Khua fakpiin ka ruahmi thil pahnih a um!A luancia ah accident voi (5) leng ka tong cang i, a thi diam cangmi ka rak si nain Bawipa nih ka nunnak a ka khamh!
Cucaah keimah le keimah kai ruah/hmuhmi cu “James Vannneilian cu a thi diam cang, a tuhi a nungmi hi Thiang Thlarau asi i “James Vanneihlian” pum ai hlaanmi asi (Gal. 2:20)” tiah kai hmuh i ka zumh.
U.S ka phak hnu in, business hna tuah kai tim ve, nupi hna ngeih kai tim ve, innchungkhar dirh hna hi kai tim ve ko nain Bawipa nih cu vialte cu a ka lak piak dih i a rianṭuan dingah upat hnu ah a ka kawh/auh!
Zeizong vialte ka kaltaak dih i sifahnak, chambaunak, mihmaikhahlonak, ningzahnak, iphuhrunnak, lungretheihnak, thangchiatnak, kongceihnak, dohralhnak, hlawtnak le depression ngahnak tiang in harsatnak phunkip chungah a nawlngaihnak kai thim i Bible ka cawng.
Culawng silo in ka thlarau zumhnak a ṭhan khawh nakhnga le Thiang Thlarau ka nunnak ah a khah nakhnga rawlulhnak in voi tampi nitawi/sau in a ka hruai. Ṭhengṭhunh iṭhunh in le zunput kalnak thazaang ngeilo in a lawn in ka lawn i, ti zong ding kholo, mit zong au kholo, aw zong theih khawhlo le holh kholo tiang khin taksa in ka rak temtuar.
Bawipa nih “rian na ṭuan lailo, keimah nih kan cawm lai” tiah a ka ti i kum (4) chung cuticun van in mana in nifatin ka duh/herhmi a ka pek zungzal. Taksa damnak, thinlung damnak le thlarau damnak thluachuah a ka toih!
Hitluk tiang a ka daw i, a velngeihnak le a zaangfahnak ka cungah a khat i a thluachuah donglo in a ka petu Sertu ka Pa, Pathian nihhin thihnak chung khamh in, harsatnak phunkip chungah luhter in le a thluachuah pek in “keimah mualpho dingin le deuh/hlawt dingin” khi vialte ahkhan a ka hruai i a ka kalter hnga maw? Asilole hmualpho ding le deuh/hlawt dingin ka caah tinhmi a ngei hnga maw” tihi ka ruat ṭheu. (Pathian nih cuticun khuakhan lai tihi ka zumhnak nih a phaanlo)
Cun hmualpho ding le deuh/hlawt dingin va si sual hmanhsehlaw a ka Sertu le ka nunnak a ka tlanhtu le zungzal nunnak a ka petu, Ka Pa, Pathian cungah kai lawm ṭhiamṭhiam. Amah ta ka si i a duhning in a ka tuah khawh ko. A thisen cawkmi ka si i keimah le keimah ka ngei ti lo. Jesuh Khrih nih a ka ngeih cang.
David Siangpahraang kha Bawipa nih a niam bikmi ram lak in a cawi i a sang bikmi Siangpahraang ṭhutdenh cung a ṭhutter. Asinain mi nupi a sualpi lawng silo in lai a nawng rih. Cutikah a tuh bang in a zun i a sualnak ai ngaichih i Bawipa nih a ngaihthiam tikah a dawtnak, a vel le thluachuah in a let in a thuam ṭhan.
Ka nun kai zoh/check tikah taksa in sualnak le ṭhatlonak ka tuahlo, mi nupi/nungak cungah sualnak ka tuahlo, mi nunnak ka that i lai ka nawnglo, mi huat/dohralh in le mi cungah harsatnak le fahnak ka tuahlo. Chawva ah ka tlulo. Bawipa nih a ka hngalh/hmuh dih!
Cutikah “a ka fialmi nawl ka ngaih i a duhnak ka tuah i a biatak ka chimphuan ruangah” hmualpho le deuh/hlawt in ka umter hmanhsehlaw, hmailei ka nunnak ah taksa, thinlung le thlarau in a let in a thluachuah hi a ka toih chinchin lai i ka hrai hi a liam in a liam hrimhrim lai tihi ka zumh fawn.
Kan Pathian hi tinhmi ngeilo in zeihmanh a fale cungah a tuah ballo. Kan caah ṭhatnak khua a kan khaan piak zungzal ko e (Rom.8:28). Cucaah ka tonmi paoh hi “Hallelujah! Amen! Bawipa na min kan thangṭhat” tiah ka ti khawh zungzalnak hi asi.
Kan Bawipa Jesuh Khrih caah temhinnak le kan intuarmi siseh, sunparnak a kan hrawmhmi siseh ṭhatnak le thluachuahnak zong a kan pekmi siseh, thangchiatnak le hmualphonak zong va si ko seh, zeizong vialte hi Khrih caah cun a sunglawi tuk hringhran! A sunghnak pakhat hmanh a umlo e.
Ka biakmi Pathian fiangtein ka hngalh! Keimah duhnak bang si hlah seh! Amah duhnak bang si ko hna seh! Bawipa nih sunparnak co dih ko seh! Crd.Jamesvanneilian
Leave a Reply