Tulio Vawlei & Gospel Karhterning Kum zabu 21 ah kan um i, smartphone, social media le internet (online) in thil hi tam deuh kan tuah cang.

Tulio Vawlei & Gospel Karhterning Kum zabu 21 ah kan um i, smartphone, social media le internet (online) in thil hi tam deuh kan tuah cang. Phun dang in kan chim cun, technology le digital in thil hi fawi deuh le rang deuh in kan tuah khawh cang. Cun, tulio vawlei cu thiamsang le cawnsan chan zong si caah “cauk le capar” hi ttial silole rel zong biapi tuk. Tu bantuk chan ah thlarau khamhnak gospel hna van karhter ding hi a fawi lo taktakmi si – a ruang cu minung nih Pathian bia nakin vawlei thil le taksa nuamhnak hi an kawl in duh deuh cang. Pathian thangtthat pah zong in “smartphone” deh si cang – minung lungthin, ruahnak le nunnak ah Pathian bia a lut in pil kho ti lo.

Tulio kristian tampi hi thlarau ah harsatnak tampi kan ton lio si. Cu chinchap ah Covid-19 nih a kan tlakbuat hoi le, taksa he thlarau he zaw ngai in kan um. Nain, zumtu cu lungdong le vansang in um ding si lo. Pathian timhlamh le program hoih in vawlei ah thil hi a can le tlun ding si ko. Tulio kristian nunnak dirhmun hi pathum in kan tthen si cun:

Cheukhat kristian cu thlarau ah an thi vawlei thil le taksa nuamhnak ah an chuak kho ti lo. Cheukhat kristian cu thlarau ah an zaw (biatak an fiang lo, tihalnak an ngei, chunglei damnak an ngei lo.Cheukhat kristian cu thlarau ah an vaivuan laklawhnak, lunghrinhnak an ngei kohhran, tlaihtleng tbk phunphun um ruangah.

Kristian siseh, zum lotu siseh – thlarau khamhnak le gospel lawmhnak chung kan umter khawh nakhnga caah; tulio vawlei hoih thil phun thum kan tuah khawhmi si. Ka van langhter dingmi pathum caah, kan tthawn le sian taktak a hau.

Pakhatnak cu “cauk le capar” tampi chuah hi si. Pathian kong, kohhran kong, zumhnak kong, khamhnak kong tbk a tawi he sau he rel ding tampi kohhran nih a ngeih ding si. Kum khat ah kohhran pakhat nih cauk pakhat hi chuah lengmang sehlaw, tulio Laimi level cun a za tuk hnga. Cauk le capar ah kan tthancho locun, kan tuaktannak, kherhhlainak le kan hmuhning a der lai i, fekfuan in kan kal thai lai lo. Cauk caah phaisa sengson hau, ttialter hau, edit hau le zuar hau – cucaah kohhran le community (organization) hmanh nih an buaipi huam tawn lo. Thiamsan le cawnsan chan kan ti ahcun, cauk le capar tthattha ah kan rum hau ko.

Pahnihnak cu “social media” ah tthawn hau. Media thilri ngeih hau. Thlahtu zong fial an hau. Video tawi he sau he tuah hau. Sermon, cawnpiaknak le thangtthatnak tbk zong tuah hau. Social media ah umtermi bal hi – ttha ve hna seh. Kohhran nih media latu zong nihlawh pek ding tiang in riankhenh a ngamh hau. Cauk le cauk lawng in gospel karhter a za lo men lai, cucaah social media in karhter a hau ve. Kohhran nih social media in gospel karhter ve usih timi saduhthanh a ngeih cun, tangka sengson hau, media thiammi riankhenh hau (nihlawh in), sermon (zumhnak/cawnpiaknak) tbk tlamtling le felfai in video (dvd/youtube) tbk ah umter hau.

Pathumnak cu “biaruahttinak” hi ngeih lengmang hau. Cu bantuk cu, “biahalnak & bialehnak program, seminar, workshop, ceihttinak (discussion) le biadohnak (debate) tbk program” hna hi tampi tuah hau. Theihhngalhnak le tuaktannak ah tthanchonak a kan pek lai i, zumhnak ah tthawng le fek in kan um kho chinchin lai. Vawlei cu ai ralkahmi le dangmi in a khat ti khawh si. Cucaah, biaruahttinak tampi ngeih hi a biapi tukmi si – ningcang, dikmi le biatak chung um khawhnak caah. Mah bantuk tuah hi budget le caan dih ngaimi si, nain gospel karhternak ah tulio vawlei hoih cun a herh cang.

Kum 2021 pinlei cun cunglei ka langhtermi pathum hna hi kohhran nih hmaithlak kho sehlaw; kohhran tuanbia caah siseh, tlaihtleng dirkamhnak caah siseh, Pathian sunparternak caah siseh, gospel karhternak caah siseh – hlawknak le tthatnak tampi a chuahpi lai tiah ka ruah. Kum zabu 21 Laimi kohhran le kristian zong gospel karhternak pehtlai ah “ruahnak thar le rianttuanning thar” kan ngei hau cang.Credit-Chin UPC Denmark

Be the first to comment

Leave a Reply

Your email address will not be published.


*