Atu SAC zong nih state of emergency hi kum 2 lawng a si lai

Hmailei kan ram cuanhnak
A si khomi scenario (hmailei kong mittlam cuantermi) tampi a um, cu lak ah lam thum in kan vun zoh ahcun….

A.Hmai kum 2023 ah Thimnak Election a tuah kho taktak lai maw? Kawlram tuanbiak kan zoh ahcun ralhrang nih aana a lak hnu ah handover a tuah than colh hi a um bel lo, kum saupi hramhram in an kan uk hnu lawng ah thimnak an tuah.

Atu SAC zong nih state of emergency hi kum 2 lawng a si lai Feb 2023 ah a dih lai i cu hnu thla 6 chung Thimank caah timhnak ngeih a si lai i August thla ah Thimnak kan tuah piak hrimhrim hna lai tiah atu le atu TV le media ah a chim peng, ASEAN ah a chim. Thimnak tuah a tinhmi a hnulei ah zei bantuk timhlamnak dah a ngeih hnga asiloah politik in hnu a kir tak taktak lai maw, a letalam in dik, amah maw asiloah a minung tu nih ram uk ding tu dah aa i tinh lai?

2023 February thla ah State of Emergency timi “ayipaw galah” hi kum 2 a tling lai i a biakam bantuk in thimnak tuah khawhnak ding ah NLD i atu lio Acting president Myint Swe sin ah thimank tuah khawh ding in tuanvo hluainak a tuah lai i cu in election commission UEC kha tuanvo an pek lai. Party pawl tampi tel ding le PR system in vote thlak ding in heh tiah mi a lemsawi hna lai.

Ruah lopi in thimanak election zong a tuah khawh i an mah minung kha tamada pek i a hnulei in uk ding in le anmah pawl an him khawhnak le an sipuazi a him khawhnak le an power a hmun khawhnak ah a lam an kawl lai maw? Zei maw zat federal lei in an kan kal pi lai dah asiloah…Asiloah mipi nih vote thlak duh lo le thlangcung hriamtlai le party pawl nih an doh i an khamh ah tah? Anmah lila nih aana an ting than sual lai maw? Nan duh ai lo cu ta ti in Uknak a peh than lai maw?

B.Tlangcung Hriamtlai pawl he remhchunhnak (negotiation) maw, i rem thannak (reconciliation) a tuah lai maw?

Kan hnu May 2022 lio ah sac mah nih tlangcung hriamtlai bu 10 he ton ding in a sawn hna. Cu ah peace talk kai ding in a lung a tling mi hriamtlai bu 10 an um. Cu chung ah bu 7 cu hlan NLD chan lio i kahdaihnak (doh ngolchungnak) NCA min a rak thummi chung in Shan in (RCSS/SSA), Karen in (DKBA) le KNU/KNLA Peace Council, Mon in (NMSP), Rakhine in (ALP), Pa-Oh in (PNLO), Lahu in (LDU) an si. Cu NCA ah a rak i tel lomi bu 3 hna cu Wa (UWSA), (NDAA-Mongla) le Shan in (SSPP). Federal le special self-administered zone/area kan pek hna lai tiah a lem kho hna lai maw? Ramchugn ral i kah le i doh peng ah thatnak a um lo, kaphnih i tei khawh lo in caan saupi ram a rawk kho, solution kawl ti hna usih tiah….hriamtlai bu le Nu Ci (UG) a lem kho hna lai maw?

C.Thimnak tuah khawh lo le Remnak tuah khawh lo ah tah?
Thimnak (election) le I rem thannak (reconciliation) kong a tlawmpal a cung ah a langcang caah peh ti lo in. Hi thil pa 2 hi tlamtling hlah sehlaw tah?
Hriamtlai bu le tlangcung party pawl nih thimnak a si khawh lo ding in an khamh lai maw?

Khamh hna sehlaw ralhrang nih nan duh lo cu ta tiah hramhram uknak a peh zulh sual lai maw?
Ralhrang nih thimnak kan tuah piak hna nan duh lo nan do nan khamh caah kan ram ah dainak a um lo power le security hi tuanvo kan lak rih lai tiah caantha i lak in uknak a peh sual lai maw? Cu ti a si ah tlangcung hriamtlai bu le Kawl mino hriamtlai le Nu Ci (nug) nih tah federal ralkap ser in lungrual in an doh kho lai maw?

NCA min a rak thumi bu 10 le 1989 lio minthu mi wa uwsa, le kahdaihnak NCA min a thu lomi KIO, TNLA MNDAA le AA te pawl aa fonhmi Northern Alliance timi le mipi cozah Nu Ci he zumhnak an ser kho lai maw? Kum sautuk tuarnak a inn mi tlangcung mi le kawl mipi cozah he zumhnak an ser kho lai maw? Atu bantuk in a pikpak in Chin, Kachin, Magwe, Sagaing ramtthen le pengtthen lawng ah doh i pengtthen dang pawl vialte ah kahdohnak a um lo i a pikpak in doh peng ahcun thilhar ngai a si lai.

MaH ralhrang doh ding ah mipi ralkap le pdf he aa fonhmi cu EAOs pa li an si i —KIO/KIA, KNPP/KA, CNF/CNA le KNU/KNLA—hna an si. Atu tiang ah anmah SAC ralhrang chung lila in “ma ah la” a duh lomi ralkap minung thongthum leng zong tlangcung hriamtlai le mipi sin ah i an i fonh.

Thazaang, ngeihchiah, ralthuk thiamnak le hriamnam in cun ralhrang hi an thawng ngai rih lai nain David nih maw tei lai Goliath tiah chim ding a har ngai rih. An ngan le an fat kha a biapi lo, Bible zong ah David nih a tei ko. An tei ko hna lai dah? Ramp pumpi ramtthen le pengthen tampi an i tel lo i pikpak cun a har tuk lai maw? Kum sautuk Syria bantuk in kum 10 hnu ah tei lo in ram a rawk dih sual lai maw?

Plan A maw B le C maw D maw E maw zeidah a cang kho? Nang zeitin na ruah?Crd-Sui Hingz

Be the first to comment

Leave a Reply

Your email address will not be published.


*