CDF Thantlang Drone cawknak ah bawmh ve ding in AIDII nih lucky draw tuah mi kong ah, thawhbul a tam deuh caah a nicaan a tawi deuh bak, sau deuh in kan tuah piak u law ti mi request tete mipi sin in a um pah.
AIDII nih mipi thilrit khinh chin lo in dohthlennak ah kan tei hlan lo iteltum kha kan itimh mi a si caah, lucky draw ticket cawk ding nicaan kha zarh khat lawng si ti lo in thlakhat chung caan lak ding in a nicaan kan khiah than.
Ticket cawk ni a hnubik kha September 30 in October 22, 2022 ah kan thawn than. Original Post zong ah edit ka tuah cang.
AIDII nih hi Khuapau Dothlennak cu thlikran le thazaang thawnnak nak in teirialnak, lungsaunak le lungthawnnak nih lai a rel deuh ding Marathon tlikzuamnak bantuk a si tiah kan zumh. Cucaah kan thazaang ihrim cio hna usih law teinak hmuh hlan tiang ciamman te in teirial in goaltung phak tiang izuam cio ko hna usih!AIDII
Nunnak Thaw!1Thesalon 3:8 Bawipa chung ah fek tein nan dir ti theih cu kan caah nunnak thaw a si.
Minung nunnak ah a biapimi tampi a um. Kan nunchung cu kan thaw kan dawp. Kan thaw kan chuah. Kan thaw kan chuah ti lo cu thih a si. Kan thaw kan dawp ti lo cu thih a si. Kan nunnak thaw hi zeitluk in dah a biapi ti hi ruah set lo ahcun hngalh khawh a si lo.
Covid 19 in kan hung zawt tik ah a fiang tuk. Covid 19 zawtnak Delta wave an ti lio, third wave ti zong ah timi kha, ruah tthan tik ah a fiang ngai. Oxygen minung nih kan herhmi nak tlawm deuh tik ah kan nunnak thaw a dong. Kan pum zong a tthawng ko. Kan eidin zong tlam a tling kan ti ko lio ah kan nunnak thaw a peh khawh lo cu kan thih a rak si ko. A tthawng ngaimi zong nih tuar a si. Zawtnak tthalo ngei cia le bang cu loh a si ko.
Nunnak thaw hi Pathian nih a kan pekmi a si. Pathian nih Adam kha vawlei in aser i a nunnak thaw kha a hrawmh. A hnarchung ah a thaw a thawt. Adam cu a hungnung. Saram zong nunnak thaw cu an ngei ve. Pathian nih a pek ve hna.
Paul hi Pathian rian a ttuannak ah Pastor a si. Pastor cu cawnpiaktu a si. Pathian an zumh i khamhnak an hmuh khawhnak hnga cawnpaik tu a si. Nihin tiang zong hi Pastor rian cu cawnpaik a si. Khrihfa mi hna nih nifate nunnak ah Pathian duhnak tuah khawh in khamhnakhmuh ding cawnpaik hi a si.
Paul nih Thesalon khuami hna sin ah a chimmi tuzing ah kan relmi hi a biapi ngai. Bawipa chung ah fehte in dir, hi a herh ko. Bawipa kan zumh ruang ah Tipil kan ing. Khrihfabu ah kan um. Kan zumhnak kha fek tein dirpi peng hi a biapi tuk. Timote cakuat chung ah “Demas cu tuchan vawlei he an i duh i a ka zamtak ai (2Timote 4:10), ti kan rel. Zumtu si hnu ah hin Tuchan vawlei he i duh in zumhnak kal tak a um kho ko. A rak um ko. Tuzong ah a um pah tawn ko. Hmai lei zong ah a um khomi a si.
Tuchan vawlei he duh lo in fek tein dir cu cawnpiaktu, Pastor le hruaitu ca ah nunnak thaw a si. Lawmhnak petu a si. Hnangamnak a si. Khrihfa a si cia mi hna nih zumhnak hlawt in pathian dang zuan cu, siasal hna biak tthan cu cawnpiaktu, Pastor caah ngaihchai taktak a si.
Ca reltu, ca tialtu kan nih zong Bawipa chung ah fek tein dir zungzal ko hna u sih. Hruaitu caah nunnak thaw petu ttha kan si, nan si. Pastor thlacamnak cu, zumtu dihlak Bawipa chugn ah fek tein dir i khamhnak hmuh hi a si.Bil Hmung
Leave a Reply