Cawn awk tlak Falam lungput

Falam kan unau hna nih Rev. Dr. Hre Kio le Dr. Tluang Cung Thang an conglawmh hna ning le an cawisan hna ning hmuh tikah uar an um tuk. An caah ylthiltha a tuahtu mitha cu kokek an si le silo zoh loin upat an phut zat in upat an pek hna timi fiang tein hmuh khawh a si.

An cawisan hna i dawtnak an theihthiam caah Rev. Dr. Hre Kio le Dr. Tluang Cung Thang zong an i lawm i Falam cung ah dawtnak an ngei chinchin ve. An chuah semnak an khua nak hmanh in Falam cung ah siaherhnak le dawtnak an ngei deuh lai. Dawtnak kha dawtnak in an lehrulh khawh caah a fek bikmi tlaihchannak a chuak tawn.

Kannih Hakha le Thantlang lei cu dawtnak he thiltha a tuahtu hna kha conglawmh ‘appreciate’ kan hmang hna lo. Pakhat nih dawtnak lungthin tak in thil a tuah hmanh ah ‘pakhat khat ngah a duhmi a um caah a si ko lai cu’ tiin lunghrinh in thangchiat kan hmang. I lawmhpi kan hmang lo, a hlawh tling deuh poah kha doh le ral kan hmang. Thil tha tuah tikah appreciation hmanh ngah loin thangchiat lehlam i huah ton a si tikah thiltha tuah aduhmi zong an tha thawh lo caan a tampi lai, cucu miphun kan sunghnak nganpi pakhat a si ve.

Pathian zong nih a kan dawt caah a kan dawtnak kan theihthiam ’appreciate’ ding kha a kan duhpi, a dawtnak kan theihthiam lo caan ah ai lawm ve lo. A sermi minung cu kan tling lo caah thiltha tuah caan ah conglawmh a duh tukmi kan si hna.

Tuhnu cun Falam kan unau lungput hi i cawn ve cang u sih. Hnahchuahnak lungput hrial in conglawmnak ‘appreciation’ tu hi hmunhma pe deuh cang u sih — kan thancho deuh nak hnga.Crd-Salai Lungthli Tum

Be the first to comment

Leave a Reply

Your email address will not be published.


*