Thawngtha bak a si.Hakha ah Palik Bawi Pakhat Amah tein aa That

Hakha palik zung ah rian a ttuanmi Pu Sui Hung cu nizan May 17 ah amah tein meithal in aa kap, tiah thawng kan theih.

Paliklen, ahlan ralkap tidil pawng ah khan amah tein meithal in a lu ah aa kap i a nunnak a liam.

Zei ruang ah amah tein meithal in aa kah timi fiang in theih a si lo.The Chin Journal
May 18, Hakha

A Si Kho Lomi A Si Kho.Holh ah hin a si kho lomi a si kho timi, tuah sernak ah a rak si kho taktak mi bia tlang a um, cucu Mirang holh in “The impossibility of possibility” tiah an ti. Abiana ah ngaknu a si mi nih fa a pawi; pa hngalhnak tel lo in fa a pawi kho, ti cu a si kho lomi a si khomi a si. Mary nih Thiang Thlarau thawngin fa a pawi khawhmi, Sarah nih a tar hnu i fa a hrin khawhmi te hna hi a si kho lo tiah minung  fimnak le a hmuhtonnak nih a ruah lio ah fa an pawi i an hrin khawh ko.

Pathian caah cun a si kho lomi a um lo. Minung le kokek sining nih a si kho lo tiah kan ruah mi kha Pathian caah cu a si kho ko. Abiana ah caan kong kan ruahnak ah, kannih nih cun “Nizan, nihin, le thaizing” in kan lung a fian ning a si; asinain Pathian cu hramthoknak le donghnak (Alpha le Omega) ngeitu a si ko. Minung nih cun nizan kha kan thleng kho ti lo i nihin kan pal cuahmah mi kha kan pal lio ah kan ta a si tiah kan ruah, kan tem khawh i asinain thaizing a simi hmai lei caan cu kan kut chungah a um kho lo. Saduh lawng kan thah khawh. Asinain Omega kut chung ah kan um ti cu zumhnak in a ban chungah kan i hngilh ngamnak kha a si.

David le Goliath kong kha Baibal ah kan rel; ngakchia tuanbia ngaih nuam sawhsawh a si lo. A si kho lo mi kha a si kho mi ah Pathian nih tlangval no te Amah aa bochan ngaimi pa te raltthatnak in a langhtermi si khawhnak, teinak a si. David nih cun siangpahrang Saul ralthuam kha aa hruk chun ve nain a rih tuk i a kalpi kho set lo. Asinain sahrang (chiandeih le vom) tin chung i a rak khamhtu a Bawipa Pathian thazaang bochannak he Goliath kha a rak fuh ngam. David kha na fapa le na tupa si ter hmanh, na siang ngam hnga maw? Mihrut! a kal in kal hlah tiah na thlauh ko hnga lo maw? David kha na nau pa hei si sehlaw Goliath mitthawngpa doh awk ah an kal ter siang hnga maw?

Minung fimnak le ruahnak nih a phaak tawk ahcun Goliath doh awk i David na thlah sian a si ahcun nangmah kha na thluak a hmaan lo bia (something wrong), fa le cung ah dawtnak na ngeih lo bia, tiah ruah na si ko lai. Ka fapa te David nih miphun a dawt tuk, a nun aa thaap i a si tiah  nangmah zong nih na ti bal lai lo i, na innpa, khrihfabu le miphun zong nih an in ti pi ve lai lo. Goliath va ton kha hruh raltthat ah ruah piak na si ko lai. Asinain kan biakmi Pathian kha mit hmuh lo in kan sin ah aa phuang i a kan hruaitu, thazaang petu, teinak le khamhnak petu a si kha kan zumh, kan bochan khawh ve ahcun David raltthatnak kha kan i hrawm ngam ve ko lai. David hriamnam cu chai le ttawlhttang te a si ko nain, Pathian nih cun fei, nam le thalnak tthawng deuh in a hman khawh ko.

Atu lio kan fale kan mino hna an ral tthatnak le pumpeknak hi Pathian bochannak le thazaang thawngin a si kha kan thinlung mit dei sehlaw hmuh khawh, cohlan khawh, lawmhpi khawh, le raltthat pi khawh kan i zuam cio awk a si. Kan hmaika i vampangpi bang aa chong komi hi Goliath nak hmanh i a ngan deuh, a tthawng deuh ko, asinain Pathian he kan doh ve ahcun teinak cu kan ta a si ve ko lai. A si kho lo mi kha a si kho cuahmah ko ee. Thiang Thlarau he cun “The impossibility of possibility” timi hi luatnak le khamhnak tling kan hmuh khawh nak ding caah Salm 23 bang khan ttial khawh a si ve lai ka zumh ko.Credit-Lal Pek Lian

Be the first to comment

Leave a Reply

Your email address will not be published.


*