Dawtmi, nuam thlaimai in Timit kuang ah kal in aho van hai loin nuamh a rak duh tukmi,

CDF Vaalpa “Ka Dawt, Kan Caah Khua A Dei Te Ko Lai Mu”.Cafung tlai in (vairang cacawng in) fimnak, thiamnak a kawlmi, hmailei ka khuasak fawi te seh, i cawm kawl hawlnak fawi zaang deuh tein fimnak a rak kawl ve mi, cu lawngah a hmailei lamthluan caah saduhthahnak le chunmang nganpi a rak manh ve mi, Miphun le Ram dawt ruangah a sian lo tuk bu tein, a ngakchiat lio i a kawm rual hawi he lentecelhnak ah a lem ser in i dohnak ah an rak hman tawnmi meithal, a tak a simi ka cawi te lai i ral taktak ka doh te lai tiah zaanmang hmanh in a rak i manh phah lomi, atu cun a ṭih tuk bu tein aa thiam ruangmang ai mu.

Dawtmi, nuam thlaimai in Timit kuang ah kal in aho van hai loin nuamh a rak duh tukmi, nikhat hnu nikhat kan i dawtnak fek seh tiin zaihla sung in a rak hlawimi, a thinlung ngeitu a Dawtmi he caan an hman lo caan a hung sau ngai cang. Lungdiriam tein i kuh, i reh le i hnamh cu chim hlah, phone te hmanh in lungsi hnangam tein an i chawnh khawh lo caan a hmang cang.

Hawi cio bangin dawtmi hna he an inn chung tang te ah sunghno nu chuan thaw, cabuai khat i dum tti caan a ngai tuk ve ko. Lungcan i cuh in kan chan he cun peih ai ton cu, zeitin hen ka miphun hna tuarinnak le aihramnak hi ka zoh sawhsawh lai i ka ṭhutpi sawhsawh khawh lai tiin a dawtmi hna kal taak in nunnak pahnih ngei bang, ram caah nun pek ai thim deuh.

Uihrut pi bang a hlan i kan khua le ram ra in kan inn cia le lo cia ah sunghno ka nu nih awr i sum ruangmang in le fale zawn tuknak ah ei sian lo tein fale sianginn kai caah tiin ai zuatmi le ai uang tukmi saṭil arva hna, mahta bangin an rak thah le an ei lio hrawng, hmuh ko hmanh ah ther le phangin puan tangah rak i dup, an duh lo ningin rak um ah meithal in kah timh, mah le thil hmanh i ken huam lole phur huam loin,

chungkhar cawmtu, chungkhar lubik kan pale hna kuli an phurh ter hna. Kan huam lo tiin al ah le rak hrem hna, zeicen remruam ko dah pa le ngaih in a rak kan hren le tuahto kha mu, zei a ton hmanh rak theih khawh nih si fawn ṭung hlah.Lungretheih in caan kan rak hmang lio caan.

Lungrethei le vansang in a rak ummi sunghno ka nu, zeite ṭhathnem a rak ngei ve lomi, an rak temtuarnak vialte a ruah ah hi ralhrang pawl le uihrut pawl hi kan doh hna lo cun, kha ti khan maw kan tuar in rih lai tiin mitthli he a dawtmi hna chuah taakin ramtang um ai thim.

A dawtmi a ngaih zawn ah inn ah kal in a rak len tawnmi, ngaih caan ah Hakha Town ah a rak lenpi tawnmi kha, a tu ahcun lungchung dairy (a lang le par) lawngin a ngaihnak aan bia a chimh cang. A dawtmi a ngaih caan ah a biaruahṭi hawi tete hna cu vansang i a ummi thlapa le arfi lawng khi an si cang. An sinah a ngaihnak zaza a chimh tawn hna. Hitihin a dawtmi a ngaihnak hna cu a phuan;

“Aww! Ka chung um, Thlatang le fino rual hna.Nan lakah aa manhmi ho tel nan um maw?Nan lakah aa manhmi nih ka dawtmi kha,Na dawt, na ṭa nang ngaih in ni caan a hmang e ti hun ka chimh piak ta u law,

“Lungsau tein rak um in dam rak izuam seh,Ni nikhat ahcun, kan caah khua a dei te ko lai.Lungsau tein Dawtmi, kan ngai tuk ee tiah ka chimh piak ta u law” tiin ngaihnak zaza a phai tawn.

A dawtmi, samthlairem, a thinlung ngeitu, an saduhthah le chunmang a rak manhmi aa dawh tukmi Mo thuam raang dawhte he hmuh lai a rak i ngaih tukmi, Biakinn ah mi zapi hmai le Pathian hmaiah biakamnak serin a nuammi chungkhar thar dirh dingin saduhthah le chunmang a ngeihmi vialte cu ram dawt le miphun ruangah Pathian nih caan ṭha, caan rem kan pe te sehlaw tiin meithal put in chukcho a kai in, a nunnak pakhatte hmanh ui lo tein a miphun a ral doh i a nun a peek ee.

A Dawtmi sinah donghnak biacah “Ni nikhat ah kan caah khua a dei te ko lai mu, Dawtmi”.

Salai Van Lahnin Duhsa tete in a ra thluahmah lai, CDF vaal dirhmun sining lo deuh ka rak ṭial palhmi um cun ka theithiam te ulaw.Laknak: Salai Van Lahnin FB