Ṭihmi Le Phanmi

Dothlennak a rak i thawk kaa ahkhan caṭial thiam le biachim thiam U Min Ko Naing nih bia pakhat te a rak chim. Atulio ka ṭih bikmi cu, dothlennak hlawh a tlin ṭhan lo sual lai i, ralkap uknak kan phan ṭhan sual lai maw timi a si, a ti. Ralkap uknak hi a ṭih awk ngaingai kan va hngalh cio lo hmanh ah kan duh lo bikmi cu a si dih cio ko lai dah.

Asi ah teh, atulio Min Aung Hlaing nih a ṭih bikmi khi zeidah a si lai tiah nan ruah cio? Tuah ngam lomi ka ngei loh a rak ti bal cang caah ṭihmi ngaingai a ngei hnga lo pei nan ti cio ko maw? Asiloah, a ṭih tuk laining le a thin a phan tuk laining khi nan ti cio dah?

Kei cu zei paoh hmanh va tuah ngam ko sehlaw, ASSK a thah ngam ngaingai ṭung lo i, ASSK nih bia kaakhat te a chimte dingmi khi atulio Min Aung Hlaing a ṭih bikmi le a phan bikmi a si ko lai dah tiah, ka ruah. Nawl ngeihnak an laak lai hrawng i anmah Ming Aung Hlaing lei nih zei bia dah an chim i, ASSK le U Win Myint nih zei bia dah an chim ve timi le biaceih zungah sual a phunphun an phawtmi ASSK nih zeitindah a leh ve tawn hna timi ASSK nih a chim ṭhan dingmi bia khi ICJ le ICC nak hmanh in a ṭih deuh men lai dah ka ti ko.

Zeicadah tiah, minung hi ‘’na palh’’ ti ngaingai kan duh cio rua lo. Lih le nawnnok in thil tuah hi maimilhnak phunah kan ngamh tuk sual tawn nain, lih le nawnnok in kan tuahmi kha mi nih an chim ṭhan dingtu cu muithla ṭih in kan ṭih tawn ve ko rua tiah ka ruah.crd-Perhkalh Thawng