Bawipa nih a kan pumh țhan te ko lai

Tlikzam caan le thuhnawh caan a sau. September thla cun kum khat a tling cang lai. A sau kho rih ko; a thla le a kum in chim awk țha lo. Zeizat caan le zeizat kum hmanh rau ko seh Bawipa nih a kan pumh țhan te ko lai.

A caan ahcun kan ruahning nakin Bawipa hi a tlai deuhmi a lo tawn.

1. Ral nih an det cuahmahmi Siangpahrang Saul ruahnak ahcun Pathian minung Samuel kha a rak tlai tuk cang. Pathian a hngak kho lo, amah tein raithawinak a tuah caah a cungah Pathian thin a hung.

2. Ța fangkhatte a ngeimi Mary le Martar caah cun Jesuh Khrih kha a tlai tuk cang. Minung mithmuh ah tlai ko hmanhseh, Bawipa a cawl tikah cun an mithi kha a thawhter ko.

Baibal rel ta usih.”Kan pumh hna caan a phak tikah cun inn ah kan tlunpi hna lai. Nan vanṭhatnak kha kan pek ṭhan hna tikah, Vawleicung mi vialte sinah minthannak le thangṭhatnak kha kan hmuhter ṭhan hna lai i cucu nan mit in nan hmuh lai. Hi bia a chimtu hi Bawipa a si.” Zephaniah 3:20 Crd-Biak Mawng

Tuah Ding Genesis 2:16 Mipa cu a thawh i, “Dum chung i a ummi thingkung vialte hi an thei na ei dih ko hna lai,” a ti.

Pathian nih mi pa sinah a hmaisa bik i a pekmi nawlbia a si. Pathian nih a dawt hring hran. Dum chung thei hi tampi dawh a si. ‘Vialte ti le na ei dih ko hna lai,’ ti nih hin a langter mi cu a tammi a si.

Dumchung ah thei a umtertu hi Pathian a si. Mipa caah ril khimnak. Mipa ca ah thazaang umnak. Mipa caah lawmhnak, mipa caah numhnak petu thei an si dih ko. Numhnak hi a lenglei in kan tincomi nih a kan pek khawhmi a si.

Pathian nih hmaisa bik ah pekmi Nawlbia hi ‘TUAH’, ti a si. Thei hi ei ko hna, ti a si. Fial a si. Pathian tinhmi cu dum kha thlawh le ven. A chuahpimi thei zong ei ve kha a si.

“Tuah” fial hi dawt caah a si. Riantuan hi damnak a si. Hlanlio ah kan ruahmi cu “Eden dum ah Adam nawl ngaih lo ruang ah rian hi kan tuan, nawl rak ngai hna seh law rianttuan hi a herh hnga lo, ti a rak si. Nang na si ve maw cu! Pathian nih rianttuan ding hrimhrim in a rak kan sermi kan si ko.

Atu ahcun “Rian” ngeih hi thluachuah a si, ti ah ruah a si cang. Rian ttuan ah Hmai a panh. Rianttuan ah mit kuh a thaw. Rianttuan ah paw a khim. Rian ngeih cu mi nih hngar a si cang. Rian kan ti tikah mah le sining in tuanding ngeih kha a si ko. Pastor ka si caah phungchim rian hna ka ngeih ah kai lawm. Rian fial awk tlak hna i an ka hmuh hi kai lawm. Thiltthit rianttuanmi zong thil tthit awk a ngeih kha a thluachauh a si.

Pathian nih mipa rian a fial. Dum thlawh ding le ven ding a si. A chung in a chuakmi thei zong ei ding in nawl a pek. Tuah ding fial a si. Pathian Nawlbia ah him “tuah” ti hi a sunglawi. Bil Hmung

Be the first to comment

Leave a Reply

Your email address will not be published.


*