CNA. Mai Sui Len Par (Fungkah) cu January 10.2023, Kawl ralhrang nih Jet Fighter in Camp Victoria an kah lio hna i a nunnak liammi kha asi. Apa Seo Nan le a nu Sai Sung hi hlan lio CNA Ralkap an rak si (Mi tampi nih cun nan theih cang ko lai dah). Hi tikah anu le apa lohma ban pehzul in ram le miphun caah atu bantukin a nunnak a liam hi asi. Upat pek nak capar tawite kan van rel hna lai.
Na ṭialtami tuanbia vialte hna hi lungca bang a ṭial camcin cang lai.Dawtu Sunghno ka nu, Chinram le Chin miphun nih mah te khuakhan lairelnak kan ngeih khawh i a dikmi uk pennak kan hmuh khawhnak hnga fikfa le cangvat, ruahsur le nilin lakah rawlṭam buhri tuarin kanram le miphun caah Chin nusal ṭha le pasal ṭha hna sinah dawtu ka pa he nan lohma ban pehzul dingin ka kal lai.
Ni nikhat caan caankhat ahcun teinak thantaar he zaṭial tlaihin kan Chinram te ah kan leng ṭi ṭhan te hna lai ee. Na lungsia ka herh duh hlah law kei na fanu nih kan ram le miphun caah ka ti khawh tawk cu ka nunnak mansung bik tiang zong Chinram le Chin miphun caah pek hi pei asi ko cu tiin,, Sui Sui na biakammi vialte cu atu hi maw a tlin cang ne.
Zaanmang chia hlah maw ka ti January ni 10. 2023 zanlei ni cu, na thawng nih vulei pi cul dih ee, na tuar fah ruangmang vomkhing le ngalhriang sahliam fak bang hrum len lai mu khur chungah, i lawnglen lai ee rul thahnang bang maw ka thin. Kan tuar kho lo, kan tuar kho hrim lo ee, lungsak ahar kan tonmi thil hi, zingnu khuakhan maw asi ne hnga a fak tuk ee.
Na tlonlennak Camp Victoria le chumtual rawnah panh sirsiar na aw-an le na mithmai nih milung a hnem tawn, atu ahcun ee hlawtmi puan bang an ṭhinglan cang ne lai mu. Na len tawnnak nehhnu vialte rualhawi hna nih khirh ṭhan hna lai nang bal na bau lan cang ne lai ee. Sui Sui aw nang cu na dawt liamcia Chin nusal ṭha le Pasal ṭha hna he riahruun remhin nuam te’n nan leng ṭi cang hna lai mu. Nan taantaakmi rualhawi hna nih zeitik tiang hme nan zun kan vun tuar rih lai ahar hringhran ko ee.
Rili ral tiang phai hna maw nang na tlei thawng, lungfak cio hna rualhawi le na dawt Chin miphun hna zong, na chuah sempi unau, sunghno na nu le chungkhar hna nih na zun tuarin zeitik tiang hme kan hun hram lai. Na aan thum le mithmai te kha mitthlam a cuang na caam zungzal, philh ni na um kho bal lai lo lei caan dongh tiang. Rauthla talin rak kan leng tawn law kan tuar nem deuh nakah.
Sui Pi aw, rianṭuan ding a tam; rian lim khawh a si lo; rian siaherh tampi na ngei ko lai. Asinain, Jesuh Krih nih vailamtah cung in, “Aa lim cang” ati bantuk in, nang cu na rian lianpi na lim cang. Hi vawleicungah Pathian nih khualtlawnnak caan kum-24 an pek. Na khualtlawnnak vawlei ah caan tawite lawng na um nain na ṭialtami tuanbia vialte hna hi, mi tampi caah cawnpiaktu le lam hmuhsaktu an si lai i Chin mipi kan nunnak le thinlung chungah lungca bang atu le zungzal aa ṭial camcin cang lai. Ka nolh rih ko lai, na liamsia herh hrimhrim hlah mu na ṭialtami tuanbia vialte hna hi Chin mipi kan nunnak le thinlung chungah lungca bang atu le a zungzal aa ṭial camcin cang lai. Capar ṭialtu: Rual Hei Thang ( Blessing pa)
Leave a Reply