Thih Nun le Phum Nun” January 10, 2021

1. Laiholh in “tipil-in” kan timi khi, Mizo, Falam le Kawl nih “baptisma” an ti. Baptisma ti cu lang loin phum tinak a si.  “Tipil-in” a si ahcun ti hi aa tel zungzal dingah ruah palh a fawi te. Ti lawng si loin thildang zongah tipil/baptisma in khawh a si.

2. Israel mi cu minmei chungah khan tipil baptisma an rak ing. Minmei nih a runven hna i Rili Sen kha him tein an tan 1Kor 10:2. Him tein rili an tan khawh cu minmei nih a phum hna caah ral nih an hmu kho hna lo Exo 13:21-22.

3. Moses nih Israelmi kha “Phungbia zul u” a ti hna, an zul kho lo. Profet hna nih “Nan sual i-chir u” an ti hna, an i-chir kho lo. Biakam hlun ah a tuah kho lomi nun kha Biakam thar ah cun Cross ah a thah lawlaw.

4. Khrih Jesuh chung i tipil/baptisma kan in ah khan amah he vui ti kan si i a thihnak ah khan kan thi ve. Rom 6:3. Cross hi kan nunnak si loin kan thihnak tu a si Rom 6:6.

5. Khrih a thawhthan ah khan zumtu kannih zong nunnak thar ah kan tho ve. Nunning thar asi lo, ziaza thar zong asi lo. Nunnak thar newness of life a si Rom 6:4. Hrinthan nun in thawh a si.

6. Paul nih “Nifatin ka thi  I die daily” a timi hi “Nifatin phum ka si” timi he a sullam aa khat 1Kor 15:31. Phumnak minmei nih phummi Israel mi kha himnak a pek hna. Phumnak Khrih nih phummi nangmah zong himnak an pek ve lai.

7. Good Friday ah Jesuh lawng thihter ti hlah. Thlan ah Jesuh lawng phum ti hlah. Nangmah tu kha thi law thlan ah i-phum cang. Cucu Pathian biatak a si. Hi biatak hi na kaa in chim tam law nunpi hmanh, Thiang Thlarau nih an bomh hrimhrim lai.

8. Sualnak na tuah lai ah, “Cross ah ka thi cang, thlan ah phum ka si cang, hi bantuk sualnak hi tuah kho ka si ti lo” tiah chim lengmang. Na tei/phum chin lengmang khawh ko lai.

9. Na thinhunnak kha phum. Huatnak kha phum. Siknak kha phum. Nu-va imhnak kha phum. Nu-va i-thennak kha phum. Thitum hlan sex tuah kha phum. Comment thalo na tial dingmi kha phum. Bu ah na lungtlinlonak lungput kha phum. Soisel na hmanmi kha phum. Midang tlinlonak na hmuhmi kha phum law mah tlinlonak hmuh lei ah nung.

“Thih nun le phum nun” nih nun-tam kan ngeihter ko seh.By-Sailo Pa 240-753-3857

Be the first to comment

Leave a Reply

Your email address will not be published.


*