Breaking News.Hakha Cawbuk Check Gate Ah Kahdohnak Chuak

Breaking News.Hakha Cawbuk Check Gate Ah Kahdohnak Chuak

Thantlang SAC kuttang palik sakhan cu Chin ralkap nih an laak hnu in nihin February ni 9 zanlei ah Hakha Cawbuk sang um SAC ralkap check gate ah kahdohnak a chuak, tiah theih a si.

Tualchung mi pakhat nih, “Chuncaw kan ei dih hnu zanlei sml 1:30PM hrawng ah Cawbuk check gate ah kahdohnak a chuak. Meithal thawng le bomb thawng lawngte a than caah kan rian zong kan ngol i kan ṭin dih hna,” tiah a chim.The Chin Post

Thailand Ram Bazar Ah Thil A Zuartu Myanmar Rammi 11 Le Malaysia Kal Aa Timmi Myanmar Rammi 36 Tlaih An Tong. Thailand ram khuapi Bangkok ah minthang ngai a simi zan chawzuarnak ah thil a zuartu Myanmar rammi 11 cu February ni 7 zanlei ah tlaih an tong, tiah theih a si.

Myanmar rammi cu roti le kebab changreu a zuartu an si i, Thailand Lah Wah Kah palik zungukbawi hna nih khual bantukin thil an i cawkter i an tlaih hna, tiah theih a si.

Thailand ram bazar ah Thailand rammi hna lawng nih thilzuar khawh a si i Myanmar rammi hna telh in ramdang mi nih thilzuar khawh a si lo, tiah theih a si.

Cu ṭhiamṭhiam in Malaysia ah kal aa timmi Myanmar rammi 33 le agent 3 cu Thailand ram thlanglei Banglam pengkomh ah Thailand nawlngeitu hna nih an tlaih hna, tiah theih a si.

Myanmar rammi 33 le agent 3 cu Banglam pengkomh hmunthur hlonhnak kudawng ah caan karlak chung umnak ah an hman i February ni 8 zinglei ah tlaih an tong, tiah theih a si.

Tlaih a tongmi Myanmar rammi 33 cu minung pakhat ah Baht 45,000 cio an agent an pek hna. Thailand nawlngeitu hna nih zeitindah dantatnak an pek hna lai ti cu hngalh a si rih lo, tiah theih a si.

A luancia February ni 4 lio zong ah Malaysia kal aa timi Thailand ram ah a lutmi Myanmar rammi 50 hrawng zong Thailand le Tanintharyi ramri Kawlat ah Thailand ramri hngaktu ralkap nih an rak tlaih hna, tiah theih a si.The Chin Post