Thlachiatruah Nunphung le Tulio Chin (NLD) Cozah

Chin Miphun cu ‘‘Thlachiatruah’’ timi nunphung angeimi kan si, Kawl Miphun bel nihcun  a ngei lo.Kan Chin pupa hna biafang ah aa dawh tukmi le duh a nung tukmi biafang cu ‘‘Thlachiatruah’’ timi biafang hi a si. Hi thlachiatruah timi biafang hi vanchiatnak kan ton caan le lunglawmhnak kan ton caan ah a takin kan langhter tawnmi a si.

Vanchiat ton caan ‘‘Thlachiatruah’’Minih kan cungah thilsual an tuah sual caan (tck, ah, lainawnnak kan cung a tlun sual caan, mi he isikvuak kan ton sual caan tibantuk ah lehrulh cu a ttha lai lo, thluachuah vanni kan tong sual lai lo tiah, Thlachiatruah timi nunphung he kan ingaihthiam tawn. Cucu Chinmi kan nunphung ah aa dawh tukmi nunphung pakhat a si.

Cun thihloh kan ton caan, zawtfah kan ton caan le zatlak puicimh kan ton caan ah pakhat le pakhat kan ihramhning, kan izuanhnawhning le kan ihnemhning hna hi aa dawh tukmi nunphung pakhat, Thlachiatruah timi in a vun i semmi nunphung a si rih. Cu bantuk harnak, ngaihchiatnak le zatlak puicimh ton caan ah ihramh lo, ihnemh lo le izuanhnawh locu, a ingtu caah fak kan ti i, a tuah lomi minung zong khuaruat lo le minung lo ah ruah an si.

Vantthat ton caan ‘‘Thlachiatruah’’ Thlachiat ruah timi hi vanchiat ton caan longah a si lo. Vantthat ton caan zongah kan hmannak tete a um. Tahchunnak ah pakhat khat nih thluachuah a hmuh caan, hlawhtlinnak a hmuh caan le itthitvat caan tibantuk ah kan huatmi hna le kan rem lo tukmi hna minung an si ko zongah chuahpi lo le an ilawmhnak va hrawmpi locu minung lo ah an kan ruah sual lai tiah, ‘‘Thlachiatruah’’ nak lungthin he kan rem/huat mi hna minung zong kha kan chuah pi hna i, an i lawmhnak kha kan lawmpi ve hna.

Tutan Thil Cangmi Kongah Tutan ah kan far/nau nu Malay in Laitlang tiang ruak an vun tlunpi khawh hi chungkhar long siloin, Laimi phun dirhmun in kan i lawm cio ding si i, a ruak te zong cu Covid-19 boruak le Chin nunphung zohchih in aa tlakrem ningin vui ding khi a si.

Nain tulio kan cozah tthio cu, zei khua hme an ruah hnga, Chin nunphung ah a sunglawi tukmi cu maw an thlau cang i, Kawl ruahnak nih cun maw a chilh tuk cang hna hnga? Lamkam rumro i minung fa Ui le Ar bang phum ko cu a celh celh ding khi a si lo.

Hi thil can hi kan CM le Hluttaw Speacker nih an theih ve ko lai si
kaw, zeitindah an hei tuar ve hnga mu. Thaizing kipah an au-aan kan theih tthio ko lai tiah ruahchannak ka ngei ko.

U Nu chan, Ne Win chan, Than Shwe chan, Thein Sein chan le nihin NLD cozah chan tiangah tlangcung miphun pawl kan nunphung vialte hloh dih i, anmah Kawl nunphung in chilh/dolh dih an kan timhmi cu maw kan izumh rih ko hnga i, kanmah le kanmah cu Ui le Ar bang cun kan i vui ko hnga.

Hi bantuk thil caan hi cu Chin miphun vialte daitein kan um ding si ti lo. Ralttha tein doh caan si cang i, doh cio ding zongin careltu vialte kan sawm hna.Credit-Salai Biak Tum Lian 6 October, 2020

Be the first to comment

Leave a Reply

Your email address will not be published.


*