Adik bak mi si.Ral dohnak ahcun, MAH ralhrang pakhat thah khawh a biapi, MAH ralhrang sakhan lak khawh zong a biapi chin chin.

Chin ram le Chin miphun luatnak ding caah MAH ralhrang a do cuahmahmi Chin ralkap vialte, Bawipa nih in umpi ko hna seh. Kan ral, MAH uico hna nih Van le Vawlei he Tita le Timit ah biatak tein an in kah hna. Pathian kan lei ah a ttang ko caah kan thin a phang lo. Nan tei hna lai.

2021, ram a buai ka in, nihin tiang thil umtuning tete ka zoh tikah, Bawipa, Pathian kan lei ah a ttang ko tiah ka ruah. MAH Ralhrang nih mual an hmanmi tete, ningcang loin a kalmi a tam. Victory camp bomb an thlah lio ah, a voi khatnak an nganh hmasa mi te hna, ruah tikah, ithup manh ding le zaam manh ding in Pathian nih an ven ko hna. Cun, Pathian kan leng ah a ttang ko tiah ti khawhnak evidence dangdang zong a um len rih ko lai.

Gideon chan lio i Israel miphun le Midianite miphun an rak ido lio ah Midianite ralkap cu ting 13500 an rak si. Cu lio ah, Israel ralkap cu 3700 faite an rak si. “Kan tei kho hna lai lo” tiah Israel lei tampi an rak phunzai len ve ko. Asinain ttihnak a ngeimi le a rak phunzaimi paoh cu, Gideon hmang in Pathian nih a rak kirter hna i, Pathian aa bochanmi, Miraltha 300 nih Midianite ralkap ting 13500 cu an rak tei ko hna.

Pathian a zummi, Pathian fa a simi Chin miphun lei ah Pathian a tang ko ahcun teinak cu kanmah ta a si tiah ka zumh ko. Mirang uknak tang ah kum 50 hlei kan um hnu ah Kawl uknak tang ah kan lut tthan i, Chin miphun hi miphun dang uknak ah kum 100 hlei kan um cang. Miphun dang uknak in luat kan cu tuk cang.

Ral dohnak ahcun, MAH ralhrang pakhat thah khawh a biapi, MAH ralhrang sakhan lak khawh zong a biapi chin chin. Ralhrang nih an pemmi, Thantlang khua lak khawh chin chin ahcun, MAH ralhrang thahri tam nawn te chah biak bantuk a si lai caah, lak khawh ahcun teinak ngan taktak a si lai. Ke-tin pakhat a pawngh ah thluak thahri tiang a fah bantuk in, Thantlang khua ah an sungh ahcun, MAH ralhrang a dotu vialte nih thazaang thar an lak ding khi an ttihmi cu a si.

Nihin ah Chin miphun cu ral kan tho cang. Ral kan tu cang. Kan mino nunnak zong a liam cuahmah cang. Chin pasal, nusal hna nih nunnak le thisen an thap cang. Meikhu le kuan lakah kan mino tampi ral an tu cuahmah. Mahbantuk caan lio ah zeitindah thazaang kan pek khawh ve hna lai? Zeitindah an caah thla kan cam lai? Zeidah an caah kan tuah khawh ve mi a um? bk lei ruat in Chin miphun dihlak, ngakchia upa hacang rial in teimak kan chuah a herh tuk lio caan a si.Crd.Zasang Cinzah