U.S President thimnak boruak le 6th January electoral vote relnak

6th January2021 khi congress House Senate ah States 50 nih President vote an pek mi electoral vote rel asi cang lai. Khi ni khin Joe Biden cu U.S President caah mipi nih thimmi asinak kha mipi sin theihter ding in congress ah vice president Mike Pence nih thawng thanhnak a tuah cang lai. Electoral vote cu 538 aum i, 270 a hmumi kha President an tling. Joe Biden nih 306 electoral ahmu.

President Trump le a minung hna nih taza cuainak state 5 ah an tuah peng nain an sung dih. Atu cu tazacuainak an sunghdih cang caah Joe Biden nih teinak ahmu ti kha cohlan ding long a tang cang. An cohlan lo ahcun khi 6th January ah duhlonak an langhter te lai.

Khatlei ah Trump minung tampi nih tutan thimnak hi lih le hrokhrol aum ruang ah Joe Biden nih teinak a hmuhmi asi. Cucaah 6th January ah sandah Washington DC ah kan piah lai an ti. Cucu Trump hrim nih atu le tu a forh hna.Sihmansehlaw Trump nih teinak a co tthannak lam cu aum ti hlei lo. Sandah piah i mipi harnak pek long khi a siko cang lai. Voter fraud aum an ti mi zong rinhtlak chirchanh evidence pakhat hmanh an chuahpi kho ti hlei lo.

Khi 6th January ahkhin Vice President Mike Pence nih a hruai te lai. Trump minung asiko nain thimnak phichuak thlen khawhnak nawl a ngei lo. State kip nih Electoral Vote an pekmi relpiak ding long kha a rian si. State pakhatkhat nih electoral vote an pekmi vote an lung tlinlo ahcun House Representative chungtel pakhat le Senator pakhat ikawp in an minthut 2 a um ahau. Hmurka chimsawh zong cohlan asi lailo. Ca in tial a herh ding asi. Tutiang ahcun House he Senate he thimnak phichuak doh a timhmi an um cang caah nidang kel nak cun suimilam 2 rau deuh dawhdang asi.

Tutan 2020 U.S President thimnak hi Republican phu nih an cohlang duh lo. Cucaah House ah chungtel 140 nak tam, Republican phu nih Joe Biden nih Swing States ah teinak a hmuh hi kan cohlang lailo an ti. Senate ah senator 13 nak tam Ted Cruz telh in “ 2020 thimnak phichuak hi tu hnu ni 10 chung ah kherhhlainak (audit) an tuah tthan lo ahcun Joe Biden nih teinak a hmu hi kan doh lai” an ti ve. Cucu an doh khawh tak ko. Asinain Senate ah Republican chung 50 long an um lio asi. 8 zuk ahcun 42 long an tang. Democratic cu 48 an si. Cucaah Senate hman ah an tluang lo ding afiang ko.

Zeidah acang kho kun?Congress ah States 5 electoral votes hi hnon an timh zong ah zeihmanh thlennak a chuak hlei lailo. Suimilam 2 chung long kha an cohlanlonak chimfiannak an ngei lai. Cu hnu ah cohlan lo tlak asi maw silo ti kha House ah thimfung an an thlak tthan lai, an pass lailo. Democratic nih a ukmi asi hlei ah Republican chungtel in cheu 2 cheu 3long nih object kan tuah lai an ti. Cucaah swing state i electoral vote phichuak cu an hnon kho lai lo.

Senate zong thimfung an thlak ve lai. Majority leader Mitch McConnel telh in Republican Senator 8 nih Joe Biden cu President elect, 2020 thimnak a tei tiah fiang hlang tein zapi theih in an aupi cang. Cucaah Joe Biden teinak a hmuhmi hi House he Senate he an hnon kho tilo ti kha a fiang ko cang. Suimilam 2 long kha an rau deuh kho men mi asi.

20th January 2021 tik tu ah phungning tein U.S President rian a va awt te lai.Note: Ruahnak chim caan asi tilo. U.S Presiden asi ding cu phung ning tein pakhat hnu pakhat a kal thluahmah cang. thawngpang diklo zumh sual ti lo ding.

Atang vedio hi 2017 lio Vice President Joe Biden nih President Trump cu President caah mipi nih thimmi asinak kha a rak thanh i Congress ah Democratic phu Representatives chungtel tampi nih object an rak tuah. Vice President Joe Biden nih a rak hnon piak dih hna. 2005 lio Bush vs John Kerry lio zong object an rak tuah len ve ko nain House he Senate he vote an rak thlak i san a rak tlai hlei lo.Tutan ah Mike Pence nih zeitindah a tlangtlak ve te hnga?  Hngak phot cio ko hna usih. Trump a tling tthan kho men ti bel cu ruah tilo zong a poi ti lailo.Credit-Kham Pi

Be the first to comment

Leave a Reply

Your email address will not be published.


*