Chungkhar nuam zeitingdah kan ser lai?

Chungkhar timi hi minung i duhdawt nak in ser sawhsawh mi a rak si lo. Pathian nih fonh mi chungkhar tu a rak si. Cucu dawtnak he ser dingin timhtuah piak mi kan rak si.

Lam tampi in Chungkhar nuam serkhawh a si lai nain in Khrihfami kan caah cun kan nun ah Jesuh ngeih hi a rak herh bik.

Vawlei thiam sang hna nih chungkhar nuamh tertu tiah an langhter mi chungah tlawmpal te hrawmh kan duh hna. Hi ka rak langhter mi pawl hi hlethlainak (research) tuah hnu ah chungkhar nuam sin in hmuh mi tuahsernak cheukhat an si.

i pehtlaih/chawnhbiak ning
Chungkhar ah pakhat le khat ṭha te i pehtlaih le i chawnh biak hi a herh tuk hringhran mi a si. A herh mi kongkau, ngaihchiatnak, le lunglawmh hna lungthiang te i chimh a herh. Cu i pehtlaihnak cu dawtnak, nemnak le lungsau nak he tuah a herh.

Ngakchia deuh le lungfim lo deuh nih an duh ning in an chimrel thiam lo can hna a um kho. Cutik ah theihthiam nak he chawnh biak le pehtlaih a biapi tuk. An theih mi holh in chawnhbiak an hau. Cu nihcun chungkhar ah an thinlung a caam lai i an i nuam lai. Chungkhar ah ruahnak i cheuh khawh hi chungkhar nuam ser khawhnak lam khat a si.

Caan hman ṭi nak: A kal a rangtuk mi ni le caan ah manh lo tuk in rian kan ṭuan, chungkhar he caan hman ṭi hi a hartuk nain a herh bikmi hriamnam pakhat a si ve. Kan pumpak rian kha suimilam ṭem khat, nikhat, zarhkhat tbt in chiahtak in chungkhar he caan hman ṭinak nih kan thabat nak a dam ter i chungkhar a kan funtom deuh.

Tahchunnak ah:-hmunkhat rawl ei ṭi, khualtlawn ṭi, hi tuahsernak nih aa khat lomi kan sining, kan uarphun le zuam lo phun hna kha a kan theih ter i nun hrawm khawhnak thunkung a kan pek, cu nihcun i theihthiamnak a karh ter. Tradition bantuk in birthday lawmhpi, ni sunglawi ah caan hman ṭi le holidays ah i nuamh ṭi tbt in zulhphung i chiah hi chungkhar caah a herhmi phunkhat a si.

Biachahnak tuah ṭi: A herhmi thil kongah hmunkhat lungkhat tein timh tuahnak ngeih khawh hi chungkhar pakhat le khat kan i upatnak a si. Ngakchia upa dihlak nih theih awk a ṭha mi paoh cu hohmanh hrial lo tein i tel nak nih chungkhar ah ka biapi ve tiah i theihnak nih upatnak a kan ngeihter. Ngakchia ca zongah ruahnak le hmuhning a kauh ter deuh. Ramri chiah a herhmi thil a si ahcun ramri chung nun khawh cu a herh ve mu.

Harnak caan ah i bawmh chanh: chungkhar pakhat nih harnak a ton tik ah, amah santlaih lo si, tiah va zoh sawh loin na si khawh tawk in na bawmh chanh nak nih pakhat le khat le kar ah dawtnak a fehter i chungkhar na lawmh ter.

i cohlan piakthiam nak: chungkhar pakhat ah hin a fim deuh, thiam deuh le upa ngakchia tiah aa khat lomi sining he khuasak a si tik ah mah le mah i theihthiam lo nak le namneh nihsawh deuh mi an um tawn. Kan thazaang dernak i hmuhpiak in kan sining cio i cohlan piak khawh dih kha chungkhar ah a herh tuk mi a si. Chungkhar hmanh nih nehsawh le zawmteih an si ahcun khrihfabu miphun pi nih zeitin a cohlan khawh hna lai? Cu theihthiamnak nih cun ngaihthiamnak a hrin lai i chungkhar ah lawmhnak a leng ko lai.

intuar khawh nak: chungkhar nuam timi hi tlamtling te nun le i nuamh khawh zungzal khi a si lo. Chungkhar ah fahnak, i theithiam lonak le buainak a um ko lai. Nain, cu tlamtlin lonak cu cohlan khawh in naa tinh ning in thil a kal lo tik zongah na chungkhar sin can khat te na um khawh chung kha nuam te um khawh a herh. Buainak nganpi na ngeih a si ahcun lungthin damnak caah professional sin bawmh na hal ah a ṭhabik.

Nangmah le nangmah i dawt:
Chungkhar caah manh lo tuk in fale, le nupi pasal zohkhenh nak ah lungrawk thadihnak an phanhter khawh caah nangmah te nih caan serthiam in na dinh piak a herh. Nangmah lawng zalong tein na duh mi tuah le nangmah te lawng caan hman khawhnak kha naa ser khawh a herh. Cu tuahsernak nih chungkhar na zohkhenhnak ah ngandam nak a chuah pi lai.

Laknak: The Secrets of Happy Families by Bruce Feiler & a dang dang. Crd-elpis

Be the first to comment

Leave a Reply

Your email address will not be published.


*