Chin Ralkap Ṭangṭi Hna Nih Rungtlang Um SAC Ralkap Bomb An Thlak Hna

Chin Ralkap Ṭangṭi Hna Nih Rungtlang Um SAC Ralkap Bomb An Thlak Hna

Nihin 1 February 2023, zing ah Chinland Defense Force -Hakha, Chinland Defense Force -Thantlang le Chin National Army(CNA) i bawm in Rungtlang i ummi SAC ralkap hna cu Drone hmang in bomb an thlak hna.

Nihin hi SAC nih uknak an laak kumhnihnak camtuak a si caah ramchung hmun tampi ah uknak laak duhlonak an langhter i, kahdohnak an tuah. Hakha CDF zong nih pau dohthlennak kumhnih a tlin camtuak ah kahdohnak an tuah kong cu anmah facebook page ah an taar i, bomb thlak ruangah SAC ralkap a thi mi le hliam a pu mi an um le um lo theih a si rih lo.The Chin Post

Yangon Le Mandalay Ah Silent Strike An Tuah.Yangon khuapi ah SAC ralkap uk duhlonak langhternak can ah mizapi cu dai tein kan um i zalam cungah motor le minung zong kan chuak lo, tiah tualchung mi hna nih an chim.

Nifatin in mi chawkvai an tam biknak Yuzana Plaza hmaiah zing sml 9:50 in mizeihmanh an um ti lo i, motor zong a lutchuak an um ti lo, tiah theih a si.

Cu ṭhiamṭhiam in nihin Febuary 1 silent strike tuah caan, zing sml 10:00 a tlin hlan in Mandalay khuapi zalam thluan ah minung, cycle le motor zong aa chawkmi an um ti lo, tiah tualchung mi hna nih an chim.

Zing sml 8:00 hrawng in zalam cungah mi zeihmanh an chuak ti lo. Dai tein anmah le inn cio ah an um i SAC a dirkamhtu sipin zung rianṭuantu hna lawng lam an zawh, tiah Mandalay khua ummi hna sinin theih a si.