A ruah awk hmanh kan hngalh tawn lomi Sualnak

SUAL kan ti tikah zapi kan mitthlam ah a cuangmi cu zuu ding, kuak zu, mifir le lainawng tbk khi kan mitthlam ah an cuang tawn. Si, a dik! Hi hna zong hi SUAL cu an si ve ko. Nain zapi nih a ruah awk hmanh kan hngalh tawn lo mi sualnak pakhat langhter ka duh.

Cucu zeidah a si ti ahcun “Pathian nih a co hnga dingmi kan coter tawn lomi sualnak” hi a si. Kan nunnak ah Pathian nih a duh bik mi cu Amah pakhatnak chiah hi a si. Hi ca na rel pah ahhin rak ruat ve hmenh. Nifa tin na nunnak ah zei nih dah pakhatnak hmunhma a lak? Na rian a si sual maw? Na nupi/pasal le na chungkhar an si sual maw? Vawlei cung chawva an si sual maw?

Nangmah tein lehnak rak i tuah. Pathian lonh in na nunnak ah thil dang nih hmunhma a lak si ahcun, cucu sualnak ah an pialpitu le Pathian he an hlatter thil an si caah na hrial bak a herh. Rian hi kan tuan awk a si maw? Si, kan pum pawcawmnak caah kan ṭuan bak ding a si. Thathut hi Bible zong nih a huat bak mi a si caah teima tein heh tiah rian cu kan ṭuan bak ding a si.

Chawva tah kan herh maw? Herh tuk ta! Asinain kan nunnak ah pakhatnak dirhmun ahcun kan chiah bak ding an si lo. Zeicatiah kan nunnak i pakhatnak hmunhma cu Pathian nih a co ding a si. Zei bantuk thil hmanh kan chuhter ding a si lo.

Kan nunnak i pakhatnak hmunhma cu Amah Pathian lawnglawng kan coter ding a si. Pathian nih kei cu nahchuak Pathian ka si a ti. Zei bantuk dirhmun a si zongah, zei bantuk thil a si zongah Pathian nih, keimah hi pakhatnak ah ka chia hna seh, keimah hi ka daw bik hna seh, ti a kan duh peng. Cucaah kan biakmi kan Pathian cu a co dingmi coter ko hna usih!

Amah Pathian pakhatnak kan chiah paoh a si ahcun khuakhaan thiam Pathian nih kan caah a ṭha bik in khua a kan khaanpiak ko lai.Crd.Lian Cung Thawng

Be the first to comment

Leave a Reply

Your email address will not be published.


*