Thimnak cu 2008 phunghram ningin asi lai

By- Rev Jeremiah Sang Dun, Ralpel
Hi cabite hi 2008 Phunghrampi ( Kan hman liomi) he aatlak in tialmi a si. A thabik in Hruaitu thimnak covo kan ngeihmi hmanthiamnak caah tialmi a si. Zahnaktlang ah lai a hlummi, thimnak ah ai tel bak dingmi caah abik in tialmi a si.

Hi ca na rel hlan ah atang lei hmanthlak ka thil chihmi te khi tha te in rak zoh/rel hmasa law tiah kan nawl. 1. Upadi ning in, President, Vice President-1 le 2, (Pyitaungsuh Cozah Pi a hruaitu ding) hna khi Pyitaungsuh Hlutdaw: 664 MP nih an thim hna lai. 2. Pyitaungsuh Hlutdaw cu Pyituh Hlutdaw: 330 MP, A Myothar Hlutdaw: 168 MP le Ralkap 166 aa komhmi a si.

I thim khawh lonak Myo Ney ( Peng) hna kan ngeih sual ahcun 330MP le 168 MP (Mipi thim dingmi) khi anzawr te lai. Ralkap 166 tu khi cu an mah ningpeng an si lai.

  1. Pyituh Hlutdaw 330 MP hna cu, Rampumpi chungin Myo Ney pakhat ah pakhat cio in kan thim dingmi, kan umnak Myo Ney cio ai awhtu ding an si. Mah 330 MP chung khin, Than Tlang peng, Zahnaktlang Mipi ai a kan awhtu ding MP -1 kan thim khawh ve lai. Na thimmi pa kha teinak a hmuh ahcun Naypyidaw i zung a thut lio zawngah nan chonhngam awk, Zahnaktlang harsatnak zawng na chimh ngam ding a si hnga.

Cubantuk cun, A Myothar Hlutdaw 168 MP hna cu, Pyi Ney(State) or Tain (Division) pakhat ah 12 cio in kan thim dingmi, kan umnak Pyi Ney (State) or Division cio ai awhtu ding an si: Chin Ram Pumpi ai a kan awhtu ding MP an si lai.

  1. Chin Ram Cozah hruaitu ding: Pyinay Hlutdaw zawng kan thim hna lai. Pyinay Hlutdaw MP ding cu Myo Ney(Peng) pakhat nih pahnih cio in thimding a si.

Cu caah, Chin Ram: Chin Pyinay Hlutdaw ah hin Chin Ram ah Myo Ney pa 9 lawng kan um caah; thimmi MP – 18, Ralkap – 6 he, an dihlak ah 24 an um lai.

Seat 24 chungah seat 12 cung teinak a hmutu Party nih Chin Cozah hruaikhawhnak lam a um tinak a si. Na in, Seat 12 cung tei cu zei party ca hmanh ah a fawi lo bakmi a si.

  1. Kan theih bak a herhmi cu: Chin Ram CM(Chief Minister) khi President nih a vun thim lai. President cu Pyitaungsuh Cozah Pi a ser khotu party LIAN minung a si te lai cu!
  2. Zahnaktlang nih kan thimding mi hna:
    a). Tlang aiawhtu/President thimtu ding: Pyituh Hlutdaw MP -1 ( Ai cuhmi 5 an si kha). Naypyidaw ah zung a thu lai.

b). Tlang aiawhtu/President thimtu ding: A Myothar Hlutdaw MP-1 ( ai cuhmi pa 4. Kan TLANG mi pakhat ai tel). Naypyidaw ah zung a thu lai .c. Tlang aiawhtu/Chin Cozah hruainak ah, ai tel ding Pyinay Hlutdaw MP-1 ( ai cuhmi pa 5 an si.Kan TLANG mi pakhat ai tel). Hakha ah zung a thu lai.Minung pathum cio thimnak nawl kan ngei tinak a si.

  1. Chin Ram CM cu President nih MP thimmi hna chung in a vun thim lai. Chin Ram CM nihcun, Chin Ram Cozah a sersiam lai President theihpinak he.

Atulio, Chin Cozah tang ah khin,Vuanzi Tha Nah pa -10 lawng kan ngei. Cu chungah cun Lungchungzi lei Ralkap covo chim lo khin cun, Vuanzi dang pauh pauh khi Chin Ram CM nih President hnatlaknak he tavuan a pek khawh.

Chin Ram Vuanzi pakhat si awkah MP aa cuh lomi/a si lomi zawng pekkhawhnak a um. Tahchunnak ah, a mah ka tanhbia siloin Dr. Sa Sa hna khi MP aa cuh lo na in, President le Chin CM nih, riantampi a tuan kho lai tiah; an duh ahcun Lanpan Settuaizi Zung Vuanzi Chin Vuanzi pakhat hna ah a chuak ngual khomi a si Upadi lei in tlinlonak dang a ngeih lo ahcun.

Biadonghnak lei ah, Zahnaktlang in thimfung a pe kho dingmi nih, na thimkhawhmi na covo khi zoh law,Myanmar Ram Pi le Chin Ram hruaitu caah khin na duhbikmi hna kha thim ko.

Keimah Zumhning Cuanhning: Thimnak tha te in kan tuah khawh ahcun, NLD nih Pyitaungsuh Cozah Pi cu a ser than te ko lai. President zong Pu Win Myint thiamthiam a si te lai. Vice President-2 zong Pu Henry Van Thio thiamthiam a si te lai. Vice President-1 cu Ralkap dang/thar pa khat a chuak te lai kei mah zumhning sawsawh.

Biacah: Myanmar Ram hi Democracy kan si thlu rih loh, Ralkap pensioners pa 5 hrawng khi, kan President lahkhah tluk/tamdeuh in lahkhah an ei rih( thil chihmi zoh te). Ralkap nih an kan hruai ko rih ti khawh a si. Ram dang Democracy he kan i lo rih lo!

Cu caah, kan duhmi party kan tanh tikah party dang tanhtu hna kha faktuk in donak/sawiselnak te hna kha i sum deuh hna usih. I thimnak cu Nikhat te ah a dih ko lai. I thim hnu tiang in ihuatnak/iralnak chuak lo ding kha philh hna hlah usih! Blessings JSD, Rangoon

Be the first to comment

Leave a Reply

Your email address will not be published.


*