2011 kum June thla ah Knoxville, TN ah ralzam zohkhenhtu CWS tang ah ummi Bridge Refugee Services zung ah Case Manager tuan dingin rian an ka pek caah ka umnak DC Area in kai thawh.

2011 kum June thla ah Knoxville, TN ah ralzam zohkhenhtu CWS tang ah ummi Bridge Refugee Services zung ah Case Manager tuan dingin rian an ka pek caah ka umnak DC Area in kai thawh. Knoxville ah 2013 July tiang rian ka rak tuanta. Ralzam family tampi ka rak don hna appointment tbtk ka rak kalpi mi hna hi ka chan ah ka lunghmuih bikmi rian pakhat asi ve ko.

Cu i kai thawh hlan ah, ka mawtaw te kong ka philh kho loh. US ram i sianghleirun kai pah cun mawtaw tha zong ai nei kho loh. Lam kam ah “for sale by owner” an zuarmi Chrysler Cyrus 1998 model cu $1200 in ka rak i cawk. A hmailei chinh (hood) a rak dep. Anakmi asi, meng 170K leng a kal cangmi asi. Engine oil hi a zut lengmang caah, rawn chom peng ahau. Parking poah ah zunceh bntk in arak um. Ka phu ka tawkte arak si caah cu mawtaw te cu ka rak dawt tuk hringhran. Kumpi kum 2 kai cit. Hlawh tlawmte a hmu i mawtaw man tamtuk ai cawk duhmi ka tu ka fa le hna mah ka tuanbia hi ka chimh lengmang hna- cheukhat an i byheart cang men lai.

DC Area in Knoxville TN tiang meng 575 leng mongh ding asi. Khual lamhla tlawn ding asi caah motor tire  tal cu thlen kai thawh. AC  achuahnak kua hi arawk caah amah tein a thlep lengmang- caku ka bil ka bil i ka tenh, mahcu ti cun thli arak chuak. Cunticun, Meng 500 leng cu tin ka thuat ko. Sianghleirun kainak caah lei he ba he ka kai, suite case pakhat, credit card pa 2, beg pakhat, le bank chung ah $1000 tling lo he nunnak lamthar kawl ah ka rak i thawh.

Apalancha tlangthluan, West Virginia tlang hna pal i, mawtaw cu ka mongh. Ka rak sual ve ning, lam remh a tam tuk caah, Google map ka zoh ka zoh i highway ka rak hrial. Meng 200 leng high way lo in kawmkung kar ah ka rak kal.

Knoxville, TN khua dawh cu kan luh bak in, ka rak um tawnnak Baltimore khua he arak i dang tuk in ka theih cawlh. USA ram khat ciocio asi nain “Ee! atu hi pei America ka phak hi” ka rak ti. Mirang deuh an um. Sunday pumhnak ding ah Oakridge i Baptist Biakinn pakhat ah member kan lut. Pastor, deacons hna home visit an thawn tuk ning hi. Ka retheih a kan chawn tuk. Church timi a sullam a tlingtuk.

Member 3000 leng si nain a kan veh khawh peng. Baptist Church ti si nain Praise and Worship atui tuk! Atha tuk. Gospel hlasak minthang hna phungchim thiam Pathian mi hman hna an pal pah zel. Cu pin ah, ralzam zung ka tuannak hi zei dah bawmh nan duh an ti rih. Knoxville i Presbyterian Church a ngan bikmi pakhat nih cun mawtaw hi a tu le tu a donate. Ralzam chungkhar phan ka poh mawtaw hlun deuh an si nain, keimah mawtawnak in tha deuh an hlut peng hna. “Khah license ngah i zuam uh law mawtaw hlutmi kan kawl piak hna lai” tiah ralzam chungkhar tampi ka chimh peng hna.

Iraq ralzam tam lakte ansi. Somali, Rawanda, Kenya in a phanmi zong an tam. Ka clients pawl lak ah Kawlram mi hi minority an rak si. Cu ahcun, Iraq ralzam pawl hi dollar a thong sawm in arak i phorhmi an tam ngai. Mirum ralzam tihi Kawlholh hna in cun biafang a khek ti loh. Sadam bia a rak ceihtu Biaceih bawi pakhat zong ka client arak si. Iraq i siangpahrang inn a lomi a inn hmanthlak hna ka zoh ah, 2 bedroom apartment te i ka vun chiah hna cu sian a rem lo ngai.

Asinain, mifim ko hi an rak i toidor khun. An i toidor le zei poh a tha ko lai an ti ah khin.. upat an um hlei. Anun nem i a fim i, Sadam Husein bntuk ttih lo in bia arak ceih cu… Mirang phungthluk nih “Speak softly, but hold a big stick” ti kha amah bntk mifim hi sidawh an si. Fungfek angan takmi ai ken, ai put kho, mi zong a huai kho, nain a nun ti bang in a nem. Bazar kal le sikhan kal tbtk ka tlohpi bak ve hna lo. Cu lak ahcun, an min sautuk caah tial har takmi Ibrahim bin abddul husein ishamel tiin a donghte a dong ti lomi min tial nak caan zong cu arak tam ial ve . Zei si zong ah, Shukhran… (Iraq or Arabi holh in kai lawm tinak) Shukhran ti theih khin, zang adam.

Ka philh khawh lomi cu Knoxville i Burmese Khrihfabu te asi, inn ah kani fellowship, cun mirang biakinn akan hlanh. Zanlei poh pumh, Kawlram miphun tling kan rak si. Atucu Pastor hna an nei ve cang. Case Manager ka tuan chung ah Kawlram mi zong an rak phan ngai 2011-2013 kar hi US ah Kawlram mi ralzam tambik an phak kum asi.

USA ahhin ralzam a dongtu ding agency a tlangpi in (4) an um Catholic Charity, CWS (Church World Services), Episcopal Immigration, International Rescue Committee (IRC) hna hi an si, mah le khua cio ah min phunphun an bunh i an um nain, hi 4 hi ralzam latu ding ah Federal cozah nih atlangpi in an chiah hna. Kum khat ah vui 1 lengmang conference tuah asi. Riantuantu a thong in kai asi, New York ah vuikhat, Atlanta, GA ah vuikhat ka rak kai ve.

Ka mawtaw te cu rian ka tuan chung kai thleng kho loh. Hlawh a tlawm, apartment man kai pek khawh fang. Ei kai cawknak le gas rawn in adih, US ah kum 3-4 ka um cang. Kawlram zong chung le caah zei tebak ka tuah kho lo. Ka bank account hi thladih cun $100 hrawng in thawkthan lengmang arak si.

Ralzam appointment ka kalpi lio ah kamawtaw cu a dir. Ai thawn ti loh, a thi taktak ko cang. Cu ahcun, ralzam chungkhar ka client hna nih Toyota Venza 2010 bak in an rak ka lak. Kai lung hmuih ning hi kai lawm tuk. Iraq i araphanmi ralzam pakhat nih ka mawtaw cu a ka remh piak i a nung than. Kum sautuk cu ka tuan kho ve lo, ka tlaihchan tukmi rian asi nain, opportunities dang kawl ka rak duhve, American dream ka dawi duhve caah, lamthar ka rak kawl ve.

2013 ah Indiana ah ka rak pem. USA ah kum 11 ka um hnu 2021 kum dih i student loan kai lim lawng ah Mawtaw zero mile kai cawk asi. Kai cit ka ah ka tawka thling aza. Khah, hlawhtlinnak kong tial lennak cun, mah ti ka retheih lio tehi ka philh lo, tial ding memory ka nei peng… ka bia sau… chun tha uh.Crd-Peter Biak

Be the first to comment

Leave a Reply

Your email address will not be published.


*