Buai huam hlei thang’ tiah brand minthar pek kan i huah nak hnga lo

Copy hi fir phunkhat a si, hohmanh nih thazaang pek awk a si lo. Nain, minung a ting leng a ummi miphun kan si ve caah copy hi zeitik hmanh ah a tlau thlu kho lo timi kan i fian a herh.

Phone zong ah company nganpi a simi Oppo, Huawei te pawl nih iPhone design an i copy cio ko. Samsung le iPhone zong copy timi ruang ah taza an rak i cuai bal. Gucci le LV te pawl zong an copy cio ko hna. Kedan ah Adidas le Nikki zong tor le cheng in copy an tong ve. Software minthang bik Microsoft hmanh khi Laimi 80% nih cun phaisa pek in original kan caw kho lo, copy kan hmang dih hna – keimah telh in.

Cun, brand thil kan cawk tikah a design le a quality nakin a logo deuh kan zoh. Brand logo khi kan cawk hnawh bikmi a si. Aidii khi Laimi lakah a cuang hleimi brand pakhat a si caah midang nih a design an copy len ko zong ah Aidii logo an copy lo ahcun Aidii caah a poi tukmi a si lo, zohchia tuk in buaipi lengmang a phumi a si lo. Copy awk cu a si ve lo nain.

Aidii hi Laithil cawisangtu brand pakhat a si, thazaang pek cio ding cu a si. A ngeitu Anna zong uar a um tuk, upat awk tlak nusaltha a si. Zapi nih zohchomi Laithil brand pakhat ser khawh hi a fawimi a si lo, teimaknak le i zuamnak tam tuk a herhmi a si.

Nain, kei Aidii kong ka theih hi a cuang khunmi Laithil brand timi lawng si loin Facebook ah copy kong ah mi he an i siknak le an buainak kong tuletu ka theih lengmang. Kan mipi tampi zong nih ‘Aidii hi i sik le buai a huam ngaimi brand’ tiin an i cinkeng te sual lai ka phang. Laithil a uar lem lomi nih cun atu buainak thawng in Aidii min an theih thawk a si lai, an lungthin ah ‘abuaimi Aidii’ tiin an thei te lai.

Copy cu thildik a si lo, thazaang pek lo ding. Hrial i zuam ding. Hrial kho loin a copy tu zong an um pah ko lai, a tling lomi vawlei a si caah a si. Brand pakhat nih a herh lo tiang in copy kong buaipi lengmang belte cu a dik tuk ve lo, ‘buai huam hlei thang brand’ tiah minthar pek i huah khawh a si.Crd-Salai Lungthli Tum

Be the first to comment

Leave a Reply

Your email address will not be published.


*