“Bawipa Jesuh tiah auh cu mising ko kan lo Jesuh”

Nihin cu Bawipa Jesuh thihni, Good Friday a si . Nizaan ka facebook memory pawl ka zoh than hna i Bawipa Jesuh kong tampi ka ruat.

Bawipa Jesuh hi biatak in ka rak crush, ka uar tuk. Cutin ka ti ah cun ninghngal tuk le Bawipa Jesuh zeirel lo tuk hna ah a ruat mi nan um ko lai. Ka sining te a si. Bawipa Jesuh ka crush nak kong hi 2020 i ka rak chuah mi Rampangpar biazai cauk chungtel “Bawipa Jesuh tiah auh cu mising ko kan lo Jesuh” ti mi ka biazai series pawl ah a rel bal mi nih cun nan hmuh khawh pah ko lai.

Bawipa Jesuh hi zeibantuk minung dah a si hnga ? A pa Joseph hi Lehtama a si caah Jesuh zong nih a rian a chan lai tiah ruah a si. Nain lehtama tha, a zungkim mi a si le si lo tbk, a no lio ah zeibantuk dah a si lai tbk bible ah tampi kan hmu kho lo. A tleirawl lio cu Pathian hmai le minung hmai ah mithmaitha a hmu ti cu aa tel. A si nain a tlanval hnu kum 18 in kum 30 karlak i a personality hi zeitin a si hnga ti bible ah ka hmu kho lo. (Tam deuh thuk deuh in ka rel lo ruang zong ah a si kho. A dangdang scholar nih an tial mi tampi rel ka duh rih. Bible sianginn ma ka kai hnga ti hna ka lungchuak tawn mah te in cun carel aa huam pah lo i Zeiruang ah kum 30 tiang single a si? Nungak hna a rak helh bal ve hnga lo maw? Ti te hna khi ka ruat tawn.

A Tlangcung cawnpiaknak pawl ka hun rel in a rak chim mi parables tuanbia hna chung in Pathian bia a hrilhfianh dan, tahchunhak a lak dan hna le a hnuzul hna nih an complain caan ah siseh, a mah a zum lo mi hna nih an test caan pawl i handle a tuah dan, a leh hna dan, cun mi thleidannak a ngeih lo dan, dawtnak a langhter dan, a bia bang in a nun dan tibantuk hna khi ka uar khun.

Bawipa Jesuh hi zeibantuk mino dah a rak si hnga? Lady Gaga hla “Judas” MV i Bawipa Jesuh a suaisam dan te hna kha a herh ngai mi a si tiah ka ruah. A dangdang movie tampi zong ah Bawipa Jesuh hi an suaisam ning aa dang mi tampi in a um len ko. Nang le kei zong nih kan khuaruah dan a phunphun in mer in Jesuh kong hi ruat chun hna usih. Boomer, Gen X, Gen Y, Gen Z, Gen Alpha ti in kan chan cio ah hin Bawipa Jesuh hi suaisam chunh hna usih law a ruahnak a thinlung put hi a chan lio he khan aa dang hnga? Kan mah kan chan le kan ruahnak chung lawng ah Bawipa Jesuh hi kan khumh sual tawn maw? Kei cu zei bantuk chan a si ah aa tlum kho lai i aa update kho peng lai tiah ka zumh.

Bawipa Jesuh cu Pathian Fa a si nain minung bantuk in a rak um a rak tlawnleng. Minung a sinak le Pathian fa a sinak hna ah amah le amah conflict hna a rak ngei ngai ko hnga lo maw? Bible ca ah tampi aa tel lo nain Gethsemane dum i thla a cam zaan nih zeitluk in dah lungretheih vansaan in a um kha fiang te in a lang. A ṭih tuk, a phan tuk bu in a dawtmi hna caah tuah a herh mi rian a tuah, ṭihnak he a pah chih mi tu a rak si. A tu lio kan boruak he CDF, PDF hna ka lung ah an hun chuak.

Bawipa Jesuh thawngtha chim rian aathawk kum 3 hnu ah vailamtah ah an thah. Ni 3 hnu ah a thawhthan caah a tu ah cun Good Friday tiah kan ti khawh ko nain cu lio ah cun Jesuh a nu Mary a lungkuai ni a rak si. Ka rak rel bal mi Pu Hrang Nawl tial mi “Ka Zahpi Lo” timi cauk i Jesuh Vailamtah an tahnak a tial mi cheukhat ka lung ah an chuak. Chirhchan ding ah rel nolh than ka duh ngai nain ka pawng ah cauk a um lo. (Kan bialak ah mah cauk ka rel hnu in lai ca hi ka thiam bak lo ka ti peng ko buin ka tial khawh pah ko tiah kaa rak iruah mi kha a ka hloh piak dih. Ka thiam lo lawlaw bak a rak si ti kha kaa fiang tuk. Laica kaa uar pi khun i thiam chinchin ding izuam ding thathawhnak (motivation) zong tampi a ka pek.)

Jesuh a nu kong ka ruah ah hin ka lung ah a rak chuak mi cu Jesuh hi David hrinsor a si an ti.Tukum chung ah cun Bible ca hi a hramthawk in a dongh tiang rel ning tiah a hram kaa thawk ka a si i Leviticus lawng ka phan rih. Asinain nihin cu Mathai le Mark i Bawipa Jesuh kong tlawmpal ka rel hna. Matthai ah Jesuh chuahkhenak ah an nih cu an nih pa a si, chan khat hnu chankhat aa tial thluahmah i Joseph tiang a phan. Asinain “Joseph cu Mary Va a si, Mary cu Messiah ti mi Jesuh Nu kha a si” a ti fawn. Mary hi ma tin bible ka rel cia mi chung vial ah Pa fa in chan an relnak ah nu min an telh tiah ka hmuh hmasa a si. (Ka palh sual ah cun ka remh hram u). David hringsor cu Joseph a si, Jesuh cu Joseph thisa in hrin mi fa si tung lo, zeitindah David Hrinsor ah an chiah khawh? Mah hi a ruah awk ka rak thei bal lo. Ka pa hal te ding ah kaa chiah. A si nain Chan an hun rel i Mary min Nu min ka hmuh cu vuk ti in kaa nuam. Kei theo hi!

Nihin cu ICBC biakinn ah Good Friday pumh ah kan kal. ABK he cun pulpit lei kal le tlik le lentecelh a duhtuk lio si kaw a mah zoh pah cun phungchim khi ka ngai kho bal lo. Hlasak lio ah cun tha te in a ngeih caah pulpit ah bia chim hlan, phundang in chim cun leng chuahpi a hauh hlan i zapi hlasak caan tibantuk in khan thazaang ka lak bik tawn. Nihin cu saunawn te a hun ituahthiam i Pastor te biachim hna ka ngeih khawh. An bia thwwng in Bawipa Jesuh nih a thisen in a kan tlenh mi a thar in kaa thei than. A rak ttih tuk mi nunak pek lawng hmanh si lo tukvelhnak, taksa fahnak tampi a in. Nangmah le keimah caah. Kei a tu kum 32 ka si. Keimah he tthikhat nawn kan si ah pei an nih a nunnak a rak liam hi ti ka ruat.
Ka nunnak ah kum 32 ka si tiang ah a mah caah zeidah ka tuah cang ti mi a thar in a ka ruah ter than.

Nizaan ka lung a leng. Zaan khuadei dengmang ka memory hna ka zoh, Ka rak ituah ka in nihin tiang kaa chiah mi hnanthlak pawl ka zoh than hna. FB hi 2008 in kaa rak ser. Kum 14 chung ka nunnak buaktlak in ka zoh than ti khawh a si. Ka ttah caan, ka nih caan, ka lungretheih caan, ka tekuai caan, ka ro caan, ka thinhun caan, ka sopawt caan, kaa zumh tuk lio caan, ka lungdongh caan a phunphun kaa zoh than hna. Ramdang ka tlawnnak, kawlram chung khual ka tlawnnak, laitlang khua te lei ka khualtlawnnak hmanthlak hna ka zoh than hna. Ah! Ka nun hi diriam ding si tuk ko lo maw kaa ti. Bawipa ka lawm tuk ka ti. US ka phanh hnu kum 2 chung ah a vawikhatnak bik ka nun ah kaa lungsi.

Kan nunnak ah kan iruah lo pipi in thil a cang mi a tam tuk. Pathian nih a kan timhtuahpiak mi a si/a um kan ti kan hngalh ko bu in lung dai hnangam te in um khawh hi a har tuk (ka caah). Ruahchan mi, uhtanh mi hna sin in theih duh mi bia theih lo caan ko ah hin lung a fak, a har khun.

Nihin ah Bawipa Jesuh nih aka dawtnak a thar in ka theih than. Nunnak pek tiang in dawtu taktak ka ngei. Keimah nih tah a cung i ka ngeih mi dawtnak, upat ttihzahnak, biazai hna ca hna in phuan mi tial mi lawng si lo in, bia lawng si lo in tuahsernak in zeitin ka langhter khawh lai?

Nangmah nih tah zeitin na langhter khawh ve lai? -Aidii April 15, 2022
(Good Friday)

Be the first to comment

Leave a Reply

Your email address will not be published.


*