Adik bak.CDF zophei concert nizan US an tuah mi ka zoh,tuzan an tuah tthan lai i ka zoh rih lai, hla sa a cheukhat cu raalrin deuh in amah hla keimah hla timi theih ternak credit nan chim pah ah a ttha a ruang cu ninghngal tuk in nan mah hla a neitu nan i lawh ter!
Edit:Zelle an number kha nan theih i bomh khawh tawk in bawm i zuam cio ve uh raal teinak asi ko i pakhat le pakhat i bomh a ttha.Crd-Sui Lian
Ngun Tangka a bau an ti.A ngan nawn i a hlun pah cangmi le a cungcih Ngaidi a zut pah cangmi replo an ruun Inn te, Inn leng sangsang cungah lungrethei ngai tthut bu in June ruah-hmai sinah Thawng Pi cu khua zaza a ruat.
(Sangsang cu Inn lengah thutdenh bantukin donh hleimi khi a si. Hlan deuh lio lai Inn ahcun cubantuk cu a rak tam. A tu zongah khuate cheukhat ahcun a um pah rih).
Tukum tangkua a sunghmi nih a lungre a theihter hrinhran. Hitluk in mihar an si, mi zoh chom in Sianginn kaimi van si, cu i van sungh cu a pi hmai a khap hrimhrim lo.
Innpa chakthlang le khuami hna hmai hmuh ding hmanh khi a ruat kho lo! Khatlei ah Sianginn a kai tertu a pu Buan Lal le a nupi Tial Pen nih..
“Nangmah te in na cawm kho lo, na ei paw kan in cawm hlei ah Sianginn tiangtiang kan si khawh lo lengin kan in kai ter. Na sining na hngal lo, mirum tlong in na tlong le ca zong na zuam lo ruangah na sungmi a si.
Ca hna cu i zuam law na awng ko hnga. Kan nih cu na kong le na lam ah kan i ceih kho ti lo, nan mah pifa nih hon i ceih uh”…. ..tiah an timi bia nih a lung a fahter khun.
Asi, a mawh lo! Thawng Pi hi a pi he lawng a hmeimi an si. A nu le pa nih a ngakchiat lio kum 7 hrawng a si lio ah Mizoram lei Sum an dawngnak ah Motor accident in an thih taak i a pi le pu (a nu i nu le pa) he khua a sami an si.
A nu le pa an thih kum 3 hnu hrawng ah khin a pu nih raifanh zawtnak in a thih taak ve hna i cuticun a pi he lawng an hmei cu a si.
A pa i a unau pawl hi khua dang ah khua a sami an si pin ah mi harsa ngai an si tikah an zoh khenh kho lo. A nu hi unau pathum , nu pakhat le pa pakhat a ngei hna.
A nu tta Buan Lal tu nih hin inn dang in a pi he a zoh khenh pahmi hna an si. Buan Lal hi a ngaite ti cun roco tu ding asi ko nain a nupi nih a chungle a rem set hna lo caah tthen ding le a siang ve fawn lo i Inn dang a chuakpi.
Thawng Pi cu khua a ruah ah a chungsi a vang. Tangkua nolh tthan ning tiah khuapi ah va um, Inn mahte i hlang pinah mahte i cawm rih ding, asiloah A sawngah um ding.
A ho ramdang va bochan awk ngeih ve lo, a pi kum 60 fai a si cangmi nih Lai lei tlanglo thlawh le thingphurh in van cawm ding cu atuak ah a si kho hrimhrim lo.
Tu ahcun tangkua cu a sawngah um a hau, Sianginn kaiman cu mi do cawi chom hmanh in va damh kho hna hmanh sehlaw A sawng um man a hau rih hoi.
Cupin ah tangkua a kainak ding phaisa, mi do va cawi ding zong cu zeitik phaisa ngeih lai theih lomi cu a ho nih an cawih duh ding hna khi a si fawn lo.
Nikum tangkua a kainak hmanh a pu Buan Lal le a nute Man Tiak techung i bawm in an kaitermi a si. Tukum a sungh tikah van nolhter tthan ding an chaihmai.
Hei sung tthan sual sehlaw hitluk kan har le kan fe cio ah, kan fale Xmas thilthar cawknak le thlumal cawknak hmanh kan ngei lo si. Kan har le kan fe bu in kan i hnekmi si ve le tukum cu kan i hnek kho ti lai lo tiah an ti cang fawn.
Thawng Pi hi cathiam lo a si lo. Tangcheu in tangriat tiang a kai ah an khan ah pakhat nak peng a si. Tangkua a kai tu ahcun khuapi a si cang tikah mi an tam i pakhatnak cu a si kho ti lo, pathumnak hrawng ah a tla.
Tukum tangkua a sungh zong hi a thiamlo ruangah silo vanchiat bia a si. Tangkua hi cathiam lo ruang ah siloin vanchiat ruangah a sungmi an tor, a mah Thawng Pi lawng a si lo.
Hitluk cathiam Thawng Pi tehna tangkua sungh hi cu ruahding a um ngai. Mi rum fa phaisa in Sayate a kat kho deuhmi cu zeitluk ca thiam lo, kawlca in a min hmanh a ttial kho huaha lomi zong an awng ko.
An sayate mawh ma si, mirum pawl mawh dah, asiloah kan cozah hme an si deuh hnga!
Ca a thiam komi sunghter riangmang i cathiam lomi, Sginn kai a hrawkhrawl pengmi hna phaisa ruangah awn ter cu an mawh bak tiah Sayate rumro sualphawt awk an ttha thlu lo. Mi rumpawl zong nan mah nih phaisa in nan kat hna ruangah asi tiah mawhpuh awk an ttha thlu ve fawn lo.
Khat leiah an sayate zong cu an mawh ve lo, ralkap cozah in Lahkhah an pekmi hna cu khuapi chungah chungkhar terual van i cawmnak ding tlak a si lo.
Nupa la hmanh an i cawm kho fangfang a si. Cutikah a lenglei in an hmuh khawh ning paoh in phaisa an kawl ve a hau. Ralkap cozah mawh rumro a si ko!
Ka nu le pa kha cu rak dam rih hna sehlaw cu mu, Hakha hmanh ah silo Yangon bakah tangkua hi ka kai kho hnga si kaw… A siloah ka pu tal kha rak dam rih sehlaw cu mu a hi dirhmun chiakha ahhin cun ka dir hnga lo mu… tiah khua a ruat caan a tam.
A mawh lo, a nulepa cu rak dam rih hna sehlaw sumdawng an si i phaisa cu duhduh in a hmang kho ding a si. Asiloah a pu tal nih khan cun rak dampi rih hna sehlaw a duhtukmi tanghra hi mi docawi le mi va bochan hau loin a nolh khawh tthan ko hnga! Minung a si bang nehhnu caan ruatloawk a ttha ve lo, a mawh bak lo!
Nain, rak dam rih hna sehlaw tiah ruahlen zongah a si kho ti lo, an dam ti lo, an um ti lo. Hi an dirhmun tehin hmailei ah zeitindah kar kan hlan lai timi tu ruat a hau cang.
Hilak ah zeitluk hnekbu le na duhmi paoh kan in cawkpiak lai tiah lem lengmang zongah Sginn kai fial cu thih fial tlukah a relmi Mang Kian te hna an rak um ve hoi.
Mang Kian hi mirum fa a si, a ule Ramthumnak ah an um dih i an duh paoh in an zoh khawh hna. Sianginn na kai ahcun na duhmi paoh kan in cawk lai, Motor Saikal India ta bak kan in cawk lai tiah a ule nih an ti zongah a kaam bak lo. Taal rang hmanh in kal khawh ding phun a si lo!
Kai duhtuk ko nain, chungkhar sifah ruangah a kai kho lomi Thawng Pi tehna an um lio ah kainak phaisa tor a nei i kai dingin zeitluk lem lengmang zongah a huam baklomi Mang Kian tehna an rak um hi cu vawlei hi khuaruahhar ngaingai a si ko. Thawng Pi he an sining i thleng hna sehlaw a ttha tuk hnga!
Pate, ka fa Thawng Pi kai ko law ka si khawhchungin kan kai ter ko lai na lungrethei hlah tiah a pi thapeknak nih a hnarno ruh a ttam.
A pi a zoh ah a lung a fak, kum 60 a si cangmi a pi nih lothlawh le thingphurh in a cawm dingmi a ruah ah a ngaih a chia, a um tilomi a pu, le hringtu nulepa a hlam a zual hna.
Hipei pipu nih ngakttah khua awng tonglo an timi siko lai hi tiah khua a ruah caan a tlawm ti lo. Lungkil cun a pi zong nih Thawng Pi nulepa le Thawng Pi pu a hlam ruangmang tawn ko hna. Nain, Thawng Pi zaangder lai phan ah a langhter ngam bal lo!
Ka pi ka kai lai lo, na lungrethei hlah, Sianginn kai i cozah rianttuan lawng i cawmnak a si lo. A ngaite tikolo cu Cozah lahkhah tehna cu i cawmnak hmanh a tlak lopi.
Tukum cu lothlawh kan bawmh lai le facang ttuan dih in Mizoram ah kuli ka hlawh ve lai. Atu cu ka tlangval ve, ka cuza ve cang ko i keimah nih kan cawm cang lai tiah pa cang cuh in a pi cu a hnemh chin!
Azei si hmanhah sining nih a pek ve lo cang ahcun zeiti awk ttha. Tukum cu a pi lothlawh bawm dingin le Kum a hon vui i facang ttuan le Lo thar vat hna lim hnu in mizoram lei ah kuli ttuan ah kal dingin timhtuahnak a ngei!
Hringtu nulepa an dam lio ahcun chungkhat sahlawh le, innpa chak tlang nih pate ti rumro in an rak auh i an rak dawhtukmi, atu Hringtu nu le pa an um tilo hnu ngakttah Thawng Pi cingla rualchan sinah a thlum-al kho ti lo..
An pifa zoh ah khuaruah an tam hrinhran ko. A mui i a fiang lomi hmailei an lamtluan ah zeidek an lawh te hnga…???Crd-Benjamin Cungbawihu Bawitlung
Leave a Reply