A hnubik ka post mi khan ka rian ilim rih seh. Mahtluk caan pek cun a za cang ko. Thilman a ka hal mi tete zong kha kan leh hna lai. Kan thiamtak hi Sept tiang an imanh lo i duhsah in tah te ding thiamthiam an si ko caah.
Screenshot a ka kua tu, list a ka tuah pi tu ka hawile nan cung ah ka lawm. Copy thilzuar Update chap awk um ah cun ka rak update lai. A karlak ah kei cu ka hnawh piak ko ka rak theih lo caah a si tiah nan ka nawl ah cun kan hnawh piak than te ko hna lai.
Mah hnu pin in Aidii copy thil zuar le cawk kha cu Pathian le nanmah kar a si cang ko lai.
Hi Pau Dohthlennak ah Uknak thalo lawng si lo in ruahnak thalo vialte zong doh kho hram hna usih!Crd-Anna Biak Tha Mawi
Aidii Parborhsung Thawi_Aidii Rian ka thawk in nikum tiang ah hin thlahlawh thathi in kai chuah kho bal lo. Business training ka kai nak paoh ah lakhah chuah lo phung si lo tiah kan mentor pawl nih akan cawnpiak lengmang ko nain thlafatin thiamtah vialte hmanh vawikhat ah thlahlawh kan pek khawh hna lo caan atampi i keimah cu um rih ko seh kai ti lengmang tawn. Rian caah aherh ning in ka unau ka chungkhar sin hmanh in cawichom ahau peng.
2021 thawk in cun system tha tein kan isersiam cang lai tiah aphung men in thlahlawh kai chuah cang. (kan chim hna lai lo nan ka nek sual lai ) Abyi ka ngeih ca zong ah asi pah. Amah nih cawm ka hau sual lai tiah. Nain amah thawng in ka unau, ka chungkhar le ka rualchan hna nih an ka cawm thiamthiam ko.
Kawlram i Business tuah cu afawi hrimhrim lo. Abik in kanmah bantuk mirumfa si lo mi investment tam angei lo mi caah ahar khun. Ziah Aidii nan tuahnak zong asau cang, nan thil man nih le afak ko tung amiak um lo na ti lengmang tiah biahalnak ka ton lengmang. Asi ko asau cang ko, kan thil zong aman fak ti khawh kan si ko. Rian kan rak tuan thiam lo zong kha atampi arak itel. Asinain fact le data nih akan chimh mi cu kumkhat chung kan rian phaisa a lut mi (revenue) i average 70% hi thiamtah thlahlawh ah akal. Mahvial ka chim cun hi rian hi aho caah dah amiakbik ti cu nan ifiang ko lai dah.
Aidii hi ka thawk ka te in caan tawite ah amiak ka zun colh lai tiah ruah in thawk mi asi lo. Cun pumpak/mah chungkhar miaknak le irumnak caah ruahchan in tuan mi rian zong arak si lo (Mah ca zong ah tutiang kan rum lo nak si kho, thlen hau men lai ) Rian ah phaisa thazaang zeimawzat a chuah tu hawile zong nih mahbantuk ruahchannak an ngei lo.
Aidii thiamrun hi atlawmbik le atambik kum 10 cu amiak lo zong ah tiah ka chim tawn lo nain ka ruah peng mi asi. A tu kum 8 chung kan lut cang MAL ruang ah zeidah kan va lawh te hnga hihnu kum 2 tiang ah. (MAL MAL!!@&#%!!) Rian cu zeibantuk thil kan ton zong ah ngol kan itim lo. Apiat ten! Hmm .. kan rian kong ka tial duh mi asi lo caah mahvial si rih ko seh law.
Ka tial duh hnawh chan cu atang i “Parborhsung Thuam” kong asi. Hithil hi kum 7 chung thlahlawh punghman kai chuah khawh lo mi vialte caah tiah keimah le keimah laksawng (reward) ipek ding ah ka tah ter mi thuam asi. Kum 30 ka tlin tik ah mah thuam he hmanthlak ding ka rak iruah chih.
Mahthuam caah thawi tenh ding ah hlan lio thawi hmanthlak ka hmuh mi vialte i thawi vialte lak ah aadawh bikbik (tiah ka ruah mi) thawi vialte ka fonh dih hna. Kan thiamtak lak i kum saubik atak mi nupi deuh asi mi hna sin zong ruahnak ka hal hna, a tha bikbik an ka ruah piak an ka suaisam piak ve. Ahar mi apipa mi thawipi lawng te, tungkua thawi hmanh ah tungkua parkulh, parkai in ttamh mi, a ttiattum lo mi thawi pakhat hmanh aatel lo. Hi thuam hi thiamtak kum cangbik kan ngeih mi kan nu Pi Dawt Cuai nih akan tah piak hmasabik. Tah caan thla 6 leng arak rau. Ka lung atling bak ve.
Thawimin ka hal hna tik ah fawi le bai in achuak kho lo. Ziah ti cun a um bal mi thawi arak si lo caah asi ko. Tungkua, tungkul thawi pawl komh in tenh mi asi. Thawi min hi “Parborhsung Thawi“ tiah keimah nih ka sak. (Ukevin nih spelling aka check piak )
2020 March ah Philadelphia ka rak phan. Aidii thil adangdang he mah thuam cu ka rak iphorh. Ka phanh tlawmpal in ka u Biaktha nu nih thil arak zoh i ahmuh i a uar tuk colh ve. Zuar ding ah ka siang bak lo, asinain Covid boruak ruang ah phaisa kan herh caah kei cu ahnu zong ah kai tah ter than khawh ko ti in ka rak zuarh. Sunglawi te in akan caw tu ka u Biaktha nu cung zong ah kan ilawm tuk.
A tu lio kawlram boruak he ka lung ah a um mi cu, man fawi i tu le tu thlen lengmang ding thil (fast fashion) nak in Ro thil deuh hi Aidii nih cun chuah ko usih ti hi asi. Mass production asi mi Ready to wear cu kawlram chung i thil chuahnak ah adih mi phaisa (production cost) le kan zuar tik i kan hmuh than mi, cun akan copy tuk caah kan sunghmi vialte he tuak ah cun kan chei bak lo.
Naite i Collector Item (Aidii Ro Thil) zun 2 asi mi Tungkul thawi le Arketeng tungkua thawi pawl zong copy an chuak i online thil zuar mi tampi nih an zuar mi ka hmuh ko. Cucaah a tu “Parborhsung Thuam” zong hi arauh hlan ah an kan copy colh ko lai. Ka sian lo tuk bu in hmanthlak zong hi ka rak tar. January te in kan ithlak cang, ka sian lo ruang ah le kan ram boruak ruang ah atu lawng ah ka rak tar. Mah thuam he aa lo nawn mi thil hi Aidii thiam le Aidii Collection page dah ti lo cun copy lawngte an si ti kha kan theihpi hram u. Theih ko nabu in aman pei afawi cu tiah cawk ding nan itimh ah cun zaangfahnak te in Aidii thiamtak hna hi nan mitthlam ah kan suai piak hram u.
Aidii thil zunkhat nan cawk ah hin nan phaisa hi thiamtaktu, lazelhtu, lathlurtu hna sin ah direct in aphan ti kha kan philh piak sawh hlah u. Cun thilman i 5% hi CDM bawmhnak caah asi (aho dah zeitin kan bawmh ti cu acaan aphanhtik ah theihter asi ko lai mu.)
Nihin tiang kan tlamtlinlonak tampi lak ah akan bawmtu pakhat cio cung ah lunglawmhnak tampi he
Aidii Model: Stella Par Hlei Sung
Photo: Htoo Htoo
Leave a Reply