Apoi kho tuk e.Kalay Ah Naupawi Lio Nu Le A Vapa SAC Ralkap Nih An Thah Hna

Apoi kho tuk e.Kalay Ah Naupawi Lio Nu Le A Vapa SAC Ralkap Nih An Thah Hna

Sagaing ramṭhen, Kalaymyo peng ah February ni 8 zan suimilam 11:00AM ah SAC ralkap nih Pu Ham Mang le naupawi lio (thla 6) a nupi cu an thah hna i mei in an khangh hna, tiah tualchung mi hna sin in theih a si.

“Kalaymyo ah a ummi Pu Ham Mang a inn ah SAC ralkap an lut i naupawi lio a nupi he an thah hna hnu ah an inn he mei in an khangh chih hna. An nuva in meithal zun 15 in an kah hna,” tiah tualchung mi pakhat nih a chim.

Cu ṭhiamṭhiam in Sagaing ramṭhen, Kalaymyo Taungzalat sang Naymyay 7 ah a ummi, Lautu Khrihfabu pastor fapa Bil Thang(kum 19) cu SAC ralkap nih nizan February ni 9 zanlei suimilam 6:00PM hrawng ah an kah i a thi, tiah theih a si.

“Lampi hleidonh pawng ah a ṭhumi tualchung mi pakhat cu a lu ah SAC ralkap nih an kah caah hmakhatte ah a nunnak a liam” tiah min langhter a duh lomi tualchung mi pakhat nih a chim.

Cu pin ah Karen ramkulh, Kawkareik peng Kyudu khua um khuate pahnih cu SAC ralkap nih hriamngan in an kah caah nu pakhat a nunnak a liam, tiah theih a si.

“February ni 8 zanlei suimilam 6:30PM ah SAC ralkap nih Kawkareik peng Kyudu khua um Mikanung le Kyaukhpyia(ကျောက်ဖျာ) khua cu hriamngan in an kah caah kum 60 tluk nu pakhat a nunnak a liam,” tiah tualchung mi pakhat nih a chim.The Chin Post

Bamaw, Shan Chaklei Le KNU Brigade 5 Kahdohnak Ah SAC Ralkap 10 An Thi.Kachin ramkulh, Bamaw peng, KIA Brigade 3 hmunram kahdohnak ah SAC ralkap 10 an thi, tiah KIA he naihniam in a ummi hna sin in theih a si.

Febraury ni 8 zan suimilam 10:45PM hrawng ah Bamaw peng KIA brigade 3 hmunram ah rallam a sialmi SAC ralkap pawl cu KIA Brigade 3 kuttang Battalion 27 nih, lamhruang in an kah hna caah SAC ralkap 10 a hmun ah an thi, 13 nak tlawm lo hliamhma an pu, tiah theih a si.

Cu pinah February ni 9 zing suimilam 8:00AM hrawng ah Shan ramkulh chaklei KIA hmunram Manping khua lei ah rallam a sialmi SAC ralkap cu KIA nih an kah hna, tiah theih a si.

Cu kahdohnak ah KIA Brigade 4, Battalion 39 nih an kah hna i SAC ralkap tam tuk an thi ko nain a thimi zat cu fiang in kan thei rih lo, tiah an langhter.

Karen ramkulh, Dwelu peng Toemayhki khua ah hram a bunhmi SAC ralkap sakhan cu, KNLA nih an va kah caah SAC ralkap 3 hliamhma fak ngai an pu, tiah theih a si.

February ni 7 zanlei suimilam 1:00PM hrawng ah KNLA Brigade 5 kuttang ralkap hna nih, SAC ralkap sakhan cu an va kah caah ralkap 3 hliamhma fak ngai an pu. Cu hnu ah SAC ralkap Jet Fighter pakhat nih, bomb voi thum a thlak pin ah seh meithal in voi 1,000 hrawng kahdohnak a tuah caah khuami inn zong a rawk.

Zanlei suimilam 2:00PM hrawng zong ah MiG 35 nih, Mayway khuami an leihmun le dumchung ah seh meithal in voi 1,500 tluk kahdohnak a tuah i, riahcaw le hriamnam thiltom nganmi 8 zong a thlak, tiah theih a si.The Chin Post