Tlangcung mi vialte hi Kawl Uknak aduhlo mi lawngte kan si

I Thimnak le Miphun Covo :Atu lio ramchung ramleng Media le biaruahnak ah, Chinmi chungin, “Cu party… Kha Party Me nan pek lo ahcun, Chin miphun caah Me pek le Nai-Ngan-zii tuah sullam angei lo tiah achim mi kan um len. National Politics ah ahram aa bunh lo i, National Rights atheih lo mi le zei arello mi caah cun, mah pumpak thlawknak, Min tthat co nak le A-khunh-a-zii hmuh nak caah Hi Thimnak hi hman sual afawi te.Atu kan ram chungah Thlennak Change a vun um hluahmah mihi, Kum 60 renglo Tlangcung minih Kawl Uknak kan duhlo ruangah hriamhrei tlaih, thisen tampi luanh hnu-ah, adongh marawtnak ah, Kawl Ralkap acozah nih zeiti ding atheih ti lo hnu-ah, Union pi dirh tthan daan I ceih-mai ko hna usih tiah lam an onh ruangah arak chuak mi asi.

Tlangcung mi vialte hi Kawl Uknak aduhlo mi lawngte kan si. Atu tiang kan duhmi Uknak a chuak rih lo. Kan ram ah nawlngeihnak apel te hmanh kan ngei rih hna lo. Kawlmi hna he Kan I el, kan itai lio caan pi asi. Kawl party hna khi Tlangcungmi Nawlngeinak ape duhlo mi lawnte an si ko hna. Pe duh hna sehlaw, USDP le NLD term khat veve an tlinh caan chungah khan, NCA le Panglong Conference hi lam tanttim an kan phanhpi cang lai. NCA minthut hnu in, kumpi kumnga aliam cang. Conference voi li tiang tuah asi cang. Conference tuah fatin Tlang cungmi nih kan duhmi pakhat hnu pakhat an kan hnawl piak. Aho Kawl party tal nih Tlangcungmi an kan hlop maw? Peace Conference tuah deudeuh, hnawlmi tam deudeuh dawh in a um. Atu ahcun, Tlangcung Hriamtlai hruaitu cheukhat le bang nih cun, kan halmi100 ah 50 hrawnghrang kan ngah kho ahcun, azatuk tiah an ti cang.

Tlangcung miphun vialte nih Mahten Khuakhaan Laireelnak Nawl ngeih kan duh caah Dohthlennak ral kan tho cio. Democracy menmen caah asi hrim loh. Democracy menmen caah siseh law, hi zat thisen luan, le caan rauh a hau hnga lo. Kha hlaanpi khan rak hmuh diam asi cang. U Nu chan lio hman ah cun pei Democracy Phung cu rak hman asi cang ko cu. Democracy nih Tlangcungmi himnak akan pek tawk lo caah, Dohthlennak tiangtiang a rak chuak mi asi tihi fiangten kan theih abiapi ngaingai. Tlang cung mi kan duhmi cu Federal Ramkawmh Uknak kha asi. Kawl nih Federal ram ser aduh lo ruangah, Ralkap uknak in aa..naa an lak I, atu dirhmun kan phan mi asi.

Kan Miphun nih Mahten Khuakhaan Lareelnak nawl kan ngei lo ahcun, favai thlichia nih a choih I alo bang, Democracy uknak thli nih lohlak in a kan choih zau ko lai.

Chinram chung a ummi, Chinmi hi Kawlram milu i, zateek cheu 0.5% cuo kan si. 1% kan tling lo. A milu cun, kan tlawmte nan, Miphun pakhat sinak in, Kawlmi miphun an sang deuh hleinak a um lo. Aw! Mah cucu National (Miphun) a Base mi Politics I kan dirhmun cu asi. Kut-ke tling te’n angeimi Miphun kansi. Miphun sinak in Union of Burma ah aa fonh mi kan si. Milu rel-in  aa fonh mi kan si lo.

Miphun pe-dan hmang lo I, Pumpak siaremnak in Politic akhel mi caah cun, “Min ngei cia” le atthawng deuhmi party vabawmh, va aupi, va dawmhtlaih cu zaang adam I, aupi a nuam khe ko lai. Asina’n Miphun pakhat pei kansi cu’ tiah Miphun Politics atheih mi, Miphun Covo National rights apemh mi nih cun, A Miphun Covo angah hlan tiang zeibantuk politics fields poh ah a Miphun attanh peng ko lai. Democracy cu mitam-u uknak asi ti kha aa fiang lai piin ah, kanram chung hmanh-ah Nawl kan ngei kholo mihi, kanmah santlaih lo asi ti aa fiang cikcek fawn lai.

Miphun ah suttung aa bunh lo mi tu nihcun; Federal, Mahte’n Khuakhaan Laireelnak e! tiah chim le au ve lengmang ko hmanh sehlaw, a chimmi le a tuahmi, aa dang peng ko lai. Federal Uknak kan duh taktak ahcun, kan Miphun pi thazaang hman in kan lak ahau. Mi pakhat khat nih mawh! Phu Phu khat nih mawh! Ne-pi-daw le Rangoon in, Salu bang rak tlunpi khomi asi lo. Miphun sinak nih angei mi asi caah, Miphun min chal, Miphun tthawnnak bakin lak ahau mi asi.

Election le Peace Process le Federal an I pehtlaih lo tiah aruah mi zawng kan um rih hna. Atu lio Cozahpi nih aa hmaithlak mi rianpi pakhat cu Peace Process hi asi. Peace Process I abiapi bik Agenda cu Federal Ramkomh ser kha asi. Daw Suhci nih Election I atling mi party lawnglawng nih Peace Conference kai khawh, itel khawh asi tiah Daan arak tuah I, Term hmasa 2015-20 chung ah khan Political Party angei ve ko ttung I, Ramchung Political party ai-awh in Peace Conference akai kholo mi, Miphun cu Chin Miphun lawng kan si. Chin min bunh lo in ZCD cu an kai Akai hmanh kan kai kholo hnu cun, adang cu chim ding a um ti lo.

Kum 70 chung aa-doh, aa-thah, aa-nawn mi ram ah, Rualrem ten khuasa tti nak lampi kawl usih ti lio pi-ah, kan miphun thazaang ser itim lo-in, kan ngeihmi pumpak thazaang, fimnak le kan mipi thazaang hna midang cahnak ah, hman aa tiim mi kan silo ding abiapi ngaingai. Kan hawi Tlangcungmi pawl au aw nan theih cio ko lai. “NLD! Tlangcung mi zawn na ruah taktak ahcun, Tlangcung miphun umnak State ah Me Pung rak dawnh hlah! Politics rak khel hlah. Central tu-ah kan I bawm hna lai” tibak asi ko. {Adik hlu tinak silo in, an Miphun an ttanh ning langhter duh bia}

Tlak khi a nem lio lawngah na duhmi Form (pungsan) in na ser kho lai. Aro hnu, ahah hnu-ah na remh tthan ahcun, akek lai, a kiak lai, akawi lai i, zei pung-san (form) hmanh chuak lo in a rawk dih ko lai.Kan duhmi kan ngah hlan lo, elections in siseh, Peace conference in siseh, Parliament inn pi chungin le kaa Dangdang ramkhel rian kan ttuannak poh in, Federal ram dirh hmasa hi kan hmaithlak rianpi ah kan I chiah ahau ko. Ithimnak nak ah kan miphun ai-awh Party an tlin ve lo ahcun, aho nih dah, Parliaments le Political fields/stages hna ah Chinram kong a au pi ti hnga.

Daw Suhci nih kan tlin ahcun, Ram Uk Daanbu ka remh lai, thlennak kan tuah lai, ati ve bang, kannih ve zawng nih,  Kan tlin ahcun, “Parliament in siseh, Peace Conference in siseh, State cozah in siseh, kan Miphun Covo lak kho kan I zuam lai” tiah, ralttha ngaiin kan au ve ahau. Atulio caan hi Ram sersiam caan asi. Democracy theipar ei le bar caan a si rih lo.

Hitluk biapit lio caan ah;Phunh-phiu-zii le budget kong men kan aupi hi cu; Ti-hna Tiva-hna angei lomi, ruah sur caan le mi nih ti an thlet (an hlonh) tik lawngah a luangmi ‘Luti’ bang kan si peng lai. Transition period ah kan mipi kan ttanrual I, kan I ngeih cia mi kan Miphun thazaang hmangin Miphun Covo kan lak kho lawnglawng ah, Democracy Uknak cu kan caah sullam angei lai. kan Ram, kan Miphun ahim lai, atthangcho lai. Nangmah le keimah zawng kan phaknak ram kipah kan him lai I, kan hmai a hngal lai.Kaa lawm;Credit-Paul C.Tha

Be the first to comment

Leave a Reply

Your email address will not be published.


*