Cheu hra cheu khat le thawhlawm tangka hriamnam cawknak ca i thawh ding ti cu zapi zaran ca ah ruah awk le biakhiah awk ah a fawitemi a si lo.

Dothlennak le Khrihfabu thawhlawm.Nai hrawng cu US le Canada lei Lai khrihfabu hna sin ah dothlengtu phu hna nih hriamnam cawknak ah cheu hra cheu khat le thawhlawm halnak kong a linsa pah rua.

Cu kong he pehtlai cun saya Rual Uk nih lungtling lo ngai in a chimmi bia kha ka fanu pakhat nih a ka kuat i, “Zei tin dah na ruah” tiah a ka hal.

Khel khat lei ah Dothlengtu phu hna lei a ṭangmi cheukhat nih Khrihfabu cheu hra cheu khat le thawhlawm kha dothlennak ca ah thawh a duhlomi hna kha sual phawt tlerhkhonh phun in bia a chimmi an um.

Kannih Lai mi cu biaknak kong ah cun bible ca chung ah fiang tein a langhterlomi kut bengh le bengh lo, Hallelujah au le au lo kong hmanh ah bu aa ṭhenmi kan si.

Cheu hra cheu khat le thawhlawm tangka hriamnam cawknak ca i thawh ding ti cu zapi zaran ca ah ruah awk le biakhiah awk ah a fawitemi a si lo.

Democracy phung ah cun mi tam deuh duhnak kan zulh bantuk in mi tlawm deuh duhnak zong hi kan ruah piak ve hna awk a si an ti tawn kha.

Mi dang zumhnak le pomning hi kan cohlan khawh lo zong ah i upat piak cio a herh.

Cheu hra cheu khat le thawhlawm tangka pawl hi hriamnam cawknak ah hman a duh lomi hna nih hin ralzam le thaithawh zanriah ca ah van a sangmi hna bomhnak ca ah cun an al men lai lo. Khua hi kau deuh in ruah a hau. Mah duhning in a um lomi poh tlerhkhonh le ṭhihphaih cu kan i tinhmi Democracy phung he zong aa kalh ṭung.

Dothlengtu hna hi khua mi hna a ṭhenṭhektu kan si lo ding hi faak deuh in kan i ralrin a herh ko rua. A bik in, tuahsernak lawng ah si lo in bia chim holhrel zong ah hin kan i ralrin deuh a hau men lai.

Dothlennak lamthluan hi a tawi lai le a sau lai chim awk a ṭha lo. Mi tlerh khonh lo in an lung fianh khawh tu hi kan i zuam deuh awk a si.

Ram leng um barawh zat lo Lai mi hna hi biaknak le ramkhel ruang ah kan ṭhencheu sual hna lo ding hi a biapi hringhran.

(Khrihfabu thawhlawm kha hriamnam cawknak ah a kan petu an um ah cun lung lawm tein co hlan ding. Khrihfabu thawhlawm kha hriamnam cawknak ca i thawh ding ah hna a tlalomi an um zong ah an zumhnak le an ruahnak zong kha upat piak a herh ve.

Hriamnam cawknak ca ah Khrihfabu thawhlawm tiang hmanh kan hal ngam hna ah cun NUG hi tah kan hal ve hna awk a si lo maw? CNF he hnatlaknak a tuah hmasabik an si ṭung…

Dothlengtu hna hi mi funtomtu si khawh lo hmanh ah mi ṭhenṭhektu si sual lo ding hi a biapi hringhran ko)A Ruang
13/03/2023