Miphun le Ram Kong Ka Ṭial/chimnak A Donghnak Si Cang Ko Seh! (Hi ka caṭialmi hi ka nun chung kai save lai i Sertu Pathian bia taktak asi ahcun a tling hrim te ko lai)
Ahopaoh nih Chin Miphun le Ram hi kan dawt dih cio nain kan dawtning tu hi a rak idang cio hna.
Carson le Laura hmang in zawng bantukin a nungmi le horkuang le tlangsang cungah khuasami CHIN MIPHUN sin ah Thiang Thlarau Pathian nih a toihnak hi kan lianngantuk ruang, kan fimthiam tuk ruang le kan rumtuk ruang le kan thinlung put a ṭhat tuk ruangah si loin Sertu Pathian vel le dawtnak a lianngan tuk caah a thawngṭhachimtu le a rianṭuantu dingah santlailomi, nekmi, zeiah rellomi kan si nain a kan thimnak hi asi.
Bawipa nih Chin Miphun a kan fialmi cu,1) Chin miphun tefa hna nih Chin ram dihlak ah Jesuh Khrih thawngṭha chim le Khrihfa ah canter hi asi.
2) Chin miphun tefa hna nih Kawlram dihlak ah Jesuh Khrih thawngṭha chim le Khrihfa ah canter hi asi.
3) Chin miphun tefa hna nih kan innpa ram hna India, China le Asia ram pumpi ah Jesuh Khrih thawngṭha chim le Khrihfa ah canter hi asi.
4) Chin miphun tefa hna nih Vawleicung ram/miphun kip sin ah Jesuh Khrih thawngṭhachim le Khrihfa ah canter hi asi.
Cucaah a rian hi ṭhawng ngai le hmual ngei ngai in kan ṭuan khawh nakhnga ram kip ah mupi bangin a kan cawi i “fimthiamnak sang a kan cawnter, business/chawva a kan pek, Bible/Abia a kan cawnter le Thiang Thlarau a kan toih” i kan phut kan tawk lo pi rang taktak in thluachuah a kan pek hi asi.
Hi vialte hi Jesuh Khrih thawngṭha kan chimnak le a rian kan ṭuan khawh nakhnga bawmtu ah hman dingmi asi.
Cucaah kannih kan hriamnaam ṭhabik kan iken/put ding cu “dawtnak le ngaihthiamnak” in Jesuh Khrih thawngṭha hi, hriamnaam in mi a thatmi, lainawn a duh i sualnak a tuahmi hna sin le Khrihfa a domi hna sinah thawngṭha a chim dingmi kan si i hriamnaam le mithah le lainawn dingmi action a la dingmi kan si lo.
Asinain, Satan tukforhnak asimi porhlawtnak le keimah tinak ruangah kan thinlung tlangsang i kan chuahkehnak le kan ratnak hmun kha kan iphilh i Satan bantukin ṭhutden sang ah ṭhut hi kan duh i a kan fialmi rian hmunhma ah ṭuan kan duh ti lo i zumhawk kan tlak ti lo caah lehrulhcham in action kan laak hi asi.
Atu ahcun CBCUSA siseh, Ministries kip siseh, Khrihfabu kip siseh, Pastors le Evans kip siseh, Khrihfabu Hruaitu kip siseh, Singers kip siseh, Bible Sianginn a kaimi kip siseh, Thlacamtu siseh, Thiang Thlarau a co i Khrihfa ai timi kip siseh dingtein an kal cuahmahmi Orhlei lam in an imer i Kehlei lam ah mi tampi an kal!
Cunglei mit hmuh khawh lomi Sertu Pathian zoh ti loin, pawngkam thil le mithmuh khawhmi minung le chawva le mizapi nih dawimi zoh in biachahnak an tuah cio.
Cucaah Bawipa Chin Miphun cungah a dawtmi hna Israel dantat i SAL ah a cawnpiak hna bantukin CHIN MIPHUN zong kan inn le Biakinn a kan khangh biak dih i innpa ram ah ralzaam dirhmun in kan idor i Bawipa nih kum tampi, “3rd or fourth generation” tiang hrawng hi cawnpiak kan si ve lai ka zumh.
Chin miphun tefa hna “3rd or fourth generation” hna nih Joshua le a ralkap nih Canaan ram an lak bantukin Chin Miphun le Chin Ram hi Bawipa nih a pek ṭhan te hna lai i anmah nih hi rian hi a ṭuan te lai caah Chin Ram cu thluachuahnak Bawipa nih a pek te lai. Chin Ram le Kawlram cu Khrihfa ram ah Bawipa nih a thlen dih te ko lai. A thok cangmi rian cu a dih tiang Pathian nih a ṭuan zungzal ko.
Cucaah MAH a nun chung cu ahohmanh nih ṭhutden an chut kho lai lo.
Dawtnak thinlung le nawlngaihnak thinlung tel loin miphun/ram caah thlacammi hna le pastors, evans hna hi Bawipa nih an thlacam a let ti hna lo. “Anmah duhnak tlung ko seh” tiin thla an cam i Bawipa duhnak tlung ko seh” tiin thla an cam lo.
Pathian salṭha hna cheukhat an thlacamnak kha Bawipa nih a philh ve lo i Pathian a khul a nuar. Nain caan sau a kal ti lai lo. Cucaah Bawipa sin ah kir usih! Kan thinlung ṭhum usihlaw, a sunglawitukmi a kan fialmi rian hi kan tuah ahcun a kan zaangfah khawh ṭhan ko dahkaw! Sertu Pathian cu ngaihthiam a duh tukmi asi. (Remnak le daihnak ser caan a um liote ahhin remnak le daihnak ser hna usih)
Hihi Ka Pa, Pathian le a fapa dawt keimah karlak i kan ipehtlaihnak ah ka thinlung dihlakin ka zumhmi bia asi. (Na zumh khawh lo ahcun hnon ko law na zumhning khan thazang chuah ko. Kan zumhnak, ruahnak le hmuhning an idan i ai khahlo ruangah zumtu pakhat le pakhat ai do/ral i ai hua i ai remlo hna dingmi kan si hna lo. )
Pathian biakam le biatak cu duhsahtein nikhat khat ah a tling i a theipar zungzal. A tak asilomi paoh cu thli nih a choih dih ko hna. A ci, a kung, a hnah in si loin, a theipar in zoh khawh le biachah khawh tu kan izuam cio hna lai mu.
Zeizong vialte Sertu Pa Pathian, vailam ah a thisen in a kan tlanhtu Fapa Jesuh Khrih le a zungzal in a kan umpitu Thiang Thlarau nih hi ca a reltu dihlak ah fiannak le hngalh khawhnak kan Chin miphun le ram caah kan pe cio ko seh! Amen!Jamesvannei Lian (February 1, 2023)
Leave a Reply