Dawtmi Ka Nu Ka Pa nan bia al kha a va harsa hringhran dah!

Nunnak pakhat ka ngeihmi kan ram damnak caah thap kaa timh biakhiahnak ka tuah ni thawk in nihin tiang ka dirhmun ah Ka Nu Ka Pa nan bia al kha dah ngai harsa cem ah ka chiah.

Nu le Pa u le nau a daw lo mi, Fa pa/Nu zawng ka rak si ko lai, nan ka thinlung taktak ahcun nanmah hlei an um lo! Cucu tihnung mihmun le harsatnak taktak hmun ka um ah kai fiangtuk! Nan mui hmuhti lo dah ka phan cem lai.

Dothlennak ai thawk kaa i Pa te na ngamdamnak nih a celh lai lo nang cu kal duh hlah ko hen tiah nan rak ka ti lio ah khan! Ka khuaruahnak a va buaidah ngai! Meithal zawng i tlaihballo mi van tlaihding kha le ramtang ah harsatuk va um ding kha nan ka ruahpiak khawh lonak kha ka theihthiamtuk ko, nan midang tuan awk lawngah le a celhmi lawng tuan ding ah kan ram nih zalennak a hmuhkhawhnak ding rian harsa nunnak thap herhmi rian kha ka minung hawi lawng an liang cungah khinh ding kha ka duh lo.

Minung kan si vawlei in sermi a thi kho mi ciocio kan si, hi dothlennak ah hmai a raksatu nunthap tu hna zawng kha ka nu ka pa ramtang ka luhtaktak hnu ah hin kai fian mi cu, an nih zawng fa pa/nu dawt cukmakmi sianlo mi an rak si cio ve ko hna ti hi a si, cucaah hi dothlennak rian kan tuanmi hi ka ngol khawh rihlonak cu kan ram a dam rih lo caah a dam hlan cu ka tuan rih ko lai. Cucu nunnak a pe cia mi kan hawi le ka upat khawh hna nak um chun a si, an nih cu an taksa kan sin in an tlau ko nain slute pek in upatnak kan pek zungzal hna i an mah he kan i chawn zungzal zeitik hmanhah an tlau ti lai lo cucaah an mah he i chawnh zungzal hi kei cu ka duh an mah he kan biakam a dih hlan lo an sin ah kan um zungzal a herh.

A donghnak bik i din ko cang law, soisel thangchiat na tuarpeng tung ngol ko cang nan timi kha a lehzia dah kan thiam hna lo! Hringtu dirhmun nan sinak in nan ka dawtnak saanzia hi ka theih ko, nan ka dawt tuk caah a si ko. Nan a lehzia kha kan thiam hna lo!

A caan ahcun Kahdohnak a chuah caan le harsatnak kan van ton taktak tik ah, nan biakha ka ruat than tawn ziah kaa rak ngol ve ko lo kan hawi le mitampi an i ngol ko tung tiin lung kaa chir deng caan a tam.

Nan ka pawngkam ummi ka mino hawi keimah bang thinphang lengmang in ral a tu ve mi hna ka hmuh hna zawn ah khin keimah hi thazaang tampi an ka pek, Mino tampi raltu ding herh kan si lio ah minung tlawm te lawng nih kan tuk, cu minung tlawm te chung in ka bau ve rih a si ahcun cu nak in kan tlawmchin lai, mawtaw cu keli a that lawngah tlikter le kalter khawh a si bantuk in kan nih raltu mi zawng thazaang kan i pekcio le hmunkhat te ah a ho hmanh i din hleilo in raltuk kan herhning ka ruah ah nan bia ka alnak kha a si.

Zeidang dang zawn ahcun sisehlaw! Nan bia kha ka al lai lo cuchinchap ah ka nunnak caah tihnung mi rianchin ahcun nan bia hi ka zulh ko lai! Nan tutan kan hrinnak ram kan vawlei kilvennak le luatnak a hmuhkhawh nakding rian thengtheng ahcun nan bia cu ka al rih ko lai ka ngaithiam hram u! Tutan cu nan nawl ngai rih lo ko ning tiin lunghah i pek in nihin tiang dothlennak ah ka peknak hi a si.

Nunnak a dih khawhnak riantuantu pakhat ka si ve bantuk in herhmi tampi ka ngei hna!

Cu vialte cu Thlacamnak in rak ka halpiak u Bawipa kan biakmi Pathian kha rak ka chimhpi ve u!

Pakhatnak ah, Pathian ka herh, a mah Pathian he Raltuknak kha kan herh hringhran ko.

Pahnihnak ah, Meithal kan herh, cun kuanzen zawng kan herh, cupin ah ti le rawlthaw mi le minung thazaang a kan petu Vitamin tha ti rawl zawng kan herhtuk hna, hi vialte hi tu ahcun kan cham a bautuk, nain hi hna hi kan sin ah zeitik ahcun dek a um ve ko lai tiah kan i ruahchan ko! Pathian nihcun a kan umpi cang ralzawng a kantukpi cang tihi mithmuh kut tongh in a langh caan hi a tampi cang cucaah nan thin rak phang hlah u Pathian kan lei a tan caah kan him dam ko lai.

Cun kan herhmi thildangdang zawng Pathian nih a kan pekchin ko lai cucaah Pathian sin ah bawmhhal le lunglawmhnak chim kha kan miphun pi nih leiba kan ngeihmi rian a si tiah rak hngal u law Bawipa cu biaruah in chawn lengmang ko hna usih.

Kan nih cu nihin thaizing, zeitik ah ti hngallo minung kan si caah, zeitik ah kan iton than hna lai hngalh a si lo, Vawlei ah maw a si lai Vancung ah dah ai fiang lo mi a si caah, nan lungthawng sehlaw kan mah zawng kan lung a thawn a herh ve. CDF/CNA kan cungah zeipoh a tlung kho mi a si, cutik ah nan mitthli tlakter in le thazaang dernak ah hmang hlah u! Pathian nih kan caah a thabik in khua a khaan i lai a relko tiah nan lungthin ah um seh….

A donghnak bik ah kan ram a dam hlan cu nan bia al rih ko ning! Hihi Pathian nih a ka auhmi a si tiah kai ruat i a herh ahcun ram luatnak caah thisen le nunnak hmanh ka thap ko lai tiah ka miphun ka ram caah biakamnak ka tuahmi kha a dih donghtiang ka tuan ta ko lai, cucaah ka tuanmi rian hi ka hngalhpi u law ka upatpiak hram u hi rianruangah harsatnak le fahnak kan in kan ton a si ahcun i lawm deuh ko hna usih, ram riantuan cu Pathian riantuan a si ko.

Kan him kan dam lai, nan him nan dam lai i Pathian umpi lam hruainak thawng in kan ram nih luatnak a hmuhtik ah kan i tongthan hna lai i Pathian sinah lunglawmhnak mitthli he hi rian kan tuanmi theipar a langhte tik i lunglawmhnak chim dingmi tu khi kan mitthlam ah cuang ko seh mu.

Kan ngai hna Nan ka ram nih a ka herh rih caah nan sin ka phak khawh rih lonak a si! Kan i ton tik ah Bawipa ai lawm lai i Bawipa ai lawmh ahcun kan ram a dam zungzal can lai mangtha tuk u law.Crd.Salai DK

Be the first to comment

Leave a Reply

Your email address will not be published.


*