Chin le Rakhine ramri hrawng Ralhrang pawl cu AA nih a nawr thluahmah…

Chin le Rakhine ramri hrawng Ralhrang pawl cu AA nih a nawr thluahmah…

Tu kum zong, Rakhine ralkap AA pawl nih Kawl ralhrang an von doh thawk bakin, MAL ralbawi zeimawzat an hrilh khawh hna. Raap battalion pakhat lebang tlau lakin an nawr khawh, ti si.

Matupi District chung, Paletwa Peng TaanṬhawng khuate i ralkap tactical command center pakhat zong nizan ahkhan, kiing viar in an zaam cang, ti si.

TaanṬhawng khua cu anmah lei auh-ning cun, TaanṬawng ti in an kawh. Milu 2,000 hrawng umnak khuate si i Paletwa le Rakhine ramri, ramkulh pahnih ipehtlaihnak ah a biapi ngaimi khua le hmunhma a si.

TaanṬhawng hrawngah cun kan unau Daai phun an tam. AA le CDF-Daai cu ralhrang dohṭi dingin ṭanṭi-ikomhnak an ngei.

2019 lio ahkhan, zinglei ar khuan hlan deuh ah, TaanṬhawng khua cu AA nih an rak luh hnawh. An khuabawi pa le an palik bawi bik an tlaih hna i ramlak ah an rak ikalpi hna.

Khuabawi pa cu “Kawl raap pawl sinah thawng na pek” ti ruangah; sakhan hmu cu “palik hriamnam pawl a pek duh hna lo ruangah” ti in an rak ihruai hna cu si.

Laimi zong nih heh tiah rak au le rak khuan si i AA nihcun an rak thlah ṭhan hna.

Tutan AA nih Kawl raap sakhan pawl an lak hna ning ah cun, a tlaangpi cun, an ralbawi deuh thah hmasa khawh an izuam.

 

An ituk an doh cang tikah, Kawl raap pawl cu an sakhan in leeng an chuak ngam ti lo. Cu raap pawl ei-din awk a va phurhtu raap helicopter thlak khawh an izuam.

Raap pawl cu ei awk an ngeih ti lo ahcun, an zaam in an ṭio viar hau ko cang.

TaanṬhawng khua an tactical command ah cun raap zakhat hrawng an um. Palik 20 hrawng an si lai, ti si. Cu pawl cu ei-din awk an chaan kho ti hna lo.

Tikah, nizan ahkhan cun, an sakhan chungah pakhat hmanh an um ti lo. An zaam viar cang ti in khuami nih an va hmuhtheih hna.

Zei ruangah an zaam, zei tik set ah an zaam ti an thei hna lo. Zaan ah a thli tein zaam dih hna sehlaw, a dawh tiah an ti.

CDF-Daai sinah a zaammi raap pathum cu CDM an va lut.

Kawl raap pawl cu an buu ah um ti lo i cuti sihal bang an zaam tikah, Daai khuate pawl cu ralrinnak an ipe. Khuate kipah an lut lai i an fir an boh hna lai, an sa an seh hna lai ti an phaang.

Chinram le Rakhine ram ipehtlaihnak ah a biapi bakmi, Kawl raap ca zongah “strategic location” hmun rem TaanṬhawng hrawnghrang cu AA nih ai huum khawh ve cang tinak a si. Crd-Salai C Alexander

Be the first to comment

Leave a Reply

Your email address will not be published.


*