Tlaih Tongmi Minung Pali Kan Dirpi Hna

2021 March 1 ah Hakha ah palik/ralkap nih minung 23 an tlaih hna. Cu lakah 19 cu Marh 2, 2021 zaanlei suimilaam 3:15 ah an thlah ṭhan hna nain minung 4 cu an hren rih hna. Hi kong he pehtlaih in CDM Supporting Team for Hakha nih palik/ralkap tuahsernak cu kan mawhchiat. Cohlan awk a tlak lomi tuahsernak, ralhrang tuah sernak a si. Hi kong ah kan si khawh tawk in kan i zuam lai.

Tlaih atongmi Mai Tial Tin Par (kum 25), Mai Van Ni Sui (kum 22), Pu Bawi Cung (kum 43) le Pu Sai Thawn @ Shing Tun (kum 53) cu Hakha mipi nih kan in zohthla hna. Ram le miphun ca ah tlaih nan ton a si. Kan ca ah hero; tlangcung chokhlei parṭha nan si. Nan rim ahmui i, nan i dawhnak nih Hakha a zelh. Nan min cu kan thlik in kan lungki tiang aa tap. Nan ca ah thla kan cam. Nan ca ah kan in zuam. Kan in dirpi hna. Zaan muihnak a dih in zing ni ceu dawh te a hung chuah ṭhan bang nan rung chuak ṭhan colh lai.

Hakha Mipi hna, Laimi nih zei ruang ah Vakok kan i chuan? Vakok cu dawtnak, zawnruahnak, tatsar ngei a si. Hihi kan miphun i kan thi a si. Philh hna hlah usih! Vakok cu a hawi harnak a ton tik ah khamh le domh aa zuam. Cu bantuk in kannih zong nih kan hawile ca ah thlacamnak, tuahsernak le kan thiamnak chuak in ṭangpi cio hna usih. Kan lungrualnak, kan i dawtnak, kan i kil kamhnak, Vakok lungthin ngei kan sinak nih palik/ralkap tuahsernak cohlang awk a tlak lomi cu a lu in a kedil tiang cheu dih seh! Parh dih seh!
Credit-CDM Supporting Team For Hakha

Be the first to comment

Leave a Reply

Your email address will not be published.


*