Sopum khua ah meithal thawng kan thei lo, SAC ralkap belte Khualhring tlang lei ah kal dawh an si tiah chim

The Hakha Times, June 10 Sopum khua ah meithal thawng kan theih tibantuk hi adiklo mi a si, SAC ralkap pawl zong June 10, zaanlei ah khan an kal i Khualhring tlang lei ah kal dawh an si ko, tiah min langhter lo mi pakhat nih a chim.

“Thantlang Peng Sopum khua ah an i kap tibantuk, meithal thawng kan theih, tibantuk an tial mi kha facebook ah kan rel i kan khuaruahhar ngai. An i kap lo, meithal thawng zong kan thei lo. SAC ralkap pawl belte Thantlang lei ah an kir nain Thantlang an phan fawn lo. Sopum ah an um ti lo. Rul-lei ti mi khualtlawng pawl an i dinhnak hmun phanh hlan ah khin Khualhring tlang lei pialnak (Khuafo khua lei kalnak) lam a um i cu lam cu an zawh lai i Khualhring tlang lei ah an kal lai, ti hi zumh cio a si. Aruang cu Mualkai khua le Tihbual khua kar kahdohnak a um hnu khan khika lei ah an kal tiin kan ruah ko,” tiah min langhter lo mi pakhat nih The Hakha Times ah a chim.

Hi kong ah Khualhring tlang khua pakhat in khuami pakhat nih, “SAC ralkap an rachap, tiah an kan chimh i atu hi ruahpi suur lak ah kan zaam. Tihbual le Mualkai karlak hrawng ah khin zaanlei 6:30 pm hrawng ah meithal thawng maw a si, bomb thawng dik, kan theih. Cu dahlo, atu hi cu thawngpang a dai ko,” tiah The Hakha Times ah a chim.

Nihin June 10 Sopum khua chung tan in Thantlang lei ah khualtlawng aa choklet mi tampi an um ko. Ral tih ruang ah a zaam mi cu an um ve ko nain thawngpang an tial ning lawmmam cun a si lo. Meithal thawng zong kan thei lo. June 9 zaanlei SAC ralkap an phanh lai belte ah meithal an puah len i cu dahlo meithal thawng zong kan thei lo, tiah min langhter lo mi pakhat nih a chimchap.Photo_Crd The Hakha Times

Be the first to comment

Leave a Reply

Your email address will not be published.


*