Mipa, lungfim tein khua vun ruat ta hmanh. Pa ka si tinak men men si loin, nangmah na thisen bakin sermi na fa le an pawi piaktu an hrin piaktu na nupi te kha na mitthlam ah vun suai law vun ruat hmanh.
Vawlei tuarnak lakah a fak bikmi ah aa telmi cu fahrin a si. Nu nih fa an pawi ahhin an thluak ,an pum le an thinlung ngandamnak vialte a hnur suan dih. A hninghno tukmi a pum, aa dawh tukmi kha fa an vun pawi cun an i rawk dih. Fa an vun hrin ah harnak fak tuk an tuar i an titsa pawl hlan bantukin aa dawh ti lo.
An pum chungah aa rawkmi thil hi a tam hringhran. Zeitik hmanhah mit kum cim tein an i hngilh manh lo. Thawh a zat hna ah an i hngilh. Hngilh a zat ahkhin fale an dam lo caan cun zaan khua an dei tawn. An fale an chuah kaa in puitling an si tiang an zohkhenh hna caah thinlung dai in an um bal lo. An fa le an ṭah thawng an theih cun rawl an ei cuahmah mi zong an kal tak. Hlan i a ziaza a ṭha tukmi nu zong kha amah le amah i rem lo tiangin a nun a tuar. A caan ah an thau lan, a caan ah an der tuk tiin a pumsa hmanh aa zohkhenh kho ti lo. Asinain fale chungkhar caah ka ba a ti zongah i dinh timi hi a ngei hrim hrim lo.
Cu buin na nupi nih hin rawl ei awk um loin an chia bal lo. A fa le a zohkhenh buin ihphah thiang te ah an ihter, rawl thaw tein an ei ter. Mit kuh cim tein thaizing rian ah na kal khawhnak dingah nau ṭah aw na theih lonak dingah ihkhan in an zam tak. Na thil thiang tein nai hruk nak ding ah an sukpiak peng rih. Nangmah khi fa zohkhenh in an zohkhenh tawn. A thinlung a bat pinah a taksa le a thluak hi na theih loin a rak ba tuk lai. An dawt caah a caan cun a langhter hrim lai lo. Cucu a theithiamtu pa na si a herh.
Maw mipa, na nupi hi na daw lo sual maw? Na nupi hi na nek tuk sual maw? Rian har a ṭuan tu ka si tiin nai uah sual maw? Na nupi tuarnak le na tuarnak hi cuai thlai u sih law thleng u sih in ti seh law na duh hrim lai lo dingmi ahhin nupi zei rel loin na um sual maw? A caan i chungkhar a zohkhenh ning na lung a tlin lo tikah nupi fel lo tiin na zai el maw? Nupi dang kawl dingin khua na tuak bal maw?
Ṭha tein tuak sat mat law ti kan duh. Inn chungkhar zohkhenhnak caah tiin leng i na va ṭuanmi nak let thum li in dakaw na nupi nih inn chungkhar a zohkhenhmi khi a har cu. Nang cu suimilam 10 chung a sau bik na ṭuan i na nupi cu hngilh caan te khi dakaw aa dinh caan a si ko cu. Zeitluk a duhmi a um zongah na fa le nangmah nih nan herh cun zungzal in aa ready mi nu dakaw a si.
Nupi a daw lomi pa na si sual cun nai palh tuk lai. Nupi zei a rel lomi na si cun mah le mah aa hlengmi na si lai. Nupi le fahnak petu na si cun naa sungh tuk lai. Zeica tiah nupi le tuarinnak hi a tam tuk i chim rel dih khawh a si lo. Cucaah na nupi daw ko, nangmah caah lawmhnak thlaici na tuh bantuk a si.Crd-Nunu
Leave a Reply