Sifahnak zong ka tuar i a si a fakmi hna nun kai fiang

Keimah Hi:A ka hngal bal lomi nih cun, a fim tuk, a ṭha tukmi le a palh tuk theng lomi minung ah nan ka ruah khawh men. Ca ka ttial le thazaang peknak ka ṭial tikah keimah hi a tling hlei khunmi le hawi hlei nakin a ṭha deuhmi hna ka vung lo.

A tak ngai ngai ti ahcun, ka ca a reltu hna i a tam u nakin ka mitthli zong a tla deuh lai i, palhnak zong ka ngei deuh lai i, a chiat zong ka chiat deuh lai pinah a chambau deuhmi ka si ko lai. Cho zoh in a ka zohmi hna nih ka tuanbia ṭhing thei u law, chuk zoh in nan ka zoh dih ko hnga.

Sifahnak zong ka tuar i a si a fakmi hna nun kai fiang. Ngakttah ka si caah ngaktah hna nun kai fiang. Hawikom nih hlawt tiangin a ṭha lo balmi ka si caah ka hawikom hna cohlan an herh zia kai fiang. Mi thinlung ka fahter bal caah ngaihthiam halnak nih thinlung a daihter zong kai fiang. Sualnak a tuah balmi ka si caah mi sual ngaihthiam a herh zia kai fiang .

Tlin ti ahcun nan lakah a tling lo bikmi ka si ko. Mi cheu he kai dannak belte cu ka tlin lonak le ka palhnak hi kai zahpi bal lo ca tu ah nan caah thazaang pek kho dirhmun ka phaknak hi a si.

A cung i ka ṭialmi vialte tlamtlin lonak, ṭhat lonak le chambaunak le palhnak ruang bik ahhin ka hawikom ṭha bik ah Jesuh kaa chiah i, Pathian hi ka thlah bal lonak a ruang a si. Zeicatiah keicu mi chambau tak tak, nan hngalh ciami he hngalh lomi he a chambau tak takmi kha ka si ko.Credit-Nusung Hrangtlung

Be the first to comment

Leave a Reply

Your email address will not be published.


*