C. Ronaldo. Kum 18 hrawng lawng na si nain Premier league players pawl cu a kuaih in na rak kuaih dih hna.

Goodbye Ronaldo!2003, pumpululh chuih ka rak zohka hrawng in ka vawikhat hmuhnak ah ka rak uar colh mi C. Ronaldo. Kum 18 hrawng lawng na si nain Premier league players pawl cu a kuaih in na rak kuaih dih hna. Na ke le pumpululh aa ton cang ah cun zei bantuk magic dah a kan hmuhsak lai tiah kan rak in zoh. Kum saupi kan mit tlei lak in na kan hmuhsak! Nangmah ruangah Man U ka rak ṭanh tuk ve.

Real Madrid ah naa ṭhial. Nangmah bantuk in a thiam mi Messi he zuamcawhnak hmunkhat ah nan vun i celh cu vawleipi mit nan si. El clasico kha vawlei dongh tiang nanmah chan lio tluk a um ti lai lo dah. Premier league cu Bawi bantuk in na chuahtak hnu in Laliga ah Siangpahrang bantuk in na lut i, Messi he Uknak laak nan i chang.

Hmunkip ah na nehnang an dawi. Champions League na nehnang “most goal” le “most assist” lebang fawibai ah an hnawt kho lai lo i, Laliga na goal ratio (1.07; 450 goals and 131 assist in 438 games) zong hi naa celh zat hnarcheu hmanh i celh hna sehlaw an hnawt kho lai lo. Na chuah hnu in atu tiang Premier league player in Ballon D’or a co khotu cu nangmah lawng na si rih ko. Na laksawng don le na record ṭial zat hi kei maths (kanaan) thiam lo nih ka rel cawk lo.

Na kum a hung upa i naa celh ning na thlen hnu zong ah zoh na nuam rih ko. Na special-nak na lu, na keh le orh hman na thiam ning cu naa celhpi hawi nih an chim. Media nih na thawngpang ṭha le chia dawi an i cuh. Caan nih tlaih khawh sihlah na caan a liam ruangmang cang. 2022 World Cup cu lung siaherh buin mitthli he na thlah i, na thiam ruangah a’n huatu hna zong atu tan cu an lung ṭha ve lai lo dah ka ti! Vawleicung arfi ngan bik cu ram ca pumpululh chuih zuamnak in a liam ni si lai tiah kan ruah cio.

Pumpululh chuih na thiam ruangah kan uar tluk in sifah harsatnak in chuah naa zuamnak tuanbia ka rel ah kan upatnak a zual. Na lungput bantuk rak pu ve cio usilaw hi bantuk lawng kan si hnga lo! Ṭhangthar mino caah idol na si i, football tuanbia ah a thiam bik pakhat na si pin ah mi tampi ca ah G.O.A.T na si. Media pressure nih na caan donghlei WC ah faakpi in an nam nain mi lungṭhawng na si caah na lungput an thleng lai tiah ka zum lo.

Zei bantuk poh va siseh kum 37 tiang football tuanbia na ṭialmi hmanh hi biaknak ngei lo ca ah pathian tluk in biak tham na si cang. Ka chan chung ah nangmah bantuk football arfi ceu ka hmuh caah hin Pathian sinah kaa lawm. Ronaldo aw, liam ruangmang ko kun law.Crd-Tluangaa Zathang

Be the first to comment

Leave a Reply

Your email address will not be published.


*