Chin miphun tamnak Indianapolis khua a hrawknak ding kong cu Pathian nih Kawlram nu a ruah tak ahcun Indianapolis khua a ummi Kawlram mi kan sualtuk ruang zongah a si ko lai.

Indianapolis khua kong biaphuan
Chinmi tampi nih Pathian nih bia a ka chimh/a ka ruah a timi pawl hi kan zum set hna lo nan kan buaipi huam ngai fawn. A zummi kan um bang a zum lomi zong kan tor ve. Asinan kan za tein kan i thlak dih hna. Thla linak thla, April ah Pathian nih Indianapolis khua cu a hrawh dih lai tiah a ka chimh a ti, Kawlnu maw si Karen nu maw Kachin nu dek. Lainu zong a si kho. Thil pakhat kong kan buaipi mi, kan umsia a rem set lomi cu ttha tein hlat ve a hau.

A chim tunu a rian le a umnak khua le a miphun hei ti pawl mu. Mah hlan ah teh Pathian nih bia a ruah lengmang hnga maw hei ti pawl. A ruah lengmang a si ahcun a chimhmi le a ruahmi poah an hman dih maw ti pawl zong amah hal dih a hau. Pathian nih bia a ruah bel lo i atu lawng a si ahcun a hmanmi a si kho ve. Pathian nih bia a ka ruah tiphun a uarmi hi an tam ngai ve. A hman fawn lo, a cang bel fawn lo hei ti ko uh sih. Asinan cheukhat chimmi le phuanmi pawl cu kum tampi hnu zongah a tlung kho ve/a cang ve ttheu a tak in.

Chin miphun tamnak Indianapolis khua a hrawknak ding kong cu Pathian nih Kawlram nu a ruah tak ahcun Indianapolis khua a ummi Kawlram mi kan sualtuk ruang zongah a si ko lai. Minak miphun maw siloah mirang an sualnak kong a si ahcun Kawlram nu cu Pathian nih a hman awk a si lem hnga lo ka ti bia. Cucaah cun mah nu biaphuan kha a hman ko ahcun Kawlram mi, Indianapolis khua i a ummi pawl sualnak ruangah Pathian nih hrawh a timh hi a si kho ve.

April thla ah a ti tik ahhin April thla in a thok lai i kum 2/3/4 tiang chung zong a rau kho ve a hrawhnak ding ah. Hmakhat lo pi ah a hrawh dih lai tinak zong a si lem lai lo. April thla chung bak ah a za tein a hrawk dih lai tinak a si theng lai lo.

A hrawh dih lai a ti tik ah ruah dingmi cu a phun2 rawknak a si kho ve. Kan nih thinlung le ruahnak le mit-thlam ah a ummi hrawhnak cu inn le lo le minung vialte an thi dih lai i an rawk dih lai ti lawng khi kan hei ruah cu. Hrawhnak cu sipuazi lei in a si kho bantuk in minung zawtnak zong a si kho, misual an karh kho i um ngam lo tiang in sualnak a phun2 a tlung kho, company te hna zong thial dih khawh a si fawn i khuacan ttha lo zong a tlung kho fawn.

Fimcawnnak lei zong a rawk kho fawn. Chin miphun lak zongah nu le nu, pa le pa i umh ti bantuk le biak-inn pumh huam ti lo ti bantuk rawhnak zong a si kho fawn. Chin miphun lak ah a phun2 in i rem lonak le i ralnak zong a si kho fawn. Mah ruangah rawhnak kong hi a phun2 in hrilhfiah khawh a si ve. A chimmi tampi ka ngai ve lo nan ka ngaimi chungah cu bantuk theng tein a hrawh dih lai ti a tel rua lo ka ti.

Cucaah cun mah biaphuan a buaipi mi pawl nih ttha tein hei hlat ko uh ka chim bantuk tein khan. Pathian nih bia a ka ruah ti a hmang lengmangmi a si bel maw ti le a rak chimmi pawl teh an hman tak maw ti pawl. A rian zong hei hlat chih uh. Amah teh Pathian lei ah zeitluk in dah a pemi a si ti pawl zong.

Cun a hnulei in fialtu hna a nei sual maw ti pawl zong. Fialtu le forhtu hna a neih ahcun Indianapolis khua i a ummi Chin miphun le Kawlram mi an thinphang seh law ti tthihphaihnak zong a si kho ve, i thial dih hna seh ti duh ruah zongah a si kho ve. A dang a um kho vemi cu Kawlram mi nih Indianapolis i a ummi Kawlram mi nan sual tuk kha an in hmuh tik hna ah an ziaza i remh hna seh law an nun i sersiam deuh hna seh ti an duh bia zong a si kho ve. Tha tein hlat uh law a tha lai, nan buai pah ruangah ti bia.Crd.Van Tum