Laimi nih Pathian kan biak tikah hin a ningcang ah kan i el tawn. Cucu biakinn chung ah kan cawlcangh ning kong ah a si. Khua tampi ah cun laam le aukhuan ai ziakmi (a hmang mi) kan si. Hnathiang tein Biakinn chung caan hman a duhmi le caan rikhiah chungah ningcang tein biak a duhmi kan um ve.
A zei deuh hi Pathian duhmi a si ti cu fiang in kan hngal lo nain kan nunlam a tluan nakhnga lam khat khat cu zulh kan hau. Kan i ziak mi le kan hman mi ningcang nih kan thlarau nun a thanter ahcun cu ningcang cu kan zulh le kan hman ah a tha ko.
Ka fapa hi Mizoram Thingsai khua ah tangkhat a kai ta ve. Mizoram cu ngakchia hi sianginn ah chuncaw dangh an si. Aalu haang le Kalape haang deuh hi an toih hna i khim tein an ei. Ka fapa cu darkeu loin ei a thiam lo. Mizo ngakchia tete cu an kut tein an ei dih. An sayama nih ka fapa cu darkeu a rak hlanh i khim tein a ei ve. Cucu kan innpa nu nih a theih i “Nan fapa hi hawi sining ai hrawm ve a hau, a kut in eiter ve uh. A hawile vialte kut in an ei lio ah nanmah fa lawng darkeu ei cu a phung a si lo” a kan ti. Thaizing cu an sayama nih “Darkeu nan i ken dih lai. Nan kut a hnawm tuk le darkeu rawl ei hi nan cawn cio lai” a ti diam hna. Kut hnawm mi ngakchia nih kut in an ei nakin darkeu in an ei ah khan an caah damnak a si deuh.
Kawlram ah darkeu in kan ei lio ah India nih an kut in an ei. Cu lio ah Tuluk nih fung in an ei. A biapi mi cu khim lak in rawl ei kha a si ko. Kut maw a tha bik, darkeu maw fung dah? Kanmah ei ning a tha bik ti usihlaw thil buai a chuak kho. A biapi mi cu rawl khim te ei khawh kha a si ko. A zaangkhai deuh mi le kan nunnak caah a him deuh mi ningcang tu ithim kan hau ko hnga.
Hmun tampi ah cun kan hman mi biakining nih kan nun a thah tawn. Kan uarmi Pathian biakning kongah khat le khat bia i el i Khrihfabu chung buainak tiang a chuak tawn. Cucaah kan damnak a simi Pathian biakning kha hman khawh kan i zuam cio awk a si.Crd.Rev.Tial Uk
Leave a Reply