Tuzan ah Mindat khua ikahnak ah an hruaitu pa he phone in bia kan iruah kho.

Tuzan ah Mindat khua ikahnak ah an hruaitu pa he phone in bia kan iruah kho. Mindat peng mipi lungrualnak le an ralthatnak hmuh tikah khuaruahhar asi. Chin chanthar tuanbia ah roling tuanbia an tial.

Thih ngamh in lai methal he minung….. kan um ko tiin a ka chimhmi ka theih tikah Chin dothlennak hi a thar in a nung than  cang timi a ka theihter than. Tuanbia hi a nolh than tawn ti asi i,Mindat peng um Chin miphun nih a kan funton than te men lai.

Kawl ralkap nih azaza, a thongthong in an kal hnawh tik hna ah methal kuan zong ruah bantukin a sur lai ti an theih ko, an methal le Kawl ralkap methal aa dang ning an theih ko bu ah pasal/nusal tiin an dir ngam , an doh ngam mi cungah upatnak sangbik pe cio hna usih. Kan bawmh khawh nak lam cio in bawm cio hna usih.

Note: Atanglei link ahhin Mindat dothlennak ah harsat a tonmi hna caah direct in bawmhnak pek khawhnak linkĀ  asi. https://www.facebook.com/donate/141561377932416/10208968271480832/
Credit-Salai Z T Lian .

Chin National Defense Force (CNDF) timi hriamtlaibu thar a vun dirmi kongah zeihmanh khuaruahhar awk a um lo.  Chin miphun tuanbia le atulio kan sining taktak zoh tikah lungrualnak le hmunkhat te ah tangtinak hi kaa lawngin hmuh khawh asi.  Tuahsernak taktak ah a um lo.

Tahchunhnak ah kan Biaknak lei hmanh zoh hna usih- USA ah Hakha, Thantlang lei deuh Baptist pawl cu  CBCUSA he pehtlaihnak kan ngei cio bang, Falam lei deuh pawl zong CBNA ah an ipehtlaih ve. Cun a dang pengtlang  pawl zong an mah le siaremnak cio in buu dirh le pehtlaihnak an ngei cio ve hna.  Cun USA i kan mah umnak cio zong zoh hna usih– a pengtlang chirchan/hoih in Khrifa buu kan dirh, buu kan dirh ciomi kan hmuh ko.

Khrihfa biaknak hmanh ah kan ithen, kan tang ti kho lo. Hriamtlai dothlennak chinchin ahcun a har chinchin kho. Hihi kan sining taktak cu asi ko. Nain lungdong lo tein kan Chin miphun lungrualnak caah thazaang a chuah pengmi le a tang pengmi cu ahopaoh nih  “sui” bantukin sunghlawih cio ding tu hi mipi kan rian asi.

A pengtlang thahri in khua kan khan,  khua kan ruah, lam kan kal timi hi kan sining taktak (reality) asi. A thatnak tampi a um ko nain miphun pi huap in cawlcanghnak caah cun a dotdot in meeting thut ta, kutka tampi kingh ta, hauhruang tampi lonh ta, tlang tampi kai ta hnu lawngah lungrualnak niceu dawh hmuh khawh dingin a um.

Kan Chin miphun huap cawlcanghnak nakin a pengtlang le khua kongah a buai huam deuhmi tam tuknak ah atu bantukin CNDF a dirmi kongah lau awk le khuaruahhar ding a um lo. An mah peng le tlang an funton khawh hna, thazaang an ngei i Kawl ralkap an tuk khawh , siloah an do khawh ahcun Chin miphun caah thathnemnak a chuah kho ve ko. Abiapi cem mi cu miphun khat kan si le kan ral a khat a hau.  Miphun khat kan si paoh le kan ral a khat paoh ahcun tangtinak lam a um peng ko.

Cucaah Chin miphun caah zeidah CNDF nih an tuah khawh te lai timi khi zoh cio te ding asi ko.By-Salai Z T Lian

Be the first to comment

Leave a Reply

Your email address will not be published.


*