Thantlang Peng, Vanzang tlang ning in COVID-19 zawtnak runvennak kong an rengh, phung zul lo dantat timh

A nawl thumnak COVID-19 zawtnak kong runvennak ca ah Thantlang Peng, Vanzang tlang khua dihlak khuachung luhchuak fak piin an rengh i, phung a zul lomi poh dantat ding an timhlamh tiah thawng kan theih.

Hi kong he pehtlai in khuami pakhat nih, “Myanmar ram chung ah COVID-19 zawtnak nih an kan phak hi atu in cun a voi thumnak a si kan ti lai cu. Tutan hi cu tih a nung ngai ti zong zapi theih a si. Cun, atu cu Cozah lei zong i bochan ngam a si lo ca ah kanmah le ti khawh tawk cio in kan khuatlang kan i runveng hna. Khua luhnak hauka in kan hngah dih cio,” tiah a chim.

Cozah lei bochan awk an that lo ca ah mah le pengtlang khua cio in a si khawh chung i runvennak an kawl cio. I runvennak ca ah a herh mi thilri zong mah le sining nih a phak khawh tawk in an cawk an zalh tiah kan theih.

Cun, “Atu khua luhnak in kan hngahnak hi zarh khat fai lawng a si rih. Khawika hmun le khua in a ra mi poh khuachung ah kan dinhter bak hna lo. Cun, khuachung ah aa din i upa nih kan hmuh a si cun dan kan tat hna lai,” tiah a cunglei khuami pakhat nih a chimchap.

Phung an chuah mi a zul lo poh minung pakhat ah Myanmar ram tangka in Ks. 50,000 dan an tat hna lai tiah kan theih.

Khualuhnak hauka hi a lut he a chuak he zing suimilaam 6:00 in zaanlei suimilaam 9:00 tiang khuami nih an hngah i a lutchuak mi poh biahalnak le cheknak an tuah dih hna.The Hakha Post

Be the first to comment

Leave a Reply

Your email address will not be published.


*