Thantlang ah meithal le bomb thawng a dai taktak rih lo

September 14| Thantlang khua ah 8:00 PM in atu 10:00 PM tiang meithal thawng siseh, bomb thawng siseh a dai kho taktak rih lo, a puak pah lengmang rih tiah kan theih.

“Bomb thawng he meithal thawng he kan theih pah lengmang ko rih. Chaklei Sang, Khualai (Zunghmun sang hrawng) le Thlanglei (Sianginn sang) tibantuk in meithal thawng le bomb thawng kan theih peng ko rih,” tiah khuami pakhat nih The Hakha Times ah a chim.

“Thantlang khua hi August 25 thok in kahdohnak aa pehtlai i cheuthum ah cheukhat hmanh nih khua kan hngak ti lo. Bomb thawng he meithal thawng he kan theih lengmang fawn i tarnu tarpa le mizaw caah thinphan dailo kan si ko,” tiah khua upa pakhat nih The Hakha Times ah a chim.The Hakha Times

MEDIA ZONG BIBLE TANGAH AN UM VEChinmi a tam u cu, JESUH KHRIH a zumtu, JESUH KHRIH a umnak, vanram kai ding aa zummi kan si hna. Zumtu paoh Bible lengah um khawh a si lo. Bible tangah kan um dih.

Media si ruangah theihmi bia paoh le theihmi biathli paoh le mah duhmi paoh phuannak right Bible nih a pe hlei lo. Elisha nih Siria ralbawi biathli a theih i Israel siangpahrang sinah a thanh tawn bantukin ral biathli a thei i a phuang kho tu si ahcun a țha tuk hnga.

Sex hmanthlak le hur kong te hna le a hlei hluat in tlangtaar perh te hna zong hi Bible nih a onh mi a si lo. Mah miphun biathli hawi cu a zutsualmi theih sual hmanhah a zuhchinnak hnga lo thuh i zuam cio ding a si.

Thianghlim deuh tein nan i zuam ruang i na hlawhtlin lo ahcun, kha rianțuannak khan i ngawl law, pasal, nusal pawcawmnak riandang kawl ko. BAWIPA nih in bawm ko hna seh.

Zumlotu media hna nih, nu le pa sualnak lei hna le thawngpang deu hna le, mi nih vanchiat nak an ton i harsatnak an tonmi hna le rambuai, miphun buainak kha hmang riang mangin, zer ngaiin tangka hmuhnak caan țha ah an i lakmi bantuk khi Kan nih Chinmi zumtu nihcun kan hrial hrimhrim ding an si.

Vawlei cung ram țhacem le ram thawngcem kan timi USA le ramthumnak pawl hna hmanh hi ram dawtnak a ngei lomi, tangka lawnglawng a duhmi an media pawl ruangah an huham a zawr i an mipi le an mino hna thinlung a rawk cuahmah cang. Cu hna nawl cu zumtu nih kan hrial ding a si.

Mipi lei zong nih kan Miphun caah a him lomi biathli phuan le thawngthanh hi i sum cio hna u sih. Chinmi cu Miphun tlawmte lawng kan si, i funtom khawhnak bia a si lomi, mah pengtlang a hawih tukmi biachim hna hi i sum hna usih.

Matthai 18:7 “Vawlei cungah hin cu bantuk tlukrilhnak a um caah a va poi hrinhran dah! Cu bantuk cu a um țheoțheo ko lai. Sihmanhselaw cu bantuk a umtertu caahcun țihnung a si hringhran ko.”Lamkaltu Tluang Lian (Martar)

Be the first to comment

Leave a Reply

Your email address will not be published.


*