Thil hi kap khat lawngin zoh cu ke pakhat in a kal mi bantuk kan si ko hnga. Ram buai ruangah ramdang ah an kal khi a dik mi bia a si nain an kal ruangah anmah chungkhar ca lawng hlah, an cawnmi fimthiamnak kha miphun le ram caah an ratpi dih than zong khi tuak chih kan tlolh lo a tha. Ram tha an phak ruangah Chin miphun min thattertu zong an si i tam deuh in riantuan khawhnak lam pakhat zong a si theithiam a hau. Kan dihlak in ramchung ah um dih khawh si lo i ramleng ah um dih khawh a si lo caah umnak hmun ah i soisel awk cu kan tha hnga lo.
Ramtha ah pei an um khe cu Phaisa an hmuhnak zong a tha deuh ve caah inn ttha cu i sak cio cu a hau cu ta. Inn ttha a sa mi poah hi ningcang lo riantuan ah ruah cu kan palh kho ko hnga. Ramtha an umnak le chungkhar he nuam tein tthu dir kho an si ko nain Miphun le ram caah rian an ttuannak khi kan domhtlaih thiam hna lo hmanh ah soisel ngamtu cu kan si awk hrim si hnga lo.
Inn ttha an cawk khawhnak cu ram ttha ah chungkhar he khua an sak caah Phaisa an hmuh mi in sak mi inn a si kho ko ti zong tuak a hau
Ram ttha ah an zam i cawn mi an ngei i miphun le ram caah a ttangkai ngai ti tuak zong a hau.
Ram ttha ah an um ko nain chungkhar kaltak in khualtlawn le caan pek hi miphun le ram dawtnak tak tak lo in tuah khawh mi Si hnga maw ti tuak a hau pinah kanmah ta hriamtlaih hau sehlaw hmai a sa mi ka si lai kan ti nain hmainung bik ka si cang hi ta, ka mino hawi nunnak pek in miphun an ven lio ah kei vial phaisa hmuhnak ah nuam tein chawlehchawhrolh ka tuah ve ko hi ta mu ti zong i tuak ve cu a hau hnga?
Minung hi a tling mi kan um lo caah soi awk ngei lo kan um lo nain kan i soi ahcun aa daw kho ding kan si lo caah kanmah le kan lam zawn te cio ah dai tein kal hi a ttha ko. Mah belte cu kan tei khawh lo ding thangchiat le soisel hi minung phung a si ko. Yangon ah Passport tuah mi kir tak sual hna seh law ti phang hrat ahcun soisel lei kan i lak zong cu a hau ko hnga.Crd-Salai Pa Thawng
Leave a Reply