Trump ttanhtu, Lai pawl nih nauhrawh le neihkhat umh lawnghi nan buaipi i mah hna pahnih lawnghi sualnak ah nan ruah.

Nauhrawh le neihkhat umh lawng sualnak an si lo, din lonak tuah le fa cawnpiak thiam lo zongteh:Trump ttanhtu, Lai pawl nih nauhrawh le neihkhat umh lawnghi nan buaipi i mah hna pahnih lawnghi sualnak ah nan ruah. Sualnak dang cu biapi ah nan ruat lo i tuah zongah a poi lo titluk in nan ruah. Mah tikah chambaunak le tlamtling lonak tamtuk nan nei ti khawh a si. Sualnak dang cu buaipi tlak lo phunah nan ruah cu/chimtlak lo nan ti cu. Mahcu a palh tukmi ruahnak a si. Bible ah nauhrawh le neihkhat umh lawng sual a si a tinak a um lo.

Mahtluk sualnak a tammi hi chimcawk lo a si ko lai. Nauhrawh le neihkhat umh lawng nan thinlung ah a um peng tikah sualnak dang caah daithlang in nan um lai tikah nan nunnak ah tlamtling lonak le chambaunak a tampi ko lai. Biden a ttanhtu pawl nih cun sualnak vialte kan doh dih ko/doh dih kan i zuam fawn. Sualnak vialte cu kan buaipi. Trump ttanhtu Laipawl, nauhrawh le neihkhat umh sualnak lawnghi arhla fungkhat tlaih in i tlaih ti hlah u. Mah ti nan kal pengah cun nan rawk chin lengmang ko lai. Mah sualnak pahnih lawng biatak tein buaipi zonghi pialsual/kalsual a si ve. Mah vialte sualnak dohding hi nan thei lo maw?

Trump ttanhtu pawl nih nauhrawh le neihkhat umh nan doh tluk tein sualnak dang vialte zonghi do ve hna u. A bik in din lonak, eihmuarnak, le ziknawhnak hna hi biatak tein do ve hna u. Nan theih cio bang sualnak cu nitin kan nunnak ah a muisam phundang dang in a lang ko lai i cu ve bantuk in din lonak zong a muisam phundang dang in a lang ve ko lai. Cozah phaisa fir le ning cang loin hmang lawnghi din lonak tuah a si lo.

US ram le ramdang a um Trump ttanhtu pawl nih do hna u tiah kan forhfial duhmi hna din lonak pawl cu tax file tikah a hlei tuk in phaisa hal a hmangmi Laipawl. Tahchunhnak ah miphun dang nih tax file man $100 an lak tikah kanmah Laimi nih $150/$200/$250 a lami an um ahcun biatak tein do hna u/soisel hna u. Cun citizenship phit tikah Laimi holhthiam lo bawmh an hauh tikah phaisa tamtuk in lak a hmangmi an um. Mah pawl zong biatak tein do hna u. Kawlram ah nupi lak, nu le pa auh a duhmi pawl bawmh tik zongah phaisa tam piin lak a hmangmi, Laimi lakah an um. Cu bantuk pawl zong fak piin do hna u. Appointment a um tikah holh lettu (interpreter) nih phaisa a hleihluat in lak a hmangmi an um fawn. Mah pawl zong doh hna ding. Laimi lak ah mah bantuk in a phunphun in i hlennak a um lengmang. Inncawk le motor cawk tik zongah tamtuk in le a hleihluat tuk in phaisa mi a lami an tampi. Mah pawl zong doh hna ding. Rian sok tik zongah mi bawmh riangmang in phaisa tampi hal a hmangmi zong an um ttheu. Mah bantuk sualnak/din lonak pawl zong doh dih hna ding.

Khrihfa buu phaisa le thilri pawl cu pastor le Khrihfa upa cheukhat nih ningcang loin hmang a tamtuk. Mah pawl zong biatak tein doh hna ding. Laitlang kan khua cio caah hehtiah a phun2 in rianttuan a si tikah cheukhat hruaitu upa te le phaisa kengtu hna nih thawhbur phaisa cu ningcang loin hmang le sawksam a um ttheu. Khua phaisa cu mah phaisa bantuk in a hmangmi an um ttheu. Mah bantuk pawl zong fak piin soisel hna i doh hna ding. Ram le miphun rianttuannak caah tiah phaisa khawlh i mah cu ningcang loin a hmangmi zong an um len. Bu pakhat khat i hruaitu le phaisa kengtu nih zapi phaisa thawhmi cu ningcang loin hmang a um lengmang fawn. Mah bantuk pawl cu biatak tein doh hna ding. Midang bawmhnak ah phaisa kholhmi zong ningcang loin a hmangmi an tampi fawn. Cu vialte cu din lonak/sualnak lawngte an si i fak piin doh ding an si.

Nan fale biatak tein cawnpiak hna u. Nu le nu, pa le pa umh a tthatlo ning zong cawnpiak hna u. Nauhrawh a tthat lo ning zong theihter lengmang hna u. Cozah tuahmi lawng auhnawh len ti hlah u. Nan fale nih volhpamh, upat lonak, le nuncan ziaza dawh lo an tuah/an hmang ahcun fak piin cawnpiak hna u/si hna u. Ca zoh le rianttuan an huamnak ding zong in biatak tein cawnpiak hna u.

Teimak le toidor nun zong cawnpiak hna u. Biatak tein nan fale nan cawnpiak khawh hna lo ahcun nanmah nak in sifak le rethei in an umlen te lai. Homeless zong tampi an i chuah te lai. Misual phu ah an i chuah te lai. Cozah rianttuan kho ding an si lo ahcun nanmah bantuk tal in rianttuan an huam a hau lai, ramdang ahcun. An lung a fim khawhnak dingah Laitlang i nan rak sining, nan dirhmun, le nan harning zong chim lengmang hna u/theihter lengmang hna u.

Na fale ttha tein na cawnpiak khawh lomi hna zonghi sualnak a si ve. Din lonak a phunphun na tuahmi zong sualnak a si ko. Khrihfa mi nih sualnak dohding tamtuk kan nei tihi philh hlah u sih. Nauhrawh (Abortion) le neihkhat umh (same-sex marriage) lawng sualnak an si lo.

(Rom 3:23), “Zeicahtiah mi vialte cu kan sual dih cio ko i Pathian sunparnak kha kan bau dih cio ko.”(Jeim 4:17), “Cucaah cun hi a tthami thil hi ka tuah awk a si tiah a hngal ko ttung i a tuah lomi cu misual a si.”Credit-Van Tum

Be the first to comment

Leave a Reply

Your email address will not be published.


*