Suh Kyi Nih Ramchungah A Cangmi Zeihmanh A Thei Lo!

State Counselor Daw Aung San Suh Kyi le President Win Myint cu May 24 ah Naypyidaw i ralhrang khawngsil innkulh chung biaceihzungah chuahpi an si i an sihni hna he minute 30 chung tonnak an ngei kho.

Cu caan tawite chung tonnak ah Suh Kyi nih a sihni hna sinah a chimmi cu ngaihchia tuk a si.

“A chimnak ah cun thawngthanhca (news paper) ka rel kho lo. TV ka zoh kho lo i radio zong ka ngai kho lo. Ramchungah a cangmi vialte hi pakhat hmanh a thei lo. A thimi hna zong a thei lo. CRPH le NUG zong a thei lo” tiah a sihni pa U Khin Maung Zaw nih a chim.

Asinain a cawngtu palik pakhat nih CRPH le NUG hi zeitindah na ruah hna tiah a hal i Suh Kyi nih CRPH le NUG cu a theih lo caah palik pa cu a hal chin. Cuticun palik pa nih zeimawzat a chimh caah a sihni hna he an i ton hlanah CRPH le NUG kong tlawmte a theih manh.

NLD hrawh an timhmi kong an chimh tikah Suh Kyi nih cun “Mipi an um chung poah cu NLD a rawk lai lo, a um peng lai” tiah a leh hna.

Hmasa ahcun an chiahnak hi amah Suh Kyi inn ah a si theu lai tiah ruah a si nain a rak si lo. Asinain khoika dah an chiah ti cu anmah ralhrang bawi rual lawng nih an theih, amah Suh Kyi zong nih a thei lo.

Cu chinchap ah nizan ah hmundang ah an ka thial, ka umnak hi khoika dah a si zong ka thei lo tiah Suh Kyi nih a sihni hna sinah a chim.

Ram zalennak lakpiaktu fanu, rampi kilvengtu ralkap rak dirhtu fanu, a miphun le a ram zawnruah ah a pasal ruak hmanh a hmu lomi, kum tampi chung rak hren cangmi, a ram caah a nunnak pe siangtu! ICJ sualpuhnak ah a pa dirhmi ralkak sualnak le thatlonak huhphenh in bia a chimtu nusaltha cu a ram chungah a cang cuahmahmi buainak, thahnawnnak vialte thei kho loin ralhrang nih an hren rih ai mu!

A kumkhua a upa cang, a tar cang, a tuak an par cang….asinain a cungah dawtnak, zaangfahnak le zawnruahnak a pelte hmanh an ngei lo.

Pathian nih teinak a kan pek i mipi nih lai kan rel ve tikah cun mu na cung i an tuahmi nak fak in lehrulh an si te lai.

Biatenh: Ka hawipa lebang nih cun MAH le NCL cu BBQ ah ka rawh hna lai a ti ko..an luat lai lo! (Capo) The Chin Post

Be the first to comment

Leave a Reply

Your email address will not be published.


*