U Kyaw Moe Htun Cu Vawlei Cung Ram Pumpi Meeting Ah Tel Dinngin Tuluk leh America Nih Lungtlinnak An Ngei!

U Kyaw Moe Htun Cu Vawlei Cung Ram Pumpi Meeting Ah Tel Dinngin Tuluk leh America Nih Lungtlinnak An Ngei!

Ambassador U Kyaw Moe Htun cu vawlei cung ram pumpi huap ah Kawlram aiawhtu ding caah November thla tiang pehzulh in tuan ter dingin America leh Tuluk karlak ah lungtlinnak an tuah i, America hram bunh foreign policy magazine internet ah an tial.

Asinain National United Government (NUG) cu aiawh dingah Ambassador U Kyaw Moe Htun cu September 14 i an tuah dingmi a vawi 76 nak vawlei cung ram pumpi meeting ahcun tel in, biaruahnak cu a ngei kho rih lai lo tiah an tial chih.

Khattelei zongah rampi nawlngeihnak a latu SAC ralhrang aiawhtu ralkap bawi hlun a simi U Aung Thu Reign zong meeting biaruahnak ah tel lo dingin America leh Tuluk karlak ah hnatlaknak an tuah i, embassy lei i an chimmi chirhchan in magazine nih cun a tial.

Vawlei cung ram pumpi huap meeting ah thutnak an hmuh khawhlonak aruang cu Febuary 1 ah rampi nawlngeihnak a laak i, cuhnu cun vawlei cung ram dihlak nih an cohlan khawh nakhnga heh leh hnik in aa zuam tukmi SAC ralhrangbu caah cun a fak taktakmi sunghzatlaknak a si.

Vawlei cung ram pumpi huap dingah quality zohfelnak a tuahtu committee nih an tlinh leh tlinh lo kongah result an chuah lai dingmi November thla tiang ahcun caan a rau ngaingai khi a si.

Atu lungtlinnak an tuahmi cu Europe ram pumpi huap, Asia ram huap leh Russia ram zong nih theihthiamnak he lungtlinpinak an ngei tiah Embassy lei thawngzamhnak hrampi nih an chim tiah foreign policy ah an langhter chih.

Member ram 9 a telmi vawlei cung ram huap nih quality zohfelnak tuanvo an pekmi cu vawlei cung ram pumpi huap meeting tuah dingmi September 14 ah thawngthanh dingin timhtuahnak an ngei i, cu committee nih Kawlram caah ahonihdah vawlei cung ram pumpi huap meeting aiawhtu dingah a tling timi cu zohfelnak tuah in thimnak zong an tuah te lai tiah theih a si.

Quality zohfelnak an ngeih lioah buaibainak pakhat khat a um sual ahcun quality zohfeltu phu nih zohfel tuaktan in vawlei cung ram pumpi huap meeting nih biachahnak pakhat khat a thanh hlan lo cu, atu aiawhtu nih pehzulh in tuanvo a ngei lai tiah vawlei cung ram pumpi huap zulhphung an ngeihmi ningin theih a si.

Kawlram ralhrang nih aa zuam cuahmahmi kongah a dirhkamtu ram pakhat khat nih quality zohfeltu committee nih November thla chungah a tuah dingmi hmasabik meeting hlan ah cu kong ah ruahti dingin theihternak an tuah khawhmi  kongah America leh Europe ram a hawile hna nih thinlhang in an um ko.

Cu hna nih cun, atu i Kawlram Ambassador U Kyaw Moe Htun i vawlei cung ram pumpi huap ah meeting kai khawhnak tuanvo cu pehzulh in a tuan khawh nakhnga Kawlram aiawhtu kong he pehtlai in biachahnak cu a si khawh chungin caan rau deuh dingin ruahchannak zong an ngei.

U Kyaw Moe Htun cu Giniva i vawlei cung ram pumpi huap ah Kawlram i palai si zungzal dingin kum 2020 September 5 ah riankhinh a si. Nawlngeihnak a laak hnu Febuary 26 ah khan New York i vawlei cung ram pumpi huap meeting ah nawlngeihnak a laakmi cu ralchan in NUG hi cozah dingah aiawhtu a si tiah a chim ruangah Febuary 27 ah U Kyaw Moe Htun cu ralhrang nih an hlawt.

U Kyaw Moe Htun cu Shwezaland Ambassador leh vawlei cung chawlehthlanak phu ah palai a si zungzal i, chemical hriamnam khamnak phu zongah member pakhat a si i, cu bantukin tuanvo ngeitu a si tiin Mizzima News in Burmese nih a tial.Credit-Chin Morning Star

Be the first to comment

Leave a Reply

Your email address will not be published.


*