Atutan AA le MAH an ikap than tikah AA nih Paletwa le Buthidaung/ maungdaw hna hi anraltuknak ralhmai ah an ser

Atulio AA Raltuknak Le Hmailei Kan Ton Khawhmi Buainak.AA nih Kachinram in an tlun hnu ah raltuknak ah ahram anbunh hmasanak cu Paletwa ram a si. MAH le AA can karlak an i theihthiam i, an ikap lo lio ah AA nih Bangladesh he ram an i rinak tlanglei ah hmunhma an khur. AA nih tlanglei ah hmunhma an khur mi hi ramkhel lei ah siseh raltuknak ah siseh, abiapi tuk tiah an ruah caah thlanglei ah hmunhma an khur nak hi asi.

Atutan AA le MAH an ikap than tikah AA nih Paletwa le Buthidaung/ maungdaw hna hi anraltuknak ralhmai ah an ser. Hi hna hmun ralhmai an sernak aruangcu; Buthidaung le maungdaw lei hi hmunhma kan lak khawh ahcun Bangladesh Cozah he pehtlainak tha tein ka ser khawh lai ti khi an ruat. Cun ARSA Rohingya hriamtlaibu hna hi colkhawh loin kan tuah hna lai ti hi abiapi ngai ah a ruat rih. Culawng asi rih loh. Ral kan tuk tikah mipi nih an tuar teh lai i, hika hmun in ral kantuk asi ahcun Rohingya pawl nih an tuar bik lai ti zong khi an ruat chih. Hi hna pawl hi ciammam tein an ruah hnu ah Maungdaw le Buthidaung lei in ralhmai an sernak hi asi.

Kawlram le Bangladesh pehtlainak ah humhimnak lei ah abiapi bik mi ralhrang pawl ‘Sakhan’ lungphum [BP] 40 le adang sakhan pakhat kha AA nih an lak. Hihna Sakhan 2 anlak khawh mi nihhin khika hmun hrawng khi AA control nak tangah atla cang lai ti kha a fiang.

Khika hmun khi AA nih a control khawh ahcun Bangladesh le Kawlram pehtlainak lampi bik kha AA kut ah aphan colh lai. Khelkhat in kan chim ahcun khika hmun khi Bangladesh le Kawlram pehtlainak hmunpi bik asi caah, ‘cu pehtlainak a miak vialte kha AA kut aphan dih teh lai. Hika hmun hi AA caah cun suikhur le lunghring chuahnak hmun bantuk asi. Khatlei ah Rohingya hriamtlaibu ARSA hna zong col khawh loin atuah hna caah politics ah teinak anhmuh nak zong asi chih.

Afiangmi cu; AA nih khika hmun khi a control khawh asi ahcun Bangladesh Cozah nih achawnh colh lai. Bangladesh Cozah he tha tein an ichawnh khawh ahcun a eidin laknak le ahriamnam laknak lampi kha kau deuh in aa onh lai tikha afiang. Cun Rohingya kongah UNO le vawleicung ram tampi hna nih AA kha anchawnh teh lai i, politics ah amiak tam ngai ahmuh teh lai. Chimh duh mi cu hi hna pawl hi tha tein atuak hnu ah khika hmun khi AA nih ralhmai asernak cu asi.

AA nih ralhmai 2nak asernak cu Paletwa ram asi. Paletwa ram ah ralhrang Sakhan zeimawzat AA nih an lak cang. Ralhrang pawl nih an sakhan an ven khawh tilo caah an chuahtak mi zong atam ngai cang. Hi tining hin asi ahcun Paletwa ram hi AA controlnak tangah atla lailoh ti hi chim khawh asi lo. AA nih Paletwa ram in ralhmai asernak hi Paletwa ram hi India/Bangladesh/kawlram hna ram aarinak hmun asi caah hika hmun hi kan control khawh asi ahcun India le Bangladesh Cozah he pehtlainak ka ser khawh lai ti hi aruat. Culawng siloin Asia suikhur asi teh dingmi Kaladan tiva pi hi ka kut tangah ka chiah ahcun lunghring khur neih bantuk asi tikhi aruat fawn rih caah Paletwa ram hi ralhmai asernak cu asi.

Paletwa ram hi AA control nak tangah atla sual asi ahcun afiangmi cu cuhlan vialte India Cozah he an ichawnhkhawh ballo mi kha fawi tein an ichawnhkhawh mi asi..India Cozah nihhin kaladan project hi abiapi tuk ah achiah caah kaladan a control khawh mi bu paoh cu achawnh hrim hna lai. Khatlei ah India Cozah hi aram ah ralzam aduh lo caah control area aser khawhmi hriamtlaibu hna cu anram ah ralzam lo in kanmah ram te ah um hna seh ti hi aduh. Cucaah AA nih Paletwa ram hi a control khawh asi ahcun ralzam kongah India Cozah nih achawnh khawh mi asi.

Ka langhter duhbik mi cu AA nih Maungdaw- Buthidaung le Paletwa ram in ralhmai an ser mi hi.an sipuazii caah siseh, an politics caah siseh. India le bangladesh ram hna he pehtlaihnak tuah khawhnak hna caah siseh, ciammam tein strategy an suai hnu ah ralhmai 2 an hun sernak hi asi.

Zei ava si zongah ka phang ngai mi cu Paletwa ram hi AA control nak tangah atla sual asi ahcun acunglei ka chimmi amiak pawl hi AA kutah aphanh sual asi ahcun AA nih athawtnamnak kha an theih chin lengmang lai i.Paletwa ram hi an kaltak duh lo sual asi ahcun atulio MAH ral kan dohmi nak hin Paletwa ramah kan miphun thisen tamdeuh aluang sual lai ti hi kaphang ngai mi cu asi.Crd-Van Neih Thang

Be the first to comment

Leave a Reply

Your email address will not be published.


*