sin rai kan thawinak Biakinn runrem zong kha nan ngai tuk cio theo lai. Chungkhar tling in ruuninn nuam ah rawl dum ti zong kha nan ngai tuk lai dah! Ral ruang ah nunnak pe cia chungkhar hna caah zuunkhung tuar in ni le thla rel a har tuk hringhran lai. Zalam pi ah zatial tlaih in tlonlen ti zong kha nan ngai ruangmang ko lai. Zingnu kutzung dawh a langhnak Thantlang khua hrim nan ngaih zawn ah zan ih merem khawh lo zan zong a tlawm lai lo. Nan fale CDF-TT zong nih kan mipi kan in ngai hna, nunnak pe mi kan hawikom dawt hna kan hlam hna i Thantlang khua hrimhrim zong hi kan ngai tuk ve.

Nihin ni hi nikum ah cun Thantlang khua chung ah ral a thawhni a si. Kuanzen thawng a than ni a si. Kangh-uh kan ton ni a si. Kan mithmuh Pathian ah kan ruahmi kan pastor an thah ni a si. Kan biaknak an doh nithla a si. Kum tling lo hngakchia an kah hna ni a si. Kan bochanmi khuanu/pa an thah hna ni a si. Hngakchia bik in upa bik tiang nih an nun, an thisen an pek ni a si. Inn zuat satil hna, tlikzamnak i laklawh in an awlokchon ni a si. Mitthli um-ek a tlak ni a si. Kan vawlei a muih ruangmang ni a si. Thisen le kangh-uhnak in tuanbia kan tialni a si. Thantlang peng Calender nih aa chinchiah peng dingmi ni le thla a si.

Dohthlennak Calander kan zoh tikah kan pekchanhmi thisen le nunnak (Mipi -6, CDF-16), inn (1500 hrawng) a tam lengluang. Ralzam (minung 15000 hrawng) cu a him deuhnak hmun panh in kan i thenthek dih. Dohthlennak man hi kan tuar khawhnak nih a tlinh lo tiang in a man a rak fak. Aruang cu Ralkap uknak a hram in kan bongh khawh i Federal Democracy ram le Chinram Pennak kan ser khawh nakding caah a si. Hi hmuitinh phanh nakding ah hi zat hi kan pek cang. A herh ahcun aherh ning zat in i pumpek dingah timhcia kan si. Hi lamthluan ah hnukir awk kan tha ti lo. Kan kut le kan uniform ah nunnak a pe cangmi thisen a neh dih cang.

Thantlang peng kan mipi hna, kan tei hrimhrim lai. Lung awtawm in um hlah uh! Aruang cu Chin mipi humhimnak le Chinland humhaknak ding ah CJDC (Hriamtlai phu 17) nih kan i zuam cuahmah. Thantlang peng humhak nakding ah Battalion paruk nih fek thup in kan kham. Thantlang ralhrang, Thantlang peng an chuah khawh lonakding ah Suimilam 24 chung, hmun 4 ah kan erh-tonh hna. 15 million project, Pathian nih lam a kan hruai i tlam a tlin ahcun Pathian nih caan rau lo ah teinak a kan pek ko lai.

“Koliat nih David a tei bal lo. David nih Koliat a tei”. Lungtekep pakhat ah Pathian aa phuan ahcun teinak a um ko. Cu Teinak petu Pathian cu kan zumh bak. A kan tanpi lai kan zumh fawn. Cu caah kan tei hrimhrim lai.

Thantlang peng mipi hna, a tu lio caan hi thlacam i bawmh caan, nun i hrawm caan, pakhat le pakhat i hnemh caan, thazaang i pek caan, lungsau a herh caan, i hnek nun ngeih a herh caan, lungthawn a herh lio caan a si. Mipi nan lungdongh ahcun CDF le CNA hmai kan kal kho lai lo. Ral kan tuknak a hnursuan khawh. Mipi nih lungthawng tak in le fekthup in kan dirpi hram uh!

Kan karlak ah dawtnak le zawnruahnak hi a sangbik ah chia usihlaw, teinak kan phanh hlan tiang lungrual tein hmainawr chin rih ko hna usih!

CDF-TT PrayForTT WeLove Thantlang KanTeiHrimHrimLai
Salai Uk Nun Bawi Chuntei

Be the first to comment

Leave a Reply

Your email address will not be published.


*