Social media maw palh, kan lungput dah?

Ramkhel party ah NLD hi ka rak dirkamh. Ziah? Zeiruangah? tiah naihniammi nih an ka hal ttheu. Ka bialehnak cu “Kawlmi lila nih Kawl ralkap uknak hi an hrawh locun, Tlangcungmi lawng nih kan hrawk kho lai lo”, “anmah Kawlmi hi hmaisuanter in Kawl ralkap hi dohter i, an hnulei in Tlangcungmi nih bawmh le dirkamh ding” tihi ka chim tawn. Anmah Kawlmi lila hmaifonter i, federal democracy lak hi ka policy bak si. Nain, “mi kut cung in rul tlaih”, “mi kheng chung savo lak”, “mah ca cu mahte in lak” tbk phunphai khi a tam ngai caah – tampi hmanh ai chim huam in ngam lo. A tanglei zuk nih ka chim duhmi fianter ko.

Kawl ralkap (Tatmadaw) hi kan doh. Nain, Tarmadaw policy nih Chinmi cu a nung bu in an kan phum (vui). “Divide & rule” policy an tuahmi hi Chinmi nih kan tlinter khun. Tatmadaw miphun cazin ah Chinmi cu miphun “53” ah in kan um – lawmhnak in cohlangmi kan tor. Mahle caholh, thuam, laam le pengtlang cu miphun in kan kalpi dih i, vansan khin “Chin” hi nithawng bang kan hman. Tatmadaw sinah mahle pengtlang cio in lawmhnak chim ding tampi kan ngei. CNF/A, ZRF/A, KNO/A pinah CNO/CNDF ai chap. Chinmi cu Tatmadaw a doh le dironh ding cun, kan puitling rih lo. Upa bia cun “kan kumkhua no tuk rih, kan vuncuar a nem in pan tuk rih” ee Tatmadaw doh ding ah.

“Hmailei zong ah ramchung, ramleng le SoMe rianttuanttinak in phu dangdang zong kan dirhpiak rih uh” tiah bianeng khin chim usih. “Meithal tlaih hi lentecelh si lo” tihi KCA pehtlai ah ka chim pah. Zapi huap CDM thawhbur zong kan ngolter ulaw – mah pengtlang CDM thawhbur lawng kan tuahpi uh. Mah khua le pumpak zumhmi rianttuannak ah CDM dirkamhnak zong hi hmailei cu thawh cio ah ttha lai. CRPH le NUG dirhmun hmanh ai fiang rih lo. CDM cu 2022 Nobel Peace Prize ah mintar a si, nain CDM thlahnih kal hlanah “meithal” kan puah colh. Tatmadaw doh hlanah, CNA nih doh ding tam tuk an ngei – a poi bak. CNA, ZRA, KNA le KNDF hi i-doh hmasa uh, a tthawng cemmi kha – Chinmi vialte nih kan in zulh hna lai. Cu hnuah Tatmadaw cu kan doh te hna lai. Policy thlen cio hau. Note: mah vial kha siseh – pumpak lungchuak.Credit-Van Nun Lian

Be the first to comment

Leave a Reply

Your email address will not be published.


*