Copy tu pawl zong nih ka tuahmi hi a dik maw a dik lo ti cu nan hngalh cio lai.

Anna Biak Tha Mawi Ka Hmuhning .Tutan PBS thuam copy le copy lo kongah an buaimi cu nan rak hmuh cio. Thil zuar lei kongah thinlung a chia ve lomi caah cun a simh zong an kan simh tuk cio lai. (Kei zong hi Laithil kut tah bak kai hruk kho lo. Ka hme tuk le ka tai ah an i pong dih hnu khan kut tah hruk kha byebye ka ti). Cucaah Laithil kong i thlak awkah theih hngalhmi ka ngei lo.

Aidii hi Laithil kongah zeitlukin dah kherhhlainak a tuah i, thluak ba in zaan it loin miphun thawi a kilhtu a si. Laithil kong ahcun kan duh le duh lo zongah upat a phu. Amah pumpak in cun kan i thei lo. A pumpak kongah upat awk a tlak le tlak lotu cu amah a thei n nih an theih lai. Nain Lai thil tharchuahnak le kilvennak kong ahcun upat tlak phu, dirpi tlak phu, a tha dit man hmuh piak phu khi a si ko.

Lai thil cu chim lo biazai ṭialnak le ca sawh sawh ṭialnak hmanh ahhin tampi ca rel a herh. Mi bia chimmi ngaih a herh. Pupa holh le tuanbia tampi a theih. Hitluk thawi tete a hme tete fiang khitkhet le rem khitkhet tiang a hrilhfianh khotu cu Aidi khi a si i mah theihhngalh khawhnak dingah zeitlukin dah caan a pek lai, ka ruahnak nih a phan lo. Tutan tonmi thil zongah Lainu tampi Lai thil kongah nan lung a fim deuh cio lai dah.

Minung kan si rual rual thuam cu a herh dihmi kan si hna. Kanmah le rem tawk kan mah le za tawk thil kan i hmuh tikah kan thinlung ca le kan thluak ca zongah hliphlaunak petu le raltthatnak petu a si caah thuam thil hi a biapi ve hrimmi cu a si. Mah miphun thuam dawh tak tak in a kan ser chuah piak, a tuanbia a kan hlat piak, record a kan tuahpiak, Lai kokek la bak a kan hman piak, thiam tak tampi an thla hlawh a pek chap hna, rian a pek hna. Hi kong ahcun upat a tlak hringran ko. A thil man hauh dan zong ruah satmat ahcun a phu ko. Caan pek a har zia le a rauh zia le Kokek thil, Lainu kutzung bak a si caah ngeih khawh ahcun thil ṭha tuk a si lai.

Copy kong belte ahcun chim ding ka ngei lo. Zeidah a palh le palh lo tiah i chimh dingah ngakchia kan si ti hna lo. Ka ca a rel kho paoh hi cu a lung fimmi kan si.

Aidii zong nih copy kongah zei bantukin dah ka phisin lai i hi thil hi hmailei ah ṭuanvo lak (handle) lai ti zong a fiang chin ve lai. Ralrin dingmi le pehzulh dingmi a theih tuk ko lai. Cun copy hi zeitlukin doh len zongah an um ṭhiam te ko lai ti zong a theih cia dih ko lai. Hi tiang thuam a ser khomi Lainu, na thil cu a cuang hrim peng ko.

Copy tu pawl zong nih ka tuahmi hi a dik maw a dik lo ti cu nan hngalh cio lai. A dikmi cu a dik ko a dik lomi cu a dik lo ko. Puitling cio nan si hna i nan tuak khawh tuk. Cucaah nanmah duhthimnak a simi ahkhan a thim zia tu thiam a biapi tuk. Ka palh bak lo tiin nai ruah a si le zei bang ti ṭha.

Thil cawtu belte hi cu a tak kan duh le a tak cawk, a deu kan duh le a deu cawk. Kanmah nih zeidah kan i cawk ah a ṭha tiah kan theih dih ko caah kanmah duhthimnak bak a si tihi amah Anna le mipi zong nih kan theih ah a ṭha. Hi kong ah ahohmanh chimnak nawl kan ngei lo. A cawtu nawl bak a si. Copy timi cu vawlei ahhin a dong lai lo, cucaah mah duhthimnak ah kan phaisa a kalnak kong kha cu a um ko. Thil ṭha cu cawn peng a si lai, asinain a deu lomi cu a deu nih a tluk bal lo.

Aidii zong lung dong lo tein kan kalpi rih, miphun nih kan i ngeihmi ro bantuk na si. Thazaang na chuahmi le na tincomi ai rup lo zongah na tha chia hlah. Na min cu Lai tuanbia a lo ti lai lo. Miphun lakah a hmai lei a dirmi na si ve rual rual in a caan ah thangchiat na ton lai a caan ah conglawmh na ton la Pathian nih cun pei mah dirhmun ah an cawisan cu.

A dang kong ah cu ti deuh cun siseh law tiah kan duhpiakmi le kan ruahchannmi a um ko sinain Laithil na tuahmi thil kongah an upat tu ka si. Kan ṭanpi fawn.

Dam rak i zuam law saupi kan nunpi. Kan Laithuam zong thar chuah in par ter chin ko.

Note: Zeitlukin kan buai ko zongah kan buaimi zawn ah buai i thil dang tu ah i fumtom ṭhan a biapi tuk.Crd-NuNu