Keimah pumpak telh in a caancaan ahcun CNA hi kan uhttanh hna i thazaang pek hnga ding tluk le ttanpi ding hnga tluk in kan ttan pi rua hna lo dah tiah ka ruah. Aruang cu kanmah duh ning le ruah ning phun in ral hi do hna seh ti kan duh tawn hna i cu ti ning asi lo tikah ral hmanh an tu ngam loh CDF lawng an rinh hna kan ti tawn hna. Kan mawhchiat tawn hna i mah le pengtlang CDF lawngah thazaang kan chuah ttheo.
A taktak tiah cun kan ram (Chin State) chung raltuknak khi cuanh lengmang tikah a fiang ngaimi pakhat cu CNA ralkap minung pa zeizat ko nih dah an nunnak thisen an pek cang ti mi nih hin bia a chim ngai. MAH nih uknak a kan chuh hnu lawng hmanh ah CNA nih Thantlang le Halkha peng lawng hlah, kan ram chung hmunkip kahdohnak ah nunnak a pek mi khi a tlawm te ti loh.
Annih cu CDF a rak sem hlan in training ttha tein a kai mi le raltuk experience tampi a ngeimi zong an si. Asinain cucu zeiruang ah dah CNA ralkap a thi le lo an um peng fawn? Kan ruah taktak asi ahcun hi nih hin bia tampi a chim. Bia in chim si loin tuahsernak in a langhter ngaingai.
Kan mino tampi nih hmailei caan ah kan ram le kan miphun nih zalennak a hmuh khawhnak hnga ti in pakhat te lawng an ngeichun asi mi an thisen le nunnak an pek tikah kan ngaih a chiat tluk tein kei cu aho poh an si ah ram le miphun caah nunnak an pek tikah ka ngaihchiatnak le zaangraamnak hi ai khat ko. Chungkhar tefa hoi hna a ngeimi an si ahcun an kaltaak mi hna thaisung le fale ngakttah ah can ding ruah ko ah hin a celh te celh awk a ttha loh. Kan ram le kan miphun caah nunnak a petu zate a sangbikmi upatnak pek bu in…..
Crd.Salai Cbt Zaathang
Leave a Reply